Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
4. Catukka Nipāta
VI. Puññābhisanda Vagga

Sutta 54

Dutiya Saɱvāsa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Cattāro'me bhikkhave saɱvāsā.|| ||

Katame cattāro?|| ||

Chavo chavāya saddhiɱ saɱvasati,||
chavo deviyā saddhiɱ saɱvasati,||
devo chavāya saddhiɱ saɱvasati,||
devo deviyā saddhiɱ saɱvasati.|| ||

3. Kathañ ca bhikkhave chavo chavāya saddhiɱ saɱvasati?|| ||

Idha bhikkhave sāmiko hoti pāṇāti-pātī,||
adinn'ādāyī,||
kāmesu micchā-cārī,||
musā-vādī,||
pisunā-vāco,||
pharusā-vāco,||
sampapphalāpī,||
abhijjhālu,||
vyāpanna-citto,||
micchā-diṭṭhiko,||
dussīlo pāpa-dhammo,||
macchera-mala-pariyuṭṭhitena cetasā agāraɱ ajjhāvasati,||
akkosaka-paribhāsako samaṇa-brāhmaṇānaɱ,||
bhariyā pi'ssa hoti pāṇāti-pātinī,||
adinn'ādāyinī,||
kāmesu micchā-cārinī,||
musā-vādinī,||
pisunā-vāco,||
pharusā-vāco,||
sampapphalāpī,||
abhijjhālu,||
vyāpanna-citto,||
micchā-diṭṭhiko,||
dussīlā pāpa-dhammā,||
macchera-mala-pariyuṭṭhitena cetasā agāraɱ ajjhāvasati,||
akkosikaparibhāsikā samaṇa-brāhmaṇānaɱ.|| ||

Evaɱ kho bhikkhave chavo chavāya saddhiɱ saɱvasati.|| ||

Kathañ ca bhikkhave chavo deviyā saddhiɱ saɱvasati?|| ||

Idha bhikkhave sāmiko hoti pāṇāti-pātī,||
adinn'ādāyī,||
kāmesu micchā-cārī,||
musā-vādī,||
pisunā-vāco,||
pharusā-vāco,||
sampapphalāpī,||
abhijjhālu,||
vyāpanna-citto,||
micchā-diṭṭhiko,||
dussīlo pāpa-dhammo,||
macchera-mala-pariyuṭṭhitena cetasā agāraɱ ajjhāvasati,||
akkosaka-paribhāsako samaṇa-brāhmaṇānaɱ,||
bhariyā ca khvassa hoti pāṇāti-pātā paṭiviratā||
adinn'ādānā paṭiviratā||
kāmesu micchā-cārā paṭiviratā||
musā-vādā paṭiviratā||
pisunā-vācā paṭivirato,||
pharusā-vācā paṭivirato,||
samphappalāpā paṭivirato,||
anabhijjhālu,||
avyāpanna-citto,||
sammā-diṭṭhiko,||
sīla-vatī kalyāṇa-dhammā,||
vigata-mala-maccherena cetasā āgāraɱ ajjhāvasati,||
anakkosikaparibhāsikā samaṇa-brāhmaṇānaɱ.|| ||

Evaɱ kho bhikkhave chavo deviyā saddhiɱ saɱvasati.|| ||

Kathañ ca bhikkhave devo chavāya saddhiɱ saɱvasati?|| ||

Idha bhikkhave sāmiko hoti pāṇāti-pātā paṭivirato,||
adinn'ādānā paṭivirato,||
kāmesu micchā-cārā paṭivirato,||
musā-vādā paṭivirato,||
pisunā-vācā paṭivirato,||
pharusā-vācā paṭivirato,||
samphappalāpā paṭivirato,||
anabhijjhālu,||
avyāpanna-citto,||
sammā-diṭṭhiko,||
sīlavā kalyāṇa-dhammo,||
vigata-mala-maccherena cetasā agāraɱ ajjhāvasati,||
anakkosaka-paribhāsako samaṇa-brāhmaṇānaɱ,||
bhariyā ca khvassa hoti pāṇāti-pātinī,||
adinn'ādāyinī,||
kāmesu micchā-cārinī,||
musā-vādinī,||
pisunā-vāco,||
pharusā-vāco,||
sampapphalāpī,||
abhijjhālu,||
vyāpanna-citto,||
micchā-diṭṭhiko,||
dussīlā pāpa-dhammā,||
macchera-mala-pariyuṭṭhitena cetasā agāraɱ ajjhāvasati,||
akkosikaparibhāsikā samaṇa-brāhmaṇānaɱ.|| ||

Evaɱ kho bhikkhave devo chavāya saddhiɱ saɱvasati.|| ||

Kathañ ca bhikkhave devo deviyā saddhiɱ saɱvasati?|| ||

Idha bhikkhave sāmiko hoti pāṇāti-pātā paṭivirato,||
adinn'ādānā paṭivirato,||
kāmesu micchā-cārā paṭivirato,||
musā-vādā paṭivirato,||
pisunā-vācā paṭivirato,||
pharusā-vācā paṭivirato,||
samphappalāpā paṭivirato,||
anabhijjhālu,||
avyāpanna-citto,||
sammā-diṭṭhiko,||
sīlavā kalyāṇa-dhammo,||
vigata-mala-maccherena cetasā agāraɱ ajjhāvasati,||
anakkosaka-paribhāsako samaṇa-brāhmaṇānaɱ,||
bhariyāpi'ssa hoti pāṇāti-pātā paṭiviratā,||
adinn'ādānā paṭiviratā,||
kāmesu micchā-cārā paṭiviratā,||
musā-vādā paṭiviratā,||
pisunā-vācā paṭivirato,||
pharusā-vācā paṭivirato,||
samphappalāpā paṭivirato,||
anabhijjhālu,||
avyāpanna-citto,||
sammā-diṭṭhiko,||
sīla-vatī kalyāṇa-dhammā,||
vigata-mala-maccherena cetasā agāraɱ ajjhāvasati,||
anakkosikaparibhāsikā samaṇa-brāhmaṇānaɱ.|| ||

Evaɱ kho bhikkhave devo deviyā saddhiɱ saɱvasati.|| ||

[59] Ime kho bhikkhave cattāro saɱvāsāti.|| ||

Ubho ca honti dussīlā kadariyā paribhāsakā,||
Te honti jānipatayo chavā saɱvāsamāgatā.|| ||

Sāmiko dussīlo hoti kadariyo paribhāsako,||
Bhariyā sīla-vatī hoti vadaññū vītamaccharā;||
Sā pi devī saɱvasati chavena patinā saha.|| ||

Sāmiko sīlavā hoti vadaññū vītamaccharo,||
Bhariyā'ssa hoti dussīlā kadariyā paribhāsikā;||
Sā pi chavā saɱvasati devena patinā saha.|| ||

Ubho saddhā vadaññū ca saññatā dhammajīvino,||
Te honti jānipatayo añña-maññaɱ piyaɱvadā.|| ||

Atthā sampacurā honti vāsatthaɱ upajāyati,||
Amittā dummanā honti ubhinnaɱ samasīlinaɱ.|| ||

Idha dhammaɱ caritvāna samasīlabbatā ubho,||
Nandino deva-lokasmiɱ modanti kāma-kāmino ti.|| ||

 


Copyright Statement