Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
XIX: Yodhajīva Vagga

Sutta 183

Vassakāra (aka Suta) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

Atha kho Vassakāro brāhmaṇo Maganadha-mahā-matt yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho Vassakāro brāhmaṇo Maganadha-mahā-matt Bhagavantaɱ etad avoca:|| ||

"Ahaɱ hi bho Gotama evaɱ-vādī evaɱ diṭṭhī:|| ||

Yo ko ci diṭṭhaɱ bhāsati||
'evaɱ me diṭṭhan' ti,||
n'atthi tato doso.|| ||

Yo ko ci sutaɱ bhāsati||
'evaɱ me sutan' ti,||
n'atthi tato doso.|| ||

Yo ko ci mutaɱ bhāsati||
'evaɱ me mutan' ti,||
n'atthi tato doso.|| ||

Yo ko ci viññātaɱ bhāsati||
'evaɱ me viññātan' ti,||
n'atthi tato doso" ti.|| ||

 

§

 

Nāhaɱ brāhmaṇa sabbaɱ diṭṭhaɱ bhāsitabban ti vadāmi.|| ||

Na pan'āhaɱ brāhmaṇa sabbaɱ diṭṭhaɱ na bhāsitabban ti vadāmi.|| ||

Nāhaɱ brāhmaṇa sabbaɱ sutaɱ bhāsitabban ti vadāmi.|| ||

Na pan'āhaɱ brāhmaṇa sabbaɱ sutaɱ na [173] bhāsitabban ti vadāmi.|| ||

Nāhaɱ brāhmaṇa sabbaɱ mutaɱ bhāsitabban ti vadāmi.|| ||

Na pan'āhaɱ brāhmaṇa sabbaɱ mutaɱ na bhāsitabban ti vadāmi.|| ||

Nāhaɱ brāhmaṇa sabbaɱ viññātaɱ bhāsitabban ti vadāmi.|| ||

Na pan'āhaɱ brāhmaṇa sabbaɱ viññātaɱ na bhāsitabban ti vadāmi.|| ||

 

§

 

Yaɱ hi brāhmaṇa diṭṭhaɱ bhāsato akusalā dhammā abhivaḍḍhanti,||
kusalā dhammā parihāyanti,||
eva-rūpaɱ diṭaṭheɱ na bhāsitabban ti vadāmi.|| ||

Yaɱ ca khvāssa brāhmaṇa diṭṭhaɱ bhāsato akusalā dhammā parihāyanti,||
kusalā dhammā abhivaḍḍhanti,||
eva-rūpaɱ diṭṭhaoɱ bhāsitabban ti vadāmi.|| ||

Yaɱ hi brāhmaṇa sutaɱ bhāsato akusalā dhammā abhivaḍḍhanti,||
kusalā dhammā parihāyanti,||
eva-rūpaɱ sutaɱ na bhāsitabban ti vadāmi.|| ||

Yaɱ ca khvāssa brāhmaṇa sutaɱ bhāsato akusalā dhammā parihāyanti,||
kusalā dhammā abhivaḍḍhanti,||
eva-rūpaɱ sutaɱ bhāsitabban ti vadāmi.|| ||

Yaɱ hi brāhmaṇa mutaɱ bhāsato akusalā dhammā abhivaḍḍhanti,||
kusalā dhammā parihāyanti,||
eva-rūpaɱ mutaɱ na bhāsitabban ti vadāmi.|| ||

Yaɱ ca khvāssa brāhmaṇa mutaɱ bhāsato akusalā dhammā parihāyanti,||
kusalā dhammā abhivaḍḍhanti,||
eva-rūpaɱ mutaɱ bhāsitabban ti vadāmi.|| ||

Yaɱ hi brāhmaṇa viññātaɱ bhāsato akusalā dhammā abhivaḍḍhanti,||
kusalā dhammā parihāyanti,||
eva-rūpaɱ viññātaɱ na bhāsitabban ti vadāmi.|| ||

Yaɱ ca khvāssa brāhmaṇa viññātaɱ bhāsato akusalā dhammā parihāyanti,||
kusalā dhammā abhivaḍḍhanti,||
eva-rūpaɱ viññātaɱ bhāsitabban ti vadāmi ti.|| ||

Atha kho Vassakāro brāhmaṇo Maganadha-mahā-matt Bhagavato bhāsitaɱ abhinan'ditvā uṭṭhāy āsanā pakkāmīti.|| ||

 


Copyright Statement