Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
XX: Mahā Vagga

Sutta 193

Bhaddiya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[190]

[1][pts] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgāra-sālāyaɱ.|| ||

Atha kho bhaddiyo Licchavi yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho bhaddhiyo Licchavi Bhagavantaɱ etad avoca:|| ||

Sutaɱ me taɱ bhante:|| ||

'Māyāvī Samaṇo Gotamo āvaṭṭanim māyaɱ jānāti,||
yāya añña-titthiyānaɱ sāvake āvaṭṭetī' ti.|| ||

Ye te bhante evam āhaɱsu:|| ||

'Māyāvī Samaṇo Gotamo āvaṭṭanim māyaɱ jānāti,||
yāya añña-titthiyānaɱ sāvake āvaṭṭetī' ti.|| ||

Kacci te bhante Bhagavato vutta-vādino,||
na ca Bhagavantaɱ abhutena abbhāvikkhanti,||
dhammassa cānudhammaɱ vyākaronti.|| ||

Na ca koci saha-dhammiko vād-ā-nupāto gārayihaɱ ṭhānaɱ āga-c-chati?|| ||

Anabbhakkhātukāmā hi mayaɱ bhante Bhagavantan ti.

[191] 2. Etha tumhe Bhaddiya,||
mā anussavena,||
mā paramparāya,||
mā itikirāya,||
mā piṭakasampadānena,||
mā takkahetu,||
mā nayahetu,||
mā ākāraparivitakkena,||
mā diṭṭhi-nijjhāna-k-khantiyā,||
mā bhabbarūpatāya,||
mā samaṇo no garūti.|| ||

Yadā tumhe Bhaddiya attanā va jāneyyātha,||
ime dhammā akusalā,||
ime dhammā sāvajjā,||
ima dhammā viññūgahahitā,||
ime dhammā samattā samādinnā ahitāya dukkhāya saŋvattantī ti.|| ||

Atha tumhe Bhaddiya pajaheyyātha.|| ||

3. Taɱ kiɱ maññatha Bhaddiya?|| ||

Lobho purisassa ajjhattaɱ uppajjamāno uppajjati hitāya vā ahitāya vāti?|| ||

Ahitāya bhante.|| ||

Luddho panāyaɱ Bhaddiya,||
purisa-puggalo lobhena Abhibhuto pariyādinna-citto pāṇam pi hanti,||
adinnam pi ādiyati,||
paradāram pi gacchati,||
musā pi bhaṇati,||
param pi tathattāya sam-ā-dapeti.|| ||

Yaɱ sa hoti dīgha-rattaɱ ahitāya dukkhāyā ti?|| ||

"Evaɱ bhante" ti.|| ||

4. Taɱ kiɱ maññatha Bhaddiya?|| ||

Doso purisassa ajjhattaɱ uppajjamāno uppajjati hitāya vā ahitāya vāti?|| ||

Ahitāya bhante.|| ||

Duṭṭho panāyaɱ Bhaddiya,||
purisa-puggalo dosena Abhibhuto pariyādinna-citto pāṇam pi hanti,||
adinnam pi ādiyati,||
paradāram pi gacchati,||
musā pi bhaṇati,||
param pi tathattāya sam-ā-dapeti.|| ||

Yaɱ sa hoti dīghanarattaɱ ahitāya dukkhāyāti?|| ||

"Evaɱ bhante" ti.|| ||

5. Taɱ kiɱ maññatha Bhaddiya?|| ||

Moho purisassa ajjhattaɱ uppajjamāno uppajjati hitāya vā ahitāya vāti?|| ||

Ahitāya bhante.|| ||

Muḷho panāyaɱ Bhaddiya, purisa-puggalo mohena Abhibhuto pariyādinna-citto pāṇam pi hanti,||
adinnam pi ādiyati,||
paradāram pi gacchati,||
musā pi bhaṇati,||
param pi tathattāya sam-ā-dapeti.|| ||

Yaɱ sa hoti dīghanarattaɱ ahitāya dukkhāyāti?|| ||

"Evaɱ bhante" ti.|| ||

6. Taɱ kiɱ maññatha Bhaddiya?|| ||

Sārambho purisassa ajjhattaɱ uppajjamāno uppajjati hitāya vā ahitāya vāti?|| ||

Ahitāya bhante.|| ||

Sāraddho panāyaɱ Bhaddiya, purisa-puggalo sārambhena Abhibhuto pariyādinna-citto pāṇam pi hanti,||
adinnam pi ādiyati,||
paradāram pi gacchati,||
musā pi bhaṇati,||
param pi tathattāya sam-ā-dapeti.|| ||

Yaɱ sa hoti dīghanarattaɱ ahitāya dukkhāyāti?|| ||

"Evaɱ bhante" ti.|| ||

7. Taɱ kiɱ maññatha Bhaddiya?|| ||

Ime dhammā kusalā vā akusalā vāti?|| ||

'Akusalā bhante.'|| ||

Sāvajjā vā anavajjā vāti?|| ||

'Sāvajjā bhante.'|| ||

Viññūgarahitā vā viññuppaSatthā vāti?|| ||

'Viññūgarahitā bhante.'|| ||

Samattā samādinnā ahitāya dukkhāya saŋvattanti,||
no vā kathaɱ vā ettha hotī ti?|| ||

'Samattā bhante samādinnā ahitāya dukkhāya saŋvattanti.|| ||

Evaɱ no ettha hotī' ti.|| ||

8. Iti kho Bhaddiya, yaɱ taɱ avocumha:||
etha tumhe Bhaddiya,||
mā anussavena||
mā paramparāya,||
mā itikirāya,||
[192] mā piṭakasampadānena,||
mā takkahetu,||
mā nayahetu,||
mā ākāraparivitakkena,||
mā diṭṭhi-nijjhāna-k-khantiyā,||
mā bhabbarūpatāya,||
mā samaṇo no garūti.|| ||

Yadā tumhe Bhaddiya attanā va jāneyyātha,||
ime dhammā akusalā,||
ime dhammā sāvajjā,||
ime dhammā viññūgarahitā,||
ime dhammā sāmattā samādinnā ahitāya dukkhāya saŋvattanti.|| ||

Atha tumhe Bhaddiya, pajaheyyāthāti||
iti yaɱ taɱ vuttaɱ,||
idam etaɱ paṭicca vuttaɱ.|| ||

9. Etha tumhe Bhaddiya,||
mā anassavena||
mā paramparāya||
mā itikirāya||
mā piṭakasampadānena||
mā takkahetu||
mā nayahetu||
mā ākāraparivitakkena||
mā diṭṭhi-nijjhāna-k-khantiyā||
mā bhabbarūpatāya||
mā samaṇo no garūti.|| ||

Yadā tumhe Bhaddiya, attanā va jāneyyātha:||
ime dhammā kusalā,||
ime dhammā anavajjā,||
ime dhammā viññūppaSatthā,||
ime dhammā samattā samādinnā hitāya sukhāya saŋvattantī ti.|| ||

Atha tumhe Bhaddiya, upasampajja vihareyyātha.|| ||

9. Taɱ kiɱ maññatha Bhaddiya?|| ||

Alobho purisassa ajjhattaɱ uppajjamāno uppajjati hitāya vā ahitāya vāti?|| ||

'Hitāya bhante'.|| ||

Aluddho panāyaɱ Bhaddiya, purisa-puggalo lobhena anAbhibhuto apariyādinna-citto n'eva pāṇaɱ hanti.|| ||

Na adinnaɱ ādiyati.|| ||

Na paradāraɱ gacchati.|| ||

Na mūsā bhaṇati.|| ||

Param pi tathattāya sam-ā-dapeti.|| ||

Yaɱ sa hoti dīgha-rattaɱ hitāya sukhāyāti?|| ||

'Evaɱ bhante.'|| ||

10. Kaɱ kiɱ maññatha Bhaddiya?|| ||

Adoso purisassa ajjhattaɱ uppajjamāno uppajjati hitāya vā ahitāya vāti?|| ||

'Hitāya bhante.'|| ||

Aduṭṭho panāyaɱ Bhaddiya, purisa-puggalo dosena anAbhibhuto apariyādinna-citto n'eva pāṇaɱ hanti.|| ||

Na adinnaɱ ādiyati.|| ||

Na paradāraɱ gacchati.|| ||

Na mūsā bhaṇati.|| ||

Param pi tathattāya sam-ā-dapeti.|| ||

Yaɱ sa hoti dīgha-rattaɱ hitāya sukhāyāti?|| ||

'Evaɱ bhante.'|| ||

11. Kaɱ kiɱ maññatha Bhaddiya?|| ||

Amoho purisassa ajjhattaɱ uppajjamāno uppajjati hitāya vā ahitāya vāti?|| ||

'Hitāya bhante.'|| ||

Amūḷho panāyaɱ Bhaddiya, purisa-puggalo mohena anAbhibhuto apariyādinna-citto n'eva pāṇaɱ hanti.|| ||

Na adinnaɱ ādiyati.|| ||

Na paradāraɱ gacchati.|| ||

Na mūsā bhaṇati.|| ||

Param pi tathattāya sam-ā-dapeti.|| ||

Yaɱ sa hoti dīgha-rattaɱ hitāya sukhāyāti?|| ||

'Evaɱ bhante.'|| ||

12. Kaɱ kiɱ maññatha Bhaddiya?|| ||

Asārambho purisassa ajjhattaɱ uppajjamāno uppajjati hitāya vā ahitāya vati?|| ||

'Hitāya bhante.'|| ||

Asāraddho panāyaɱ Bhaddiya, purisa-puggalo asārambhena ananAbhibhuto apariyādinna-citto n'eva pāṇaɱ hanti.|| ||

Na adinnaɱ ādiyi.|| ||

Na paradāraɱ gacchati.|| ||

Na musā bhaṇati.|| ||

Parampi tathattāya sam-ā-dapeti.|| ||

Yaɱ sa hoti dīgha-rattaɱ hitāya sukhāya saɱvāttatīti?|| ||

'Evaɱ bhante'|| ||

13. Taɱ kiɱ maññatha Bhaddiya?|| ||

Ime dhammā kusalā vā akusalā vāti?|| ||

'Kusalā bhante'|| ||

Sāvajjā vā anavajjā vāti?|| ||

'Anavajjā bhante'.|| ||

Viññūgarakahitā vā viññūppaSatthā vāti?|| ||

'ViññappaSatthā bhante'|| ||

[193] Samattā samādinnā hitāya sukhāya saŋvattanti,||
no vā kathaɱ vā ettha hotī ti?|| ||

'Samattā bhante samādinnā hitāya sukhāya saŋvattanti.|| ||

Evaɱ no ettha hotī' ti.|| ||

14. Iti kho Bhaddiya, yaɱ taɱ avocumha:|| ||

"Etha tumhe Bhaddiya,||
mā anussavena||
mā paramparāya||
mā itikirāya||
mā piṭakasampadānena||
mā takkahetu||
mā nayahetu||
mā ākāraparivitakkena||
mā diṭṭhi-nijjhāna-k-khantiyā||
mā bhabbarūpatāya||
mā samaṇo no garūti."|| ||

Yadā tumhe Bhaddiya,||
"attanā va jāneyyātha||
ime dhammā anavajjā||
ime dhammā viññūppaSatthā||
ime dhammā samattā samādinnā hitāya sukhāya saŋvattantī ti".|| ||

Atha tumhe Bhaddiya, upasampajja vīhareyyāthāti.|| ||

Iti yaɱ taɱ vuttaɱ idam etaɱ paṭicca vuttaɱ.|| ||

15. Ye kho te Bhaddiya, loke santo sappurisā,||
te sāvakaɱ evaɱ samādapenti:|| ||

Ehi tvaɱ amho purisa,||
lobhaɱ vineyya vineyya viharāhi,||
lobhaɱ vineyya vineyya viharanto||
na lobha-jaɱ kammaɱ karissasi,||
kāyena vācā manasā.|| ||

Dosaɱ vineyya vineyya viharāhi,||
dosaɱ vineyya vineyya viharanto||
na dosa-jaɱ kammaɱ karissasi,||
kāyena vācā manasā.|| ||

Mohaɱ vineyya vineyya viharāhi,||
mohaɱ vineyya vineyya viharanto||
na moha-jaɱ kammaɱ karissasi,||
kāyena vācā manasā.|| ||

Sārambhaɱ vineyya vineyya viharātabhi,||
sāramhaɱ vineyya vineyya viharanto||
na sārambhajaɱ kammaɱ karissasi||
kāyena vācā manasā ti.|| ||

 

§

 

16. Evaɱ vutte bhaddiyo Licchavi Bhagavantaɱ etad avoca:|| ||

Abhikkantaɱ bhante, seyyathā pi bhante,||
nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rūpāni dakkhintīti,||
evam eva bhotā bhante aneka-pariyāyena dhammo pakāsito.|| ||

Es'āhaɱ Bhagavantaɱ Gotamaɱ saraṇaɱ gacchāmi.|| ||

Dhammaɱ ca bhikkhu-saŋgaɱ ca.|| ||

Upāsakaɱ maɱ bhante Bhagavā dhāretu ajja-t-agge pāṇupetaɱ saraṇaɱ gatanti.|| ||

Api nū tāhaɱ Bhaddiya, evaɱ avacaɱ:|| ||

"Ehi me tvaɱ Bhaddiya sāvako hohi ahaɱ Satthā bhavissāmī" ti?|| ||

'No h'etaɱ bhante'.|| ||

Evaɱ vādiɱ kho maɱ Bhaddiya evam akkhāyiɱ eke samaṇa-brāhmaṇā asatā tucchā musā abhutena abbhāvikkhanti:|| ||

Māyāvī Samaṇo Gotamo avattanīmāyaɱ jānāti yāya añña-titthiyānaɱ sāvake āvaṭṭetī ti.|| ||

[194] Bhaddikā bhante āvaṭṭanīmāyā.|| ||

Kalyāṇī bhante āvaṭṭanīmāyā.|| ||

Piyā me bhante ñātisā-lohitā imāya āvaṭṭaniyā āvaṭṭeyyuɱ.|| ||

Piyānam pi me assa ñātisā-lohitānaɱ dīgha-rattaɱ hitāya sukhāya.|| ||

Sabbe ce pi bhante khattiyā imāya āvaṭṭaniyā āvaṭṭeyyuɱ,||
sabbesampassa khattiyānaɱ dīgha-rattaɱ hitāya sukhāya.|| ||

Sabbe ce pi bhante brāhmaṇā imāya āvaṭṭeyyuɱ,||
sabbesampassa brāhmaṇānaɱ dīgha-rattaɱ hitāya sukhāya.|| ||

Sabbe ce pi bhante vessā imāya āvaṭṭeyyuɱ,||
sabbesampassa vessānaɱ dīgha-rattaɱ hitāya sukhāya.|| ||

Sabbe ce pi bhante suddā imāya āvaṭṭeyyuɱ,||
sabbesampapassa suddānaɱ dīgha-rattaɱ hitāya sukhāyāti.|| ||

Evam etaɱ Bhaddiya,||
evam etaɱ Bhaddiya.|| ||

Sabbe ce pi Bhaddiya, khattiyā āvaṭṭeyyuɱ akusala-dhammappahānāya kusaladhamm'ūpasampadāya,||
sabbesam p'assa khattiyānaɱ dīgha-rattaɱ hitāya sukhāya.|| ||

Sabbe ce pi Bhaddiya brāhmaṇā āvaṭṭeyyuɱ akusala-dhammappahānāya kusaladhamm'ūpasampadāya,||
sabbesampassa brāhmaṇānaɱ dīgha-rattaɱ hitāya sukhāya.|| ||

Sabbe ce pi Bhaddiya vessā āvaṭṭeyyuɱ akusala-dhammappahānāya kusaladhamm'ūpasampadāya,||
sabbesampassa vessānaɱ dīgha-rattaɱ hitāya sukhāya.|| ||

Sabbe ce pi suddā āvaṭṭeyyuɱ akusala-dhammappahānāya kusaladhamm'ūpasampadāya,||
sabbesampassa suddānaɱ dīgha-rattaɱ hitāya sukhāya.|| ||

Sadevako ce pi Bhaddiya loko sa-mārako sabrahamko, sa-s-samaṇa-brāhmaṇī pajā sadeva-manussā āvaṭṭeyyuɱ akusala-dhammappahānāya kusaladhamm'ūpasampadāya,||
sa-devakassa lokassa sa-mārakassa sabrahmakassa sa-s-samaṇa-brāhmaṇiyā pajāya sadeva-manussāya dīgha-rattaɱ hitāya sukhāya.|| ||

Ime ce pi Bhaddiya mahā-sālā imāya āvaṭṭaniyā āvaṭṭeyyuɱ akusala-dhammappahānāya kusaladhamm'ūpasampadāya.|| ||

Imesam p'assa mahā-sālānaɱ dīgha-rattaɱ hitāya sukhāya.|| ||

Sace ceteyyuɱ ko pana vādo manussa-bhutassāti.|| ||

 


Contact:
E-mail
Copyright Statement