Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
XIII. Kusināra Vagga

Sutta 124

Bharaṇḍukālāma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[276]

[1][pts] Evaɱ me sutaɱ:|| ||

Ekaɱ samayaɱ Bhagavā Kosalosu cārikaɱ cara-māno yena Kapilavatthu tad avasari.|| ||

Assosi kho Mahānāmo Sakko Bhagavā kira Kapilavatthuɱ anuppatto ti.|| ||

Atha kho Mahānāmo Sakko yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhitaɱ kho Mahānāmaɱ Sakkaɱ Bhagavā etad avoca:|| ||

"Gaccha Mahānāma, Kapilavatthusmiɱ tathā-rūpaɱ āvasathaɱ jāna,||
yatth'ajja mayaɱ ekarattiɱ vihareyyāmā" ti.|| ||

[277] "Evaɱ bhante" ti kho Mahānāmo Sakko Bhagavato paṭissutvā Kapilavatthuɱ pavisitvā kevala-kappaɱ Kapilavatthuɱ anvābhiṇḍanto na addasa Kapilavatthusmiɱ tathā-rūpaɱ āvasathaɱ yattha Bhagavā ekarattiɱ vihareyya.|| ||

Atha ko Mahānāmo Sakko yena Bhagavā ten'upasankami.|| ||

Upasaŋkamitvā Bhagavantaɱ etad avoca:|| ||

2. "N'atthi bhante Kapilavatthusmiɱ tathā-rūpo āvasato yatth'ajja Bhagavā ekarattiɱ vihareyya.|| ||

Ayaɱ bhante Bharaṇḍu Kālāmo Bhagavato purāṇasabrahma-cārī.|| ||

Tass'ajja Bhagavā assame ekarattiɱ viharatū" ti.|| ||

"Gaccha Mahānāma, sattharaɱ paññāpehī" ti.|| ||

"Evaɱ bhante" ti kho Mahānāmo Sakko Bhagavato paṭissutvā yena Bharaṇḍukassa Kālāmassa assamo ten'upasankami.|| ||

Upasaŋkamitvā sattharaɱ paññā-petvā udakaɱ ṭhapetvā pādānaɱ dhovanāya yena Bhagavā ten'upasankami.|| ||

Upasaŋkamitvā Bhagavantaɱ etad avoca:|| ||

"Santhato bhante santhāro,||
udakaɱ ṭhapitaɱ pādānaɱ dhovanāya.|| ||

Yassa dāni bhante Bhagavā kālaɱ maññatī" ti.|| ||

3. Atha kho Bhagavā yena Bharaṇḍukassa Kālāmassa assamo ten'upasankami.|| ||

Upasan-kamitvā paññatte āsane nisīdi.|| ||

Nisajja kho Bhagavā pāde pakkhālesi.|| ||

Atha kho Mahānāmassa Sakkassa etad ahosi:|| ||

Akālo kho ajja Bhagavantaɱ payirupāsituɱ,||
kilanto Bhagavā,||
sve dān'āhaɱ Bhagavantaɱ payirupāsissāmīti.|| ||

Bhagavantaɱ abhivādetvā padakkhiṇaɱ katvā pakkāmi.|| ||

Atha kho Mahānāmo Sakko tassā rattiyā accayena yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Mahānāmaɱ Sakkaɱ Bhagavā etad avoca:|| ||

"Tayo ko'me Mahānāma sattāro santo savijjamānā lokasmiɱ.|| ||

Katame tayo?|| ||

Idha Mahānāma ekacco Satthā kāmānaɱ pariññaɱ paññāpeti,||
na rūpānaɱ pariññaɱ paññāpeti,||
na vedanānaɱ pariññaɱ paññāpeti.|| ||

Idha pana Mahānāma ekacco Satthā kāmānaɱ pariññaɱ paññāpeti,||
rūpānaɱ pariññaɱ paññāpeti,||
na vedanānaɱ [278] pariññaɱ paññāpeti.|| ||

Idha pana Mahānāma ekacco Satthā kāmānaɱ pariññaɱ paññāpeti,||
rūpānaɱ pariññaɱ paññāpeti,||
vedanānaɱ pariññaɱ paññāpeti.|| ||

Ime kho Mahānāma tayo Satthāro santo saŋvijj'amānā lokasmi.|| ||

Imesaɱ Mahānāma tiṇṇaɱ Satthārānaɱ ekā niṭṭhā,||
udāhu puthu niṭṭhā" ti?|| ||

5. Evaɱ vutto Bharaṇḍu Kālāmo Mahānāmaɱ Sakkaɱ etad avoca:|| ||

"'Ekā' ti Mahānāma vadehī" ti.|| ||

Evaɱ vutte Bhagavā Mahānāmaɱ Sakkaɱ etad avoca:|| ||

"'Nānā' ti Mahānāma vadehī" ti.|| ||

Dutiyam pi kho Bharaṇḍu Kālāmo Mahānāmaɱ Sakkaɱ etad avoca:|| ||

"'Ekā' ti Mahānāma vadehī" ti.|| ||

Dutiyam pi kho Bhagavā Mahānāmaɱ Sakkaɱ etad avoca:|| ||

"'Nānā' ti Mahānāma vadehī" ti.|| ||

Tatiyam pi kho Bharaṇḍu Kālāmo Mahānāmaɱ Sakkaɱ etad avoca:|| ||

"'Ekā' ti Mahānāma vadehī" ti.|| ||

Tatiyam pi kho Bhagavā Mahānāmaɱ Sakkaɱ etad avoca:|| ||

"'Nānā' ti Mahānāma vadehī" ti.|| ||

6. Atha kho Bharaṇḍussa Kālāmassa etad ahosi:|| ||

"Mahesakkhassa vat'amhi Mahānāmassa Sakkassa sammukhā samaṇena Gotamena yāva tatiyakaɱ apasādito.|| ||

Yan nūnāhaɱ Kapilavatthumhā pakkameyyan" ti.| ||

Atha kho Bharaṇḍu Kālemo Kapilavatthumhā pakkāmi,||
yaɱ Kapilavatthumhā pakkāmi,||
tathā pakkanto va ahosi na puna paccāgañchi ti.

 


Copyright Statement