Aŋguttara Nikāya
4. Catukka Nipāta
V. Rohitassa Vagga

Sutta 50

Upakkilesa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[53]

[1][pts][than] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattāro'me bhikkhave candima-suriyānaɱ upakkilesā||
yehi upakkilesehi upakkiliṭṭhā candima-suriyā||
na tapanati||
na bhāsanti||
na virocanti.|| ||

Katame cattāro?|| ||

Abbhā bhikkhave candima-suriyānaɱ upakkileso||
yena upakkilesena upakkiliṭṭhā candima-suriyā||
na tapanti||
na bhāsanti||
na virocanti.|| ||

Mahiyā bhikkhave candima-suriyānaɱ upakkileso||
yena upakkilesena upakkiliṭṭhā candima-suriyā||
na tapanti||
na bhāsanti||
na virocanti.|| ||

Dhūmarajo bhikkhave candima-suriyānaɱ upakkileso||
yena upakkilesena upakkiliṭṭhā candima-suriyā||
na tapanti||
na bhāsanti||
na virocanti.|| ||

Rāhu bhikkhave asurindo candima-suriyānaɱ upakkileso||
yena upakkilesena upakkiliṭṭhā candima-suriyā||
na tapanti||
na bhāsanti||
na virocanti.|| ||

Ime kho bhikkhave cattāro candima-suriyānaɱ upakkilesā||
yehi upakkilesehi upakkiliṭṭhā candima-suriyā||
na tapanti||
na bhāsanti||
na virocanti.|| ||

■

[2][pts][than] Evam eva kho bhikkhave cattāro samaṇa-brāhmaṇānaɱ upakkilesā||
yehi upakkilesehi upakkiliṭṭhā eke samaṇa-brāhmaṇā||
na tapanti||
na bhāsanti||
na virocanti.|| ||

Katame cattāro?|| ||

Santi, bhikkhave, eke samaṇa-brāhmaṇā suraɱ pivanti merayaɱ,||
surā-merayapānā appaṭiviratā.|| ||

Ayaɱ bhikkhave paṭhamo samaṇa-brāhmaṇānaɱ upakkileso||
yena upakkilesena upakkiliṭṭhā eke samaṇa-brāhmaṇā||
na tapanti||
na bhāsanti||
na virocanti.|| ||

Santi, bhikkhave, eke samaṇa-brāhmaṇā methunaɱ dhammaɱ patisevanti||
methunasmā dhammā appaṭiviratā.|| ||

Ayaɱ bhikkhave dutiyo samaṇa-brāhmaṇānaɱ upakkileso||
yena upakkilesena upakkiliṭṭhā eke samaṇa-brāhmaṇā||
na tapanti||
na bhāsanti||
na virocanti.|| ||

Santi, bhikkhave, eke samaṇa-brāhmaṇā jāta-rūpara-jataɱ sādiyanti||
jāta-rūpa-rajata-paṭi-g-gahaṇā appaṭiviratā.|| ||

Ayaɱ bhikkhave tatiyo samaṇa-brāhmaṇānaɱ upakkileso||
yena upakkilesena upakkiliṭṭhā eke samaṇa-brāhmaṇā||
na tapanti||
na bhāsanti||
na virocanti.|| ||

Santi, bhikkhave, eke samaṇa-brāhmaṇā micchā ājīvena||
jīvanti micchājīvā appaṭiviratā.|| ||

Ayaɱ bhikkhave catuttho samaṇa-brāhmaṇānaɱ upakkileso||
yena upakkilesena upakkiliṭṭhā eke samaṇa-brāhmaṇā||
na tapanti||
na bhāsanti||
na virocanti.|| ||

Ime kho bhikkhave cattāro samaṇa-brāhmaṇānaɱ upakkilesā||
[54] yehi upakkilesehi upakkiliṭṭhā eke samaṇa-brāhmaṇā||
na tapanti||
na bhāsanti||
na virocantī ti.|| ||

Rāga-dosa-parikkiṭṭhā eke samaṇa-brāhmaṇā,||
Avijjānivutā posā piya-rūpābhinandino.|| ||

Suraɱ pivanti merayaɱ paṭisevanti methunaɱ,||
Rajataɱ jāta-rūpañ ca sādiyanti aviddasu.|| ||

Micchājīvena jīvanti eke samaṇa-brāhmaṇā,||
Ete upakkilesā vuttā buddhenādiccabandhunā.|| ||

Ye hi upakkiliṭṭhā eke samaṇa-brāhmaṇā,||
Na tapanti na bhāsanti asuddhā sarajā pabhā.|| ||

Andhakārena onaddhā taṇhādāsā sanettikā,||
Vaḍḍhenti kaṭasiɱ ghoraɱ ādiyanti punabbhavan ti.|| ||