Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
XIII: Bhaya Vagga

Sutta 122

Udakoroha-Bhaya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[121]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Cattār'imāni bhikkhave bhayāni udakorohantassa pāṭikaŋkhitabbāni.|| ||

Katamāni cattāri?|| ||

Umi-bhayaɱ,||
kumbhīla-bhayaɱ,||
āvaṭṭa-bhayaɱ,||
susukā-bhayaɱ.|| ||

Imāni kho bhikkhave cattāri bhayāni udakorohantassa pāṭikaŋkhitabbāni.|| ||

3. Evam eva kho bhikkhave idh'ekacce kula-putte imasmiɱ Dhamma-Vinaye saddhā agārasmā anagāriyaɱ pabba-jite cattāri bhayāni pāṭikaŋkhitabbāni.|| ||

Katamāni cattāri?|| ||

Umi-bhayaɱ,||
kumbhīla-bhayaɱ,||
āvaṭṭa-bhayaɱ,||
susukā-bhayaɱ.|| ||

4. Katamañ ca bhikkhave umi-bhayaɱ?|| ||

Idha, bhikkhave, ekacco kula-putto saddhā agārasmā anagāriyaɱ pabba-jito hoti:|| ||

'Otiṇṇo'mhi jātiyā jarāya,||
maraṇena,||
sokehi paridevehi dukkhehi domanassehi upāyāsehi,||
dukkhotiṇṇo dukkha-pareto,||
app'eva nāma imassa kevalassa dukkha-k-khandhassa antakiriyā paññāyethā' ti.|| ||

Tam enaɱ tathā pabba-jitaɱ samānaɱ sabrahma-cārī ovadanti anusasanti:|| ||

'Evaɱ te abhi-k-kamitabbaɱ.|| ||

Evaɱ te paṭikkamitabbaɱ.|| ||

Evaɱ te [124] āloketabbaɱ.|| ||

Evaɱ te viloketabbaɱ.|| ||

Evaɱ te sammiñjitabbaɱ.|| ||

Evaɱ te pasāritabbaɱ.|| ||

Evaɱ te sanghāṭipatta-cīvaraɱ dhāretabban' ti.|| ||

Tass'evaɱ hoti:|| ||

'Mayaɱ kho pubbe agāriya-bhutā samānā aññe ovadāma pi anusāsāma pi.|| ||

Ime pan'amhākaɱ puttamattā maññe,||
nattamattā maññe,||
ovaditabbaɱ anusāsitabbaɱ maññantī' ti.|| ||

So kupito anatta-mano sikkhaɱ pacca-k-khāya hīnāyāvattati.|| ||

Ayaɱ vuccati bhikkhave bhikkhu umi-bhayassa bhīto sikkhaɱ pacca-k-khāya hīnāyāvatto.|| ||

'Umi-bhayan' ti kho bhikkhave kodhupāyāsassetaɱ adhivacanaɱ.|| ||

Idaɱ vuccati bhikkhave umi-bhayaɱ.|| ||

5. Katamañ ca bhikkhave kumbhīla-bhayaɱ?|| ||

Idha bhikkhave ekacco kula-putto saddhā agārasmā anagāriyaɱ pabba-jito hoti:|| ||

'Otiṇṇo'mhi jātiyā jarāya,||
maraṇena,||
sokehi paridevehi dukkhehi domanassehi upāyāsehi,||
dukkhotiṇṇo dukkha-pareto,||
app'eva nāma imassa kevalassa dukkha-k-khandhassa antakiriyā paññāyethā' ti.|| ||

Tam enaɱ tathā pabba-jitaɱ samānaɱ sabrahma-cārī ovadanti anusāsanti:|| ||

'Idaɱ te khāditabbaɱ,||
idaɱ te na khāditabbaɱ,||
idaɱ te bhuñjitabbaɱ,||
idaɱ te na bhuñjitabbaɱ,||
idaɱ te sāyitabbaɱ,||
idaɱ te na sāyitabbaɱ,||
idaɱ te pātabbaɱ,||
idaɱ te na pātabbaɱ.|| ||

Kappiyaɱ te khāditabbaɱ,||
akappiyaɱ te na khāditabbaɱ,||
kappiyaɱ te bhuñjitabbaɱ,||
akappiyaɱ te na bhuñjitabbaɱ,||
kappiyaɱ te sāyitabbaɱ,||
akappiyaɱ te na sāyitabbaɱ,||
kappiyaɱ te pātabbaɱ,||
akappiyaɱ te na pātabbaɱ.|| ||

Kāle te pātabbaɱ,||
vikāle te na pātabbaɱ,||
kāle te khāditabbaɱ||
vikāle te na khāditabbaɱ,||
kāle te bhuñjitabbaɱ,||
vikāle te na bhuñjitabbaɱ,||
kāle te sāyitabbaɱ||
vikāle na sāyitabbaɱ,||
kāle te pātabbam||
vikāle te na pātabban' ti.|| ||

Tass'evaɱ hoti:|| ||

'Mayaɱ kho pubbe agāriya-bhutā samānā||
yaɱ icchāma taɱ khādāma,||
yaɱ na icchāma na taɱ khādāma,||
yaɱ icchāma taɱ bhuñjāma,||
yaɱ na icchāma taɱ na bhuñjāma,||
yaɱ icchāma taɱ sāyāma||
yaɱ na icchāma na taɱ sāyāma,||
yaɱ icchāma taɱ pibāma,||
yaɱ na icchāma taɱ na pibāma.|| ||

Kappiyam pi khādāma,||
akappiyam pi khādāma,||
kappiyam pi bhuñjāma,||
akappiyam pi bhuñjāma,||
kappiyam pi sāyāma,||
akappiyam pi sāyāma,||
kappiyam pi pibāma,||
akappiyam pi pibāma.|| ||

Kāle pi khādāma,||
vikāle pi khādāma,||
kāle pi bhuñjāma,||
vikāle pi bhuñjāma,||
kāle pi sāyāma,||
vikāle pi sāyāma,||
kāle pi [125] pibāma,||
vikāle pi pibāma.|| ||

Yam pi no saddhā gahapatikā divā vikāle paṇītaɱ khādanīyaɱ vā bhojanīyaɱ vā denti,||
tatrā pi'me mukhāvaraṇaɱ maññe karontī' ti.|| ||

So kupito anatta-mano sikkhaɱ pacca-k-khāya hīnāyāvattati.|| ||

Ayaɱ vuccati bhikkhave bhikkhu kumbhīla-bhayassa bhīto sikkhaɱ pacca-k-khāya hīnāyāvatto.|| ||

'Kumbhīla-bhayan' ti kho bhikkhave odarikattass'etaɱ adhivacanaɱ.|| ||

Idaɱ vuccati bhikkhave kumbhīla-bhayaɱ.|| ||

6. Katamañ ca bhikkhave āvaṭṭa-bhayaɱ?|| ||

Idha, bhikkhave, ekacco kula-putto saddhā agārasmā anagāriyaɱ pabba-jito hoti:|| ||

'Otiṇṇo'mhi jātiyā jarāya,||
maraṇena,||
sokehi paridevehi dukkhehi domanassehi upāyāsehi,||
dukkhotiṇṇo dukkha-pareto,||
app'eva nāma imassa kevalassa dukkha-k-khandhassa antakiriyā paññāyethā' ti.|| ||

So evaɱ pabba-jito samāno pubbaŋha-samayaɱ nivāsetvā patta-cīvaraɱ ādāya gāmaɱ vā nigamaɱ vā piṇḍāya pavisati arakkhiten'eva kāyena arakkhitāya vācāya arakkhitena cittena anupaṭṭhitāya satiyā asaɱvutehi indriyehi.|| ||

So tattha passati gahapatiɱ vā gahapati-puttaɱ vā pañcahi kāma-guṇehi samappitaɱ samaŋgi-bhūtaɱ paricāraya-mānaɱ.|| ||

Tass'evaɱ hoti:|| ||

'Mayaɱ kho pubbe agāriya-bhutā samānā pañcahi kāma-guṇehi samappitā samaŋgi-bhutā paricārimha.|| ||

Saŋvijjante kho pana me kule bhogā,||
sakkā bhoge ca bhuñjituɱ puññāni ca kātuɱ.|| ||

Yan nūnāhaɱ sikkhaɱ pacca-k-khāya hīnā-yāvattitvā bhoge ca bhuñjeyyaɱ puññāni ca kareyyan' ti.|| ||

So sikkhaɱ pacca-k-khāya hīnāyāvattati.|| ||

Ayaɱ vuccati bhikkhave bhikkhu āvaṭṭa-bhayassa bhīto sikkhaɱ pacca-k-khāya hīnāyāvatto.|| ||

'Āvaṭṭa-bhayan' ti kho bhikkhave pañcann'etaɱ kāma-guṇānaɱ adhivacanaɱ.|| ||

Idaɱ vuccati bhikkhave āvaṭṭa-bhayaɱ.|| ||

7. Katamañ ca bhikkhave susukā-bhayaɱ?|| ||

Idha, bhikkhave, ekacco kula-putto saddhā agārasmā anagāriyaɱ pabba-jito hoti:|| ||

'Otiṇṇo'mhi jātiyā jarāya,||
maraṇena,||
sokehi paridevehi dukkhehi domanassehi upāyāsehi,||
dukkhotiṇṇo dukkha-pareto,||
app'eva nāma imassa kevalassa dukkha-k-khandhassa antakiriyā paññāyethā' ti.|| ||

So evaɱ pabba-jito samāno pubbaŋha-samayaɱ nivāsetvā patta-cīvaraɱ ādāya gāmaɱ vā nigamaɱ vā piṇḍāya [126] pavisati arakkhiten'eva kāyena arakkhitāya vācāya arakkhitena cittena anupaṭṭhitāya satiyā asaɱvutehi indriyehi.|| ||

So tattha passati mātu-gāmaɱ dunnivatthaɱ vā duppārutaɱ vā.|| ||

Tassa mātu-gāmaɱ disvā dunnivatthaɱ vā duppārutaɱ vā rāgo cittaɱ anuddhaɱseti.|| ||

So rāgānuddhaɱsena cittena sikkhaɱ pacca-k-khāya hīnāyāvattati.|| ||

Ayaɱ vuccati bhikkhave bhikkhu susukā-bhayassa bhīto sikkhaɱ pacca-k-khāya hīnāyāvatto.|| ||

'Susukābhayan' ti kho bhikkhave mātu-gāmassetaɱ adhivacanaɱ.|| ||

Idaɱ vuccati bhikkhave susukā-bhayaɱ.|| ||

Imāni kho bhikkhave cattāri bhayāni idh'ekacce kula-putte imasmiɱ Dhamma-Vinaye saddhā agārasmā anagāriyaɱ pabba-jite pāṭikaŋkhitabbānī" ti.|| ||

 


Contact:
E-mail
Copyright Statement