Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
4. Catukka Nipāta
IV. Cakka Vagga

Sutta 40

Udāyī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[43]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

2. Atha kho Udāyī brāhmaṇo yena Bhagavā ten'upasankami.|| ||

Upasaŋmitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyāɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho Udāyī brāhmaṇo Bhagavantaɱ etad avoca:|| ||

"Bhavam pi no Gotamo yaññaɱ vaṇṇetī" ti?|| ||

3. Na kho ahaɱ brāhmaṇa sabbaɱ yaññaɱ vaṇṇemi.|| ||

Na pan'āhaɱ brāhmaṇa sabbaɱ yaññaɱ na vaṇṇemi.|| ||

Yathā-rūpe ca kho brāhmaṇa yaññe gāvo haññanti,||
ajeḷakā haññanti,||
kukkuṭasūkarā haññanti,||
vividhā pāṇā saŋghātaɱ āpajjanti,||
eva-rūpaɱ kho ahaɱ brāhmaṇa sārambhaɱ yaññaɱ na vaṇṇemi.|| ||

Taɱ kissa hetu?|| ||

Eva-rūpaɱ hi brāhmaṇa sārambhaɱ yaññaɱ na upasankamanti arahanto vā arahaMaggaɱ samāpannā vā.|| ||

Yathā-rūpe ca kho brāhmaṇa yaññe n'eva gāvo haññanti,||
na ajeḷakā haññanti,||
na kukkuṭasūkarā haññanti,||
na vividhā pāṇā saŋghātaɱ āpajjanti.|| ||

Eva-rūpaɱ kho ahaɱ brāhmaṇa nirārambhaɱ yaññaɱ vaṇṇemi.|| ||

Yad idaɱ niccadānaɱ anukulayaññaɱ.|| ||

Taɱ kissa hetu?|| ||

Eva-rūpaɱ hi brāhmaṇa nirārambhaɱ yaññaɱ upasankamanti arahanto vā arahaMaggaɱ vā samāpannāti.|| ||

 

Abhisaŋkhataɱ nirārambhaɱ yaññaɱ kālena kappiyaɱ,||
[44] tādisaɱ upasaɱyanti saññatā brahma-cāriyā.|| ||

Vivattacchaddā ye loke vītivattā kālaɱ gatiɱ,||
Yaññam etaɱ pasaɱ-santi buddhā puññassa kovidā.|| ||

Yaññe vā yadi vā saddhe bhavyaɱ katvā yathārahaɱ,||
Pasannacitto yajati sukhette brahma-cārisu.|| ||

Suhutaɱ suyiṭṭhaɱ suppattaɱ dakkhiṇeyyesu yaɱ kataɱ,||
Yañño ca vipulo hoti pasīdanti ca devatā.|| ||

Evaɱ yajitvā medhāvī saddho muttena cetasā,||
Avyāpajjhaɱ sukhaɱ lokaɱ paṇḍito upapajjatī ti.|| ||

 

Cakkavaggo catuttho

 


Copyright Statement