Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
4. Catukka Nipāta
III. Uruvelā Vagga

Sutta 22

Dutiya Uruvelā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[22]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Ekam idāhaɱ bhikkhave samayaɱ Uravelāyaɱ viharāmi najjā Nerañjarāya tīre Ajapālanigrodhe paṭhamā-bhisambuddho.|| ||

Atha kho bhikkhave sambahulā brāhmaṇā jiṇṇā vuḍḍhā mahallakā addhagatā vayo-anuppattā yen'āhaɱ ten'upasankamiɱsu.|| ||

Upasaŋkamitvā mayā saddhiɱ sammodiɱsu.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdiɱsu.|| ||

Eka-m-antaɱ nisinnā kho bhikkhave te brāhmaṇā maɱ etad avocuɱ:|| ||

Sutaɱ ne bho Gotama:|| ||

"Na Samaṇo Gotamo brāhmaṇe jiṇṇe vuddhe mahallake addhagate vayo-anuppatte abhivādeti vā paccuṭṭheti vā āsanena vā nimanteti" ti.|| ||

Ta-y-idaɱ bho Gotama tath'eva.|| ||

Na hi bhavaɱ Gotamo brāhmaṇe jiṇṇe vuddhe mahallake addhagate vayo-anuppatte abhivādeti vā paccuṭṭheti vā āsanena vā nimanteti.|| ||

Ta-y-idaɱ bho Gotama na sampannam evāti.|| ||

3. Tassa mayhaɱ bhikkhave etad ahosi:|| ||

Na vata'me āyasmanto jānanti theraɱ vā therakaraṇe vā dhamme.|| ||

Vuddho ce pi bhikkhave hoti āsītiko vā nāvutiko vā vassa-satiko vā jātiyā.|| ||

So ca hoti akāla-vādī abhūta-vādī anattha-vādī adhamma-vādī avinaya-vādī anidhānavatiɱ vācaɱ bhāsitā akālena anapadesaɱ apariyanta-vatiɱ anattha-saɱhitaɱ.|| ||

Atha kho so bālo thero teva saŋakhaɱ gacchati.|| ||

Daharo ce pi bhikkhave hoti yuvā susu kāḷakeso bhaddena yobbanena samannāgato paṭhamena vayasā.|| ||

So ca hoti kāla-vādī bhūta-vādī attha-vādī dhamma-vādī vinaya-vādī nidhānavatiɱ vācaɱ bhāsitā kālena sāpadesaɱ pariyanta-vatiɱ attha-saɱhitaɱ.|| ||

Atha kho so paṇḍito thero teva saŋakhaɱ gacchati.|| ||

4. Cattāro'me, bhikkhave, thera-karaṇā dhammā.|| ||

Katame cattāro?|| ||

Idha, bhikkhave, bhikkhu sīlavā hoti Pātimokkha-saŋvara-saɱvuto viharati ācāra-gocara-sampanno aṇumattesu vajjesu bhaya-dassāvī samādāya sikkhati sikkhā-padesu.|| ||

Bahu-s-suto [23] hoti suta-dharo suta-sanni-cayo.|| ||

Ye te dhammā ādi-kalyāṇā||
majjhe-kalyāṇā||
pariyosāna-kalyāṇā||
sātthā savyañ janā kevala-paripuṇṇā parisuddhaɱ Brahma-cariyaɱ abhivadanti.|| ||

Tathārūp'āssa dhammā bahu-s-sutā honti dhatā vacasā paricitā manas-ā-nupekkhitā diṭiṭhiyā suppaṭi-viddhā.|| ||

Catunnaɱ jhānānaɱ ābhiceta-sikānaɱ diṭṭha-dhamma-sukha-vihārānaɱ nikāma-lābhī hoti akiccha-lābhī akasira-lābhī.|| ||

Āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe'va dhamme sayaɱ abhiññā sacchi-katvā upasampajja viharati.|| ||

Ime kho bhikkhave cattāro therakaraṇā dhammāti.|| ||

 

Yo uddhatena cittena samphañ ca bahu bhāsati,||
Asamāhita-saŋkappo asad'dhamma-rato mago,||
Ārā so thāvareyyamhā pāpadiṭṭhi anādaro.|| ||

Yo ca sīlena sampanno sutavā paṭibhānavā,||
Saññato dhiro dhammesu paññāyatthaɱ vipassati,||
Pāragū sabba-dhammānaɱ akhilo paṭibhānavā.|| ||

Pahīṇajātimaraṇo Brahma-cariyassa kevalī,||
Taɱ ahaɱ vadāmi thero ti yassa no santi āsavā,||
Āsavānaɱ khayā bhikkhu thero ti pavuccatī ti.|| ||

 


Contact:
E-mail
Copyright Statement