Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
XX: Mahā Vagga

Sutta 196

Sāḷaha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[200]

[1][pts] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgāra-sālāyaɱ.|| ||

Atha kho sāḷho ca Licchavi Abhayo ca Licchavi yena Bhagavā ten'upasankamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinno kho Sāḷho Licchavi Bhagavantaɱ etad avoca:|| ||

Santi bhante eke samaṇa-brāhmaṇā dvayena oghassa nittharaṇaɱ paññā-penti sīla-visuddhi-hetu ca tapo-jigucchā-hetu ca.|| ||

Idha bhante Bhagavā kimāhā ti?|| ||

2. Sīla-visuddhiɱ kho ahaɱ Sāḷhā aññataraɱ sāmaññaŋgan ti vadāmi.|| ||

Ye te Sāḷhā samaṇa-brāhmaṇā tapo-jigucchāvādā tapo-jigucchāsārā tapo-jigucchā-allīnā viharanti,||
abhabbā te oghassa nittharaṇāya.|| ||

Ye pi te Sāḷhā samaṇa-brāhmaṇā aparisuddha-kāya-samā-cārā aparisuddha-vacī-samā-cārā aparisuddha-mano-samā-cārā aparisuddhā-jīvā,||
abhabbā te ñāṇa-dassanāya anuttarāya sambodhāya.|| ||

3. Seyyathā pi Sāḷhā puriso nadiɱ taritukāmo,||
tiṇhaɱ kuṭhāriɱ ādāya vanaɱ paviseyya,|| ||

So tattha passeyya mahatiɱ sālalaṭṭhiɱ ujuɱ navaɱ akukkuccajātaɱ,||
tam enaɱ mūle chindeyya,||
mūle chetvā agge chindeyya,||
agge chetvā,||
sākhāpalāsaɱ suvisodhitaɱ visodheyya,||
sākhāpalāsaɱ suvisodhitaɱ visodhetvā kuṭhārīhi taccheyya,||
kuṭhārīhi taccheyya,||
kuṭhārīhi tacchetvā,||
vāsīhi taccheyya,||
vāsīhi tacchetvā,||
lekhaniyā likheyya,||
lekhaṇiyā likhitvā,||
pāsāṇaguḷena dhopeyya||
pāsāṇaguḷena dhopetvā,||
nidiɱ patāreyya.|| ||

Taɱ kiɱ maññasi Sāḷhā,||
bhabbo nu kho so puriso nadiɱ taritun ti?|| ||

No bh'etaɱ bhante.|| ||

4. Taɱ kissa hetu?|| ||

Asu hi bhante sālalaṭṭhi bahiddhā [201] suparikammakatā anto avisuddhā.|| ||

Tass'etaɱ pāṭikaŋkhaɱ:|| ||

Sālalaṭṭhi saɱsidissati,||
puriso anayavyasanaɱ āpajjissatī ti.|| ||

Evam eva kho Sāḷhā ye te samaṇa-brāhmaṇā tapo-jigucchāvādā tapo-jigucchāsārā tapo-jigucchā-allīnā viharanti,||
abhabbā te oghassa nittharaṇāya.|| ||

Ye pi te Sāḷhā samaṇa-brāhmaṇā aparisuddha-kāya-samā-cārā aparisuddha-vacī-samā-cārā aparisuddha-mano-samā-cārā aparisuddhā-jīvā,||
abhabbā te ñāṇa-dassanāya anuttarāya sambodhāya.|| ||

Ye ca kho te Sāḷhā samaṇa-brāhmaṇā na tapo-jigucchāvādā na tapo-jigucchāsārā na tapo-jigucchā-allīnā viharanti,||
bhabbā te oghassa nittharaṇāya.|| ||

Ye pi te Sāḷhā samaṇa-brāhmaṇā parisuddha-kāya-samā-cārā parisuddha-vacī-samā-cārā parisuddha-mano-samā-cārā parisuddhā-jīvā,||
bhabbā te ñāṇa-dassanāya anuttarāya sambodhāya.|| ||

5. Seyyathā pi Sāḷhā puriso nadiɱ taritukāmo,||
tiṇhaɱ kuṭhāriɱ ādāya vanaɱ paviseyya.|| ||

So tattha passeyya mahatiɱ sālalaṭṭhiɱ ujuɱ navaɱ akukkuccakajātaɱ,||
tam enaɱ mūle chindeyya,||
mūle chetvā,||
agge chindeyya,||
agge chetvā,||
sākhāpalāsāɱ suvisodhitaɱ visodheyya,||
sākhāpalāsaɱ suvisodhitaɱ visodhetvā,||
kuṭhārīhi taccheyya,||
kuṭhārīhi tacchetvā,||
vāsīhi taccheyya,||
vāsīhi tacchetvā nikhādanaɱ ādāya anto suvisodhitaɱ visodheyya,||
anto suvisodhitaɱ visodhetvā,||
lekhaniyā likheyya,||
lekhaniyā likhitvā,||
pāsāṇaguḷena dhopeyya,||
pāsāṇaguḷena dhopetvā,||
nāvaɱ kareyya,||
nāvaɱ karitvā,||
piyārittaɱ bandheyya,||
nāvaɱ katva piyārittaɱ bhandhitvā nadiɱ patāreyya.|| ||

Taɱ kīɱ maññasi sāḷnahā,||
bhabbo nu kho so puriso nadiɱ taritun ti?|| ||

Evaɱ bhante.|| ||

6. Taɱ kissa hetu?|| ||

Asu hi bhante sālalaṭṭhi bahiddhā suparikammakatā anto suvisuddhā nāvā katā,||
piyārittaɱ baddhā.|| ||

Tass'etaɱ pāṭikaŋkhaɱ:||
nāvā na saɱsīdissati puriso sotthinā pāraɱ gamissatī ti.|| ||

Evam eva kho Sāḷhā ye te samaṇa-brāhmaṇā na tapo-jigucchāvādā na tapo-jigucchāsārā na tapo-jigucchā-allīnā viharanti,||
bhabbā te oghassa nittharaṇāya.|| ||

Ye pi te Sāḷhā samaṇa-brāhmaṇā [202] parisuddha-kāya-samā-cārā parisuddha-vacī-samā-cārā parisuddha-mano-samā-cārā parisuddhā-jīvā,||
bhabbā te ñāṇa-dassanāya anuttarāya sambodhāya.|| ||

7. Seyyathāpā Sāḷhā yodhājīvo bahūnī ce pi kaṇḍacittakāni jānāti,||
atha kho so tīhi ṭhānehi rājā-raho hoti rāja-bhoggo||
rañño aŋgana t'eva saŋkhaɱ gacchati.|| ||

Katamehi tīhi?|| ||

Dūre pātī ca,||
akkhaṇa-vedhī ca,||
mahato ca kāyassa padāletā.|| ||

8. Seyyathā pi Sāḷhā yodhājīvo dūre pātī,||
evam eva kho Sāḷhā ariya-sāvako||
sammā-samādhi hoti||
sammā-samādhi Sāḷhā ariya-sāvako||
yaɱ kiñci rūpaɱ atītānāgata-paccuppannaɱ||
ajjhattaɱ vā||
bahiddhā vā||
oḷārikaɱ vā||
sukhumaɱ vā||
hīnaɱ vā||
paṇitaɱ vā||
yaɱ dūre santike vā||
sabbaɱ rūpaɱ||
n'etaɱ mama||
n'eso'ham asmi,||
na meso attā ti,||
evam etaɱ yathā-bhūtaɱ sammappaññāya passati.|| ||

Yā kāci vedanā atītānāgata-paccuppannaɱ||
ajjhattaɱ vā||
bahiddhā vā||
oḷārikaɱ vā||
sukhumaɱ vā||
hīnaɱ vā||
paṇitaɱ vā||
yaɱ dūre santike vā||
sabbaɱ vedanā||
n'etaɱ mama||
n'eso'ham asmi,||
na meso attā ti,||
evam etaɱ yathā-bhūtaɱ sammappaññāya passati.|| ||

Yā kāci saññā atītānāgata-paccuppannaɱ||
ajjhattaɱ vā||
bahiddhā vā||
oḷārikaɱ vā||
sukhumaɱ vā||
hīnaɱ vā||
paṇitaɱ vā||
yaɱ dūre santike vā||
sabbaɱ saññā||
n'etaɱ mama||
n'eso'ham asmi,||
na meso attā ti,||
evam etaɱ yathā-bhūtaɱ sammappaññāya passati.|| ||

Ye keci sankhārā atītānāgata-paccuppannaɱ||
ajjhattaɱ vā||
bahiddhā vā||
oḷārikaɱ vā||
sukhumaɱ vā||
hīnaɱ vā||
paṇitaɱ vā||
yaɱ dūre santike vā||
sabbaɱ sankhārā||
n'etaɱ mama||
n'eso'ham asmi,||
na meso attā ti,||
evam etaɱ yathā-bhūtaɱ sammappaññāya passati.|| ||

Yaɱ kiñci viññāṇaɱ atītānāgata-paccuppannaɱ||
ajjhattaɱ vā||
bahiddhā vā||
oḷārikaɱ vā||
sukhumaɱ vā||
hīnaɱ vā||
paṇitaɱ vā||
yaɱ dūre santike vā||
sabbaɱ viññāṇaɱ||
n'etaɱ mama||
n'eso'ham asmi,||
na meso attā ti,||
evam etaɱ yathā-bhūtaɱ sammappaññāya passati.|| ||

9. Seyyathā pi Sāḷhā yodhājīvo akkhaṇa-vedhī,||
evam eva kho Sāḷhā ariya-sāvako sammā-diṭṭhī hoti.|| ||

Sammā-diṭṭhī Sāḷhā ariya-sāvako|| ||

'Idaɱ dukkhan' ti yathā-bhūtaɱ pajānāti.|| ||

'Ayaɱ dukkha-samudayo' ti yathā-bhūtaɱ pajānāti.|| ||

'Ayaɱ dukkha-samudayo' ti yathā-bhūtaɱ pajānāti.|| ||

'Ayaɱ dukkha-nirodho' ti yathā-bhūtaɱ pajānāti.|| ||

'Ayaɱ dukkha-nirodha-gāminī paṭipadā' ti yathā-bhūtaɱ pajānāti.|| ||

10. Seyyathā pi Sāḷhā yodhājīvo mahato kāyassa padāletā,||
evam eva kho Sāḷhā ariya-sāvako sammā-vimuttī hoti.|| ||

Sammā-vimuttī Sāḷhā ariyasāmako mahantaɱ avijjā-k-khandhaɱ padāletī ti.|| ||

 


Copyright Statement