Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
4. Catukka Nipāta
V. Rohitassa Vagga

Sutta 47

Suvidūra-Vidūra Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[50]

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattār'imāni bhikkhave suvidūra-vidūrāni.|| ||

Katamāni cattāri?|| ||

Nabhaɱ ca bhikkhave||
paṭhavī ca,||
idaɱ paṭhamaɱ suvidūra-vidūre.|| ||

Orimañ ca bhikkhave tīraɱ||
samuddassa pārimañ ca tīraɱ,||
idaɱ dutiyaɱ suvidūra-vidūre.|| ||

Yato ca bhikkhave verocano abbhūdeti,||
yattha ca attham eti,||
idaɱ tatiyaɱ suvidūra-vidūre.|| ||

Satañ ca bhikkhave dhammo||
asatañ ca dhammo,||
idaɱ catutthaɱ suvidūra-vidūre.|| ||

Imāni kho bhikkhave cattāri suvidūravidūrānīti.|| ||

[51] Nabhaɱ ca dūre paṭhavī ca dūre pāraɱ samuddassa tadāhu dūre,||
Yato ca verocano abbhūdeti pabhaŋkaro yattha ca attham eti.|| ||

Tato have dūrataraɱ vadanti satañ ca dhammaɱ asatañ ca dhammaɱ,||
Avyāyiko hoti sataɱ samāgamo yāvam pi tiṭṭheyya tath'eva hoti,||
Khippaɱ hi veti asataɱ samāgamo tasmā sataɱ dhammo asabbhi ārakāti.|| ||

 


Copyright Statement