Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
XIX: Yodhajīva Vagga

Sutta 188

Upaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[181]

[1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati Gijjhakuṭe pabbate.|| ||

Atha kho Upako Maṇḍikā-putto yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Upako Maṇḍikā-putto Bhagavantaɱ etad avoca:|| ||

Ahaɱ hi bhante evaɱ-vādī evaɱ-diṭṭhi:|| ||

Yo ko ci parūpārambhaɱ vatteti||
parūpārambhaɱ vattento sābbaso na upapādeti,||
anupapādento gārayho hoti upavajjo ti.|| ||

Parūpārambhaɱ ce Upaka vattento na upapādeti,||
anupapā- [182] dento gārayho hoti upavajjo.|| ||

Tvaɱ kho pi Upaka parūpārambhaɱ vattesi||
parūpārambhaɱ vattento na upapādi||
anuppādento gārayho hosi upavajjo ti.|| ||

 

§

 

2. Seyyathā pi bhante ummujjamānakaɱ yeva mahatā pāsena bandheyya,||
evam eva kho ahaɱ bhante ummujjamānako yeva Bhagavatā mahatā vādapāsena baddho' ti.|| ||

 

§

 

Idaɱ akusalan ti kho Upaka mayā paññattaɱ||
tattha aparimāṇā padā,||
aparimāṇā vyañjanā,||
aparimāṇā Tathāgatassa Dhamma-desanā:|| ||

Iti p'idaɱ akusalan,|| ||

taɱ kho pan'idaɱ akusalaɱ pahātabban ti kho Upaka mayā paññattaɱ||
tattha aparimāṇā padā,||
aparimāṇā vyañjanā,||
aparimāṇā Tathāgatassa Dhamma-desanā:|| ||

Iti p'idaɱ akusalaɱ pahātabban ti.|| ||

Idaɱ kusalan ti kho Upaka mayā paññattaɱ||
tattha aparimāṇā padā,||
aparimāṇā vyañjanā,||
aparimāṇā Tathāgatassa Dhamma-desanā:|| ||

Iti pidaɱ kusalan ti.|| ||

taɱ kho pana idaɱ kusalaɱ bhāvetabbanti kho Upaka mayā paññattaɱ||
tattha aparimāṇā padā||
aparimāṇā vyañjanā,||
aparimāṇā Tathāgatassa Dhamma-desanā:|| ||

Iti pidaɱ kusalaɱ bhāvetabban ti.|| ||

 

§

 

Atha kho Upako Maṇḍikaputto Bhagavato bhāsitaɱ abhinan'ditvā anumo-ditvā uṭṭhāy āsanā Bhagavantaɱ abhivādetvā pādakkhiṇaɱ katvā yena Rājā Māgadho Ajātasattu Vedehi-putto ten'upasankami.|| ||

Upasaŋkamitvā yāvatako ahosi Bhagavatā saddhiɱ kathā-sallāpo||
taɱ sabbaɱ rañño Māgadhassa Ajātasattussa Vedehi-puttassa ārocesi.|| ||

Evaɱ vutte Rājā Māgadho Ajātasattu Vedehi-putto kupito anatta-mano Upakaɱ Maṇḍikā-puttaɱ etad avoca:|| ||

Yāva dhaɱsi vāyaɱ loṇakārakadārako,||
yāva mukharo yāva pagabbho,||
yatra hi nāma taɱ Bhagavantaɱ arahantaɱ sammā-sambuddhaɱ āsādetabbaɱ maññissati,||
apehi tvaɱ Upaka, vinassa, mā tvaɱ addasan ti.|| ||

 


Copyright Statement