Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāyo
Catukka Nipāto
IX: M-acala Vagga

Sutta 87

Samaṇa-m-acala-Putta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[86]

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Cattāro'me bhikkhave puggalā santo saŋvijj'amānā lokasmiɱ.|| ||

Katame cattāro?|| ||

Samaṇa-m-acalo,||
samaṇapuṇḍarīko,||
samaṇapadumo,||
samaṇesu samaṇa-sukhu-mālo.|| ||

3. Kathañ ca bhikkhave puggalo samaṇa-m-acalo hoti?|| ||

Idha, bhikkhave, bhikkhu sekho hoti paṭipado anuttaraɱ yoga-k-khemaɱ patthayamāno viharati.|| ||

Seyyathā pi, bhik- [87] khave,rañño khattiyassa muddhā-vasittassa jeṭṭho putto ābhiseko anabhisitto-m-acalapatto.|| ||

Evam eva kho, bhikkhave, bhikkhu sekho hoti paṭipado anuttaraɱ yoga-k-khemaɱ patthayamāno viharati.|| ||

Evaɱ kho bhikkhave puggalo samaṇa-m-acalo hoti.|| ||

4. Kathañ ca bhikkhave puggalo samaṇapuṇḍarīko hoti?|| ||

Idha, bhikkhave, bhikkhu āsavānaɱ khayā anāsavaɱ ceto-vimuttaɱ paññā-vimuttiɱ diṭṭhe'va dhamme sayaɱ abhiññā sacchi-katvā upasampajja viharati.|| ||

No ca kho aṭṭha vimokkhe kāyena phassitvā viharati.|| ||

Evaɱ kho bhikkhave puggalo samaṇapuṇḍarīko hoti.|| ||

5. Kathañ ca bhikkhave puggalo samaṇapadumo hoti?|| ||

Idha, bhikkhave, bhikkhu āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe'va dhamme sayaɱ abhiññā sacchi-katvā upasampajja viharati.|| ||

Aṭṭha ca vimokkhe kāyena phassitvā viharati.|| ||

Evaɱ kho bhikkhave puggalo samaṇapadumo hoti.|| ||

6. Kathañ ca bhikkhave puggalo samaṇesu samaṇa-sukhu-mālo hoti?|| ||

Idha, bhikkhave, bhikkhu yācito va bahulaɱ cīvaraɱ paribhuñjati,||
appaɱ ayācito.|| ||

Yācito va bahulaɱ piṇḍa-pātaɱ paribhuñjati,||
appaɱ ayācito.|| ||

Yācito va bahulaɱ sen'āsanaɱ paribhuñjati,||
appaɱ ayācito.|| ||

Yācito va bahulaɱ gilāna-paccaya-bhesajja-parikkhāraɱ paribhuñjati,||
appaɱ ayācito.|| ||

Ye hi kho pana sabrahma-cārīhi saddhiɱ viharati,||
tyāssa manāpen'eva bahulaɱ kāya-kammena samud'ācaranti,||
appaɱ amanāpena.|| ||

Manāpen'eva bahulaɱ vacī-kammena samud'ācaranti,||
appaɱ amanāpena.|| ||

Manāpen'eva bahulaɱ mano-kammena samud'ācaranti,||
appaɱ amanāpena.|| ||

Manāpaɱ yeva bahulaɱ upahāraɱ upaharanti,||
appaɱ amanāpaɱ.|| ||

Yāni kho pana tāni vedayitāni pittasamūṭ-ṭhānāni vā||
semhasamūṭ-ṭhānāni vā||
vātasamūṭ-ṭhānāni vā||
sanni-pātikāni vā||
utuparināmajāni vā||
visama parihārajāni vā||
opakka-mikāni vā||
kamma-vipāka-jāni vā,||
tān'assa na bahud eva uppajjanti||
appābādho hoti.|| ||

Catunnaɱ jhānānaɱ ābhiceta-sikānaɱ diṭṭha-dhamma-sukha-vihārānaɱ nikāma-lābhī hoti akiccha-lābhī akasira-lābhī.|| ||

Āsavānaɱ khayā anāsavaɱ ceto-vimut- [88] tiɱ paññā-vimuttiɱ diṭṭhe'va dhamme sayaɱ abhiññā sacchi-katvā upasampajja viharati.|| ||

Evaɱ kho bhikkhave puggalo samaṇesu samaṇa-sukhu-mālo hoti.|| ||

7. Yaɱ hi taɱ bhikkhave sammā vadamāno vadeyya||
'samaṇesu samaṇa-sukhu-mālo' ti||
mam eva taɱ bhikkhave sammā vadamāno vadeyya||
'samaṇesu samaṇa-sukhu-mālo' ti.|| ||

Ahaɱ hi bhikkhave yācito va bahulaɱ cīvaraɱ paribhuñjāmi,||
appaɱ ayācito.|| ||

Yācito va bahulaɱ piṇḍa-pātaɱ paribhuñjāmi,||
appaɱ ayācito.|| ||

Yācito va bahulaɱ sen'āsanaɱ paribhuñjāmi,||
appaɱ ayācito.|| ||

Yācito va bahulaɱ gilāna-paccaya-bhesajja-parikkhāraɱ paribhuñjāmi,||
appaɱ ayācito.|| ||

Ye hi kho pana bhikkhūhi saddhi viharāmi,||
te maɱ manāpen'eva bahulaɱ kāya-kammena samūdācaranti,||
appaɱ amanāpena.|| ||

Manāpen'eva bahulaɱ vacī-kammena samūdācaranti,||
appaɱ amanāpena.|| ||

Manāpen'eva bahulaɱ mano-kammena samūdācaranti,||
appaɱ amanāpena.|| ||

Manāpaɱ yeva bahulaɱ upahāraɱ upaharanti,||
appaɱ amanāpaɱ.|| ||

Yāni pana tāni vedayitāni pittasamūṭ-ṭhānāni vā||
semhasamūṭ-ṭhānāni vā||
vātasamūṭ-ṭhānāni vā||
sanni-pātikāni vā||
utuparināmajāni vā||
visama-parihāra-jāni vā||
opakka-mikāni vā||
kamma-vipāka-jāni vā,||
tāni me na bahu-d-eva uppajjanti appābādhohamasmi.|| ||

Catunnaɱ kho pana jhānānaɱ ābhiceta-sikānaɱ diṭṭha-dhamma-sukha-vihārānaɱ nikāma-lābhī akiccha-lābhī akasira-lābhī.|| ||

Āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe'va dhamme sayaɱ abhiññā sacchi-katvā upasampajja viharāmi.|| ||

Yaɱ hi taɱ bhikkhave sammā vadamāno vadeyya||
'samaṇesu samaṇa-sukhu-mālo' ti||
mam eva taɱ bhikkhave sammā vadamāno vadeyya||
'samaṇesu samaṇa-sukhu-mālo' ti.|| ||

Ime kho bhikkhave cattāro puggalā santo saŋvijj'amānā lokasmin ti.|| ||

 


Contact:
E-mail
Copyright Statement