Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
4. Catukka Nipāta
V. Rohitassa Vagga

Sutta 46

Dutiya Rohitassa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[49]

[1][pts] Evaɱ me sutaɱ:|| ||

2. Ekaɱ samayaɱ Bhagavā Sāvaṭṭhiyaɱ viharati Jetavane Anāthapiṇḍikassa ārāme.|| ||

Atha kho Bhagavā tassā rattiyā accayena bhikkhū āmantesi:|| ||

Imaɱ bhikkhave rattiɱ Rohitasso deva-putto abhikkantāya rattiyā abhikkanta-vanaṇṇo kevala-kappaɱ jevanaɱ obhāsetvā yen'āhaɱ ten'upasankami,||
upasankamitvā maɱ abhivādetvā eka-m-antaɱ aṭṭhāsi,||
eka-m-antaɱ ṭhito kho bhikkhave rohitasso deva-putto maɱ etad avoca:|| ||

"Yattha nu kho bhante na jāyati,||
na jīyati,||
na mīyyati||
na cavati,||
na uppajjati,||
sakkā nu kho bhante gamanena lokassa antaɱ ñātuɱ vā daṭṭhuɱ vā pāpuṇituɱ vā" ti?|| ||

Evaɱ vutte ahaɱ bhikkhave Rohitassaɱ deva-puttaɱ etad avocaɱ:|| ||

"Yattha kho āvuso na jāyati,||
na jīyati,||
na mīyyati,||
na cavati,||
na uppajjati||
nāhan taɱ gamanena lokassa antaɱ ñātayyaɱ daṭṭhayyaɱ pattayyan ti vadāmi."|| ||

Evaɱ vutte bhikkhave rohitasso deva-putto maɱ etad avoca:|| ||

2. "Acchariyama bhante,||
abbhūtam bhante,||
yāva su-bhāsitaɱ c'idam bhante Bhagavatā:|| ||

'Yattha kho āvuso na jāyati||
na jīyati||
na mīyyati||
na cavati||
na uppajjati,||
nāhantaɱ gamanena lokassa antaɱ ñātayyaɱ daṭṭhayyaɱ pattayyan ti vadāmī'.|| ||

Bhūta-pubbāhaɱ bhante,||
Rohitasso nāma isi ahosiɱ bhoja-putto iddhimā vehāsaŋgamo.|| ||

Tassa mayhaɱ bhante eva-rūpo javo ahosi,||
seyyathā pi nāma daḷha-dhammo dhanuggaho sikkhito katahattho katūpāsano lahukena asanena appakasirena tiriyaɱ tālacchāyaɱ atipāteyya.|| ||

Eva-rūpo pada-vītihāro ahosi,||
seyyathā pi nāma puratthimā samuddā pacchimo samuddo.|| ||

Tassa mayhaɱ bhante eva-rūpena javena samantāgatassa eva-rūpena ca padavītihārena,||
eva-rūpaɱ icchāgataɱ uppajji:|| ||

Ahaɱ gamanena lokassa antaɱ pāpuṇissāmīti.|| ||

So kho'haɱ bhante aññatr'eva asitapīta- [50] khāyitasāyitā,||
aññatr'uccāra-passāva-kammā,||
aññatra niddā-kilamatha-paṭivinodanā,||
vassa-satāyuko vassa-sata-jīvī vassa-sataɱ gantvā appatvā ca lokassa antaɱ antarā kāla-kato.|| ||

Acchariyaɱ bhante abbhūtaɱ bhante yāva su-bhāsitaɱ c'idam bhante Bhagavatā:|| ||

'Yattha kho āvuso na jāyati||
na jīyati||
na mīyyati||
na cavati||
na uppajjati,||
nāhantaɱ gamanena lokassa antaɱ ñātayyaɱ daṭṭhayyaɱ pattayyan ti vadāmī.'|| ||

Evaɱ vutte ahaɱ bhikkhave Rohitassaɱ deva-puttaɱ etad avocaɱ:|| ||

3. Yattha kho āvuso na jāyati,||
na jīyati,||
na mīyati,||
na cavati,||
na uppajjati,||
nāhantaɱ gamanena lokassa antaɱ ñātayyaɱ daṭṭhayyaɱ pattayyan ti vadāmi,||
na c'āhaɱ āvuso appatvā va lokassa antaɱ dukkhassa antakiriyaɱ vadāmi.|| ||

Api c'āhaɱ āvuso imasmiɱ yeva byāmatte kalebare saññimhi samanake lokañ ca paññā-pemi||
loka-samudayañ ca||
loka-nirodhañ ca||
loka-nirodha-gāminiñ ca paṭipadanti.|| ||

Gamanena na pattabbo lokass'anto kudācanaɱ,||
Na ca appatvā lokantaɱ dukkhā atthi pamocanaɱ.|| ||

Tasmā have loka-vidū sumedho lokantagū vusita brahma-cariyo,||
Lokassa antaɱ samitāvī ñatvā nāsiɱsatī lokam imaɱ parañ cā tī.|| ||

 


Copyright Statement