Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
XXIV: Kamma Vagga

Sutta 233

Tatiya Kamma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[232]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho Sīkhā Moggallāno brāhmaṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho Sikhā Moggallāno brāhmaṇo Bhagavantaɱ etad avoca:|| ||

"Purimāni bho Gotama divasāni purimatarāni Soṇa-Kāyano māṇavo yen'āhaɱ ten'upasankami.|| ||

Upasaŋkamitvā maɱ etad avoca:|| ||

'Samaṇo Gotamo sabba-kammānaɱ akiriyaɱ paññāpeti||
sabba-kammānaɱ kho pana akiriyaɱ paññā-pento ucchedaɱ āha lokassa||
kamma-saccāyaɱ bho loko,||
kamma-samārambhaṭṭhāyī' ti.|| ||

"Dassanam pi kho ahaɱ brāhmaṇa Soṇa-Kāyanassa māṇavassa nābhijānāmi,||
kuto pan'eva-rūpo kathā-sallāpo?|| ||

 

§

 

2. Cattār'imāni brāhmaṇa kammāni mayā sayaɱ abhiññā sacchi-katvā paveditāni.|| ||

Katamāni cattāri?|| ||

Atthi brāhmaṇa kammaɱ kaṇhaɱ kaṇha-vipākaɱ.|| ||

Atthi brāhmaṇa kammaɱ sukkaɱ sukka-vipākaɱ.|| ||

Atthi brāhmaṇa kammaɱ kaṇha-sukkaɱ kaṇha-sukka-vipākaɱ.|| ||

[233] Atthi brāhmaṇa kammaɱ akaṇhaɱ asukkaɱ akaṇha-asukka-vipākaɱ kammaɱ kamma-k-khayāya saŋvattati.|| ||

 

§

 

3. Katamañ ca brāhmaṇa kammaɱ kaṇhaɱ kaṇha-vipākaɱ?|| ||

Idha, brāhmaṇa, ekacco||
savyāpajjhaɱ kāya-sankhāraɱ abhisaŋkharoti,||
savyāpajjhaɱ vacī-sankhāraɱ abhisaŋkharoti,||
savyāpajjhaɱ mano-sankhāraɱ abhisaŋkharoti.|| ||

So savyāpajjhaɱ kāya-sankhāraɱ abhisaŋkharitvā||
savyāpajjhaɱ vacī-sankhāraɱ abhisaŋkharitvā||
savyāpajjhaɱ mano-sankhāraɱ abhisaŋkharitvā||
savyāpajjhaɱ lokaɱ uppajjati.|| ||

Tam enaɱ savyāpajjhaɱ lokaɱ upapannaɱ||
samānaɱ savyāpajjhā phassā phusanti.|| ||

So savyāpajjhehi phassehi phuṭṭho||
samāno savyāpajjhaɱ vedanaɱ vediyati ekanta-dukkhaɱ||
seyyathā pi sattā Nerayikā.|| ||

Idaɱ vuccati brāhmaṇa kammaɱ kaṇhaɱ kaṇha-vipākaɱ.|| ||

4. Katamañ ca brāhmaṇa kammaɱ sukkaɱ sukka-vipākaɱ?|| ||

Idha, brāhmaṇa, ekacco||
avyāpajjhaɱ kāya-sankhāraɱ abhisaŋkharoti,||
avyāpajjhaɱ vacī-sankhāraɱ abhisaŋkharoti,||
avyāpajjhaɱ mano-sankhāraɱ abhisaŋkharoti.|| ||

So avyāpajjhaɱ kāya-sankhāraɱ abhisaŋkharitvā||
avyāpajjhaɱ vacī-sankhāraɱ abhisaŋkharitvā||
avyāpajjhaɱ mano-sankhāraɱ abhisaŋkaritvā||
avyāpajjhaɱ lokaɱ uppajjati.|| ||

Tam enaɱ avyāpajjhaɱ lokaɱ upapannaɱ||
phassā phusanti so akhyāpajjhahi||
samānaɱ avyāpajjhā phassā phusanti.|| ||

So avyāpajjhehi phassehi phuṭṭho||
samāno avyāpajjhaɱ vedanaɱ vediyati ekanta-sukhaɱ||
seyyathā pi devā Subhakiṇṇā.|| ||

Idaɱ vuccati brāhmaṇa kammaɱ sukkaɱ sukka-vipākaɱ.|| ||

5. Katamañ ca brāhmaṇa kammaɱ kaṇha-sukkaɱ kaṇha-sukka-vipākaɱ?|| ||

Idha, brāhmaṇa, ekacco||
savyāpajjham pi avyāpajjham pi kāya-sankhāraɱ abhisaŋkharoti,||
savyāpajjham pi avyāpajjham pi vacī-sankhāraɱ abhisaŋkharoti,||
savyāpajjham pi avyāpajjham pi mano-sankhāraɱ abhisaŋkharoti.|| ||

So savyāpajjham pi avyāpajjham pi kāya-sankhāraɱ abhisaŋkharitvā||
savyāpajjham pi avyāpajjham pi vacī-sankhāraɱ abhisaŋkharitvā||
savyāpajjham pi avyāpajjham pi mano-sankhāraɱ abhisaŋkharitvā||
savyāpajjham pi avyāpajjham pi lokaɱ uppajjati.|| ||

Tam enaɱ savyāpajjham pi avyāpajjham pi lokaɱ upapannaɱ||
samānaɱ savyāpajjhā pi avyāpajjhā pi phassā phusanti.|| ||

So savyāpajjhehi pi avyāpajjhehi pi phassehi phuṭṭho||
samāno savyāpajjham pi avyāpajjham pi vedanaɱ vediyati vokiṇṇa-sukha-dukkhaɱ||
seyyathā pi manussā ekacce ca devā ekacce ca vinipātikā.|| ||

Idaɱ vuccati brāhmaṇa kammaɱ kaṇha-sukkaɱ kaṇha-sukka-vipākaɱ.|| ||

6. Katamañ ca brāhmaṇa kammaɱ akaṇhaɱ asukkaɱ akaṇha-asukka-vipākaɱ kammaɱ kamma-k-khayāya saŋvattati?|| ||

Tatra, brāhmaṇa,||
yam idaɱ kammaɱ kaṇhaɱ kaṇha-vipākaɱ tassa pahāṇāya yā cetanā,||
yam p'idaɱ kammaɱ sukkaɱ sukka-vipākaɱ tassa pahāṇāya yā cetanā,||
yam p'idaɱ kammaɱ kaṇha-sukkaɱ kaṇha-sukka-vipākaɱ tassa pahāṇāya yā cetanā,||
idaɱ vuccati brāhmaṇa kammaɱ akaṇhaɱ asukkaɱ akaṇha asukka-vipākaɱ kammaɱ kamma-k-khayāya saŋvattati.|| ||

Imāni kho brāhmaṇa cattāri kammāni mayā sayaɱ abhiññā sacachi-katvā paveditānī" ti.|| ||

 


Contact:
E-mail
Copyright Statement