Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
XVI: Indriya Vagga

Sutta 157

Roga Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[142]

[1][pts] Dveme bhikkhave rogā.|| ||

Katame dve?|| ||

[143] Kāyiko ca rogo,||
cetasiko ca rogo.|| ||

Dissanti bhikkhave sattā kāyikena rogena ekam pi vassaɱ ārogyaɱ paṭijānamānā,||
dve pi vassāni ārogyaɱ paṭijānamānā,||
tīṇi pi vassāni ārogyaɱ paṭijānamānā,||
cattāri pi vassāni ārogyaɱ paṭijānamānā,||
pañca pi vassāni ārogyaɱ paṭijānamānā,||
dasa pi vassāni ārogyaɱ paṭijānamānā,||
vīsatim pi vassāni ārogyaɱ paṭijānamānā,||
tiɱsam pi vassāni ārogyaɱ paṭijānamānā,||
cattārīsam pi vassāni ārogyaɱ paṭijānamānā,||
paññāsam pi vassāni ārogyaɱ paṭijānamānā,||
vassa-satam pi ārogyaɱ paṭijānamānā.|| ||

Te bhikkhave sattā dullabhā||
lokasmiɱ ye cetasikena rogena muhuttam pi ārogyaɱ paṭijānanti,||
aññatra khīṇ'āsavehi.|| ||

 

§

 

2. Cattāro'me bhikkhave pabba-jitassa rogā.|| ||

Katame cattāro?|| ||

Idha, bhikkhave, bhikkhu mahiccho hoti
vighātavā
asantuṭṭho
itar'ītara-cīvara-piṇḍa-pāta-sen'āsana-gilāna-paccaya-bhesajja-parikkhārena.|| ||

So mahiccho samāno||
vighātavā||
asantuṭṭho||
itar'ītara-cīvara-piṇḍa-pāta-sen'āsana-gilāna-paccaya-bhesajja-parikkhārena
pāpikaɱ icchaɱ panidahati anavañña-paṭilābhāya,||
lābha-sakkāra-silo-kapaṭi-lābhāya.|| ||

So uṭṭhahati ghaṭeti vāyamati anavañña-paṭilābhāya,||
lābha-sakkāra-silo-kapaṭi-lābhāya.|| ||

So saŋkhāya kulāni upasankamati,||
saŋkhāya nisīdati,||
saŋkhāya dhammaɱ bhāsati,||
saŋkhāya uccāra-passāvaɱ sandhāreti.|| ||

Ime kho bhikkhave cattāro pabba-jitassa rogā.|| ||

3. Tasamātiha bhikkhave evaɱ sikkhitabbaɱ:|| ||

Na mahicchā bhavissāma vighāta vanto asantuṭṭhā itar'ītara-cīvara-piṇḍa-pāta-sen'āsana-gilāna-paccaya-bhesajja-parikkhārena,||
na pāpikaɱ icchaɱ paṇidahissāma anavañña-paṭilābhāya,||
lābha-sakkāra-silo-kapaṭi-lābhāya,||
na uṭṭhabhissāma,||
na ghanaṭissāma,||
na vāyamissāma,||
anavañña-paṭilābhāya lābha-sakkāra-silo-kapaṭi-lābhāya.|| ||

Khamā bhavissāma sītassa uṇhassa jīghacchāya pipāsāya ḍaɱsa-makasa-vāt'ātapa-siriɱsapa-samphassānaɱ,||
duruttānaɱ,||
durāgatānaɱ,||
vacana-pathānaɱ,||
uppannānaɱ,||
sārīrikānaɱ,||
vedanānaɱ,||
dukkhānaɱ,||
tibbānaɱ,||
kharānaɱ,||
kaṭukānaɱ,||
asātānaɱ,||
amanāpānaɱ,||
pāṇabharānaɱ||
adhivāsika-jātikā bhavissāmā ti.|| ||

Evaɱ hi vo bhikkhave sikkhitabban ti.|| ||

 


Contact:
E-mail
Copyright Statement