Moggallāna Paṭipadā Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts] EVAṂ ME SUTAṂ.|| ||

Atha kho āyasmā Sāriputto yen'āyasmā Mahā Moggallāno ten'upasaṇkami.|| ||

Upasaṇkamitvā āyasmatā Mahā Moggallānena saddhiṃ sammodi.|| ||

Sammodanīyaṃ kathaṃ sārāṇīyaṃ vīti-sāretvā eka-m-antaṃ nisidi.|| ||

Eka-m-antaṃ nisinno kho āyasmā Sāriputto āyasmantaṃ Mahā Moglagallānaṃ etad avoca:|| ||

"Catasso imā āvuso Moggallāna paṭipadā.|| ||

Katamā catasso?|| ||

Dukkhā-paṭipadā dandh-ā-bhiññā,||
dukkhā paṭipadā khippābhiññā,||
sukhā paṭipadā dandh-ā-bhiññā,||
sukhā paṭipadā khippābhiññā.|| ||

Imā kho āvuso catasso paṭipadā.|| ||

Imāsaṃ āvuso catassannaṃ paṭipadānaṃ katamaṃ te paṭipadaṃ āgamma āsavehi cittaṃ vimuttan" ti?|| ||

[155] "Catasso imā āvuso Sāriputta paṭipadā.|| ||

Katamā catasso?|| ||

Dukkhā-paṭipadā dandh-ā-bhiññā,||
dukkhā paṭipadā khippābhiññā,||
sukhā paṭipadā dandh-ā-bhiññā,||
sukhā paṭipadā khippābhiññā.|| ||

Imā kho āvuso catasso paṭipadā.|| ||

Imāsaṃ āvuso catassannaṃ paṭipadānaṃ yā'yaṃ paṭipadā dukkhā khippābhiññā,||
imaṃ me paṭipadaṃ āgamma anupādāya āsavehi cittaṃ vimuttan" ti.|| ||