Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
XXV: Āppatti-bhaya Vagga

Sutta 244

Seyyā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[244]

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

Catasso imā bhikkhave seyyā.|| ||

Katamā catasso?|| ||

Peta-seyyā,||
kāma-bhogī-seyyā,||
sīha-seyyā,||
Tathāgata-seyyā.|| ||

Katamā ca bhikkhave peta-seyyā?

Yebhuyyena bhikkhave petā uttānā senti.|| ||

Ayaɱ vuccati bhikkhave peta-seyyā.|| ||

Katamā ca bhikkhave kāma-bhogī-seyyā?|| ||

Yebhuyyena bhikkhave kāma-bhogi vāmena passena senti.|| ||

Ayaɱ vuccati bhikkhave kāma-bhogī-seyyā.|| ||

Katamā ca bhikkhave sīha-seyyā?|| ||

[245] Sīho bhikkhave miga-rājā dakkhiṇena passena seyyaɱ kappeti pāde pādaɱ accādhāya, antarā satthīnaɱ naŋguṭṭhaɱ anukkhipitvā.|| ||

So paṭibujjhitvā purimaɱ kāyaɱ abbhunnāmetvā pacchimaɱ kāyaɱ anuviloketi.|| ||

Sace bhikkhave sīho miga-rājā kiñci passati kāyassa vikkhittaɱ vā visaṭaɱ vā, tena bhikkhave sīho miga-rājā anatta-mano hoti.|| ||

Sace pana bhikkhave sīho miga-rājā na kiñci passati kāyāssa vikkhittaɱ vā visaṭaɱ vā, tena bhikkhave sīho miga-rājā atta-mano hoti.|| ||

Ayaɱ vuccati bhikkhave sīha-seyyā.|| ||

Katamā ca bhikkhave Tathāgata-seyyā?|| ||

Idha, bhikkhave, Tathāgato vivicc'eva kāmehi||
vivicca akusalehi dhammehi||
sa-vitakkaɱ||
sa-vicāraɱ||
viveka-jaɱ pīti-sukhaɱ||
paṭhamaɱ-jhānaɱ upasampajja viharati.|| ||

Idha, bhikkhave, Tathāgato vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ||
avicāraɱ||
samādhi-jaɱ pītisukhaɱ||
dutiyaɱ jhānaɱ upasampajja viharati.|| ||

Idha, bhikkhave, Tathāgato pītiyā ca virāgā||
upekhako ca vihāsiɱ||
sato ca sampajāno,||
sukhañ ca kāyena paṭisaɱvedesiɱ,||
yaɱ taɱ ariyā ācikkhanti||
'upekhako satimā sukha-vihārī' ti||
tatiyaɱ jhānaɱ upasampajja viharati.|| ||

Idha, bhikkhave, Tathāgato sukhassa ca pahānā||
dukkhassa ca pahānā||
pubb'eva somanassa-domanassānaɱ atthaṇgamā||
adukkhaɱ||
asukhaɱ||
upekhā sati-pārisuddhiɱ||
catutthaɱ jhānaɱ upasampajja viharati.|| ||

Ayaɱ vuccati bhikkhave Tathāgata-seyyā.|| ||

Imā kho bhikkhave catasso seyyā ti.|| ||

 


Contact:
E-mail
Copyright Statement