Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāyo
IV. Catukka Nipāto
II. Cara Vagga

Sutta 16

Sokhumma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[17]

[1][pts][olds][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattār'imāni bhikkhave sokhummāni.|| ||

Katamāni cattāri?|| ||

Idha, bhikkhave, bhikkhu rūpa-sokhummena samannāgato hoti paramena,||
tena ca rūpa-sokhummena aññaɱ rūpa-sokhummaɱ uttaritaraɱ vā paṇītataraɱ vā na samanupassati||
tena ca rūpa-sokhummena aññaɱ rūpa-sokhummaɱ uttaritaraɱ vā paṇītataraɱ vā na pattheti.|| ||

Vedanā-sokhu- [18] mmena samannāgato hoti paramena,||
tena ca vedanā-sokhummena aññaɱ vedanā-sokhummaɱ uttaritaraɱ vā paṇītataraɱ vā na samanupassati,||
tena ca vedanā-sokhummena aññaɱ vedanā-sokhummaɱ uttaritaraɱ vā paṇītataraɱ vā na pattheti.|| ||

Saññā-sokhummena samannāgato hoti paramena,||
tena ca saññā-sokhummena aññaɱ saññā-sokhummaɱ uttaritaraɱ vā paṇītataraɱ vā na samanupassati,||
tena ca saññā-sokhummena aññaɱ saññā-sokhummaɱ uttaritaraɱ vā paṇītataraɱ vā na pattheti.|| ||

Sankhāra-sokhummena samannāgato hoti paramena,||
tena ca sankhāra sokhummena aññaɱ sankhāra-sokhummaɱ uttarītaraɱ vā paṇītataraɱ vā na samanupassati,||
tena ca sankhāra-sokhummena aññaɱ sankhāra sokhummaɱ uttarītaraɱ vā paṇītataraɱ vā na pattheti.|| ||

Imāni kho bhikkhave cattāri sokhummānī ti.|| ||

 

Rūpa-sokhummataɱ ñatvā vedanānañ ca sambhavaɱ,||
Saññā yato samudeti atthaɱ gacchati yattha ca.|| ||

Saɱkhāre parato ñatvā dukkhato no ca attato,||
Sace sammaddaso bhikkhu santo santipade rato,||
Dhāreti antimaɱ dehaɱ chetvā Māraɱ savāhinin ti.|| ||

 


Copyright Statement