Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
XIV: Puggala Vagga

Sutta 131

Saŋyojana Puggala Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[133]

[1][pts][than][olds] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattāro'me bhikkhave puggalā santo saŋvijj'amānā lokasmiɱ.|| ||

Katame cattāro?|| ||

Idha, bhikkhave, ekaccassa puggalassa||
ora-m-bhāgiyāni saŋyojanāni appahīṇāni honti||
upapatti-paṭilābhiyāni saŋyojanāni appahīṇāni honti||
bhava-paṭilābhiyāni saŋyojanāni appahīṇāni honti.|| ||

[134] Idha pana bhikkhave ekaccassa puggalassa||
ora-m-bhāgiyāni saŋyojanāni pahīṇāni honti,||
upapatti-paṭilābhiyāni saŋyojanāni appahīṇāni honti||
bhava-paṭilābhiyāni saŋyojanāni appahīṇāni honti.|| ||

Idha pana bhikkhave ekaccassa puggalassa||
ora-m-bhāgiyāni saŋyojanāni pahīṇāni honti,||
upapatti-paṭilābhiyāni saŋyojanāni pahīṇāni honti||
bhava-paṭilābhiyāni saŋyojanāni appahīṇāni honti.|| ||

Idha pana bhikkhave ekaccassa puggalassa||
ora-m-bhāgiyāni saŋyojanāni pahīṇāni honti,||
upapatti-paṭilābhiyāni saŋyojanāni pahīṇāni honti||
bhava-paṭilābhiyāni saŋyojanāni pahīṇāni honti.|| ||

 


 

Katamassa bhikkhave puggalassa||
ora-m-bhāgiyāni saŋyojanāni appahīṇāni,||
upapattipaṭalābhiyāni saŋyojanāni appahīṇāni,||
bhava-paṭilābhiyāni saŋyojanāni appahīṇānā?|| ||

Sakad-āgāmissa.|| ||

Imassa kho bhikkhave puggalassa||
ora-m-bhāgiyāni saŋyojanāni appahīṇāni||
upapatti-paṭilābhiyāni saŋyojanāni appahīṇāni||
bhava-paṭilābhiyāni saŋyojanāni appahīṇāni.|| ||

 

§

 

Katamassa bhikkhave puggalassa||
ora-m-bhāgiyāni saŋyojanāni pahīṇāti,||
upapatti-paṭilābhiyāni saŋyojanāni appahīṇāni,||
bhava-paṭilābhiyāni saŋyojanāni appahīṇāni?|| ||

Uddhaɱ-sotassa Akaniṭṭha-gāmino.|| ||

Imassa kho bhikkhave puggalassa||
ora-m-bhāgiyāni saŋyojanāni pahīṇāni||
upapatti-paṭilābhiyāni saŋyojanāni appahīṇāni,||
bhava-paṭilābhiyāni saŋyojanāni appahīṇāni.|| ||

 

§

 

Katamassa bhikkhave puggalassa||
ora-m-bhāgiyāni saŋyojanāni pahīṇāni,||
upapatti-paṭilābhiyāni saŋyojanāni pahīṇāni,||
bhava-paṭilābhiyāni saŋyojanāni appahīṇāni?|| ||

Antarā-parinibbāyissa.|| ||

Imassa kho bhikkhave puggalasasa||
ora-m-bhāgiyāni saŋyojanāni pahīṇāni||
upapatti-paṭilābhiyāni saŋyojanāni pahīṇāni,||
bhava-paṭilābhiyāni saŋyojanāni appahīṇāni.|| ||

 

§

 

Katamassa bhikkhave puggalassa||
ora-m-bhāgiyāni saŋyojanāni pahīṇāni,||
upapatti-paṭilābhiyāni saŋyojanāni pahīṇāni,||
bhava-paṭilābhiyāni saŋyojanāni pahīṇāni?|| ||

Arahato.|| ||

Imassa kho bhikkhave puggalassa||
ora-m-bhāgiyāni saŋyojanāni pahīṇāni||
upapatti-paṭilābhiyāni saŋyojanāni pahīṇāni,||
bhava-paṭilābhiyāni saŋyojanāni pahīṇāni.|| ||

Ime kho bhikkhave cattāro puggalā santo saŋvijj'amānā lokasmin ti.|| ||

 


Contact:
E-mail
Copyright Statement