Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
XXVI: Abhiññā Vagga

Sutta 254

Māluŋkya-Putta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[248]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho āyasamā Māluŋkya-putto yena Bhagavā ten'upasankami.|| ||

Upasan-kamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Māluŋkya-putto Bhagavantaɱ etad avoca:|| ||

"Sādhu kho me bhante Bhagavā saŋkhittena dhammaɱ desetu,||
yam ahaɱ Bhagavato dhammaɱ sutvā eko vupakaṭṭho appamatto ātāpī pahit'atto vihareyyan" ti.|| ||

"Ettha dāni Māluŋkya-putta kiɱ dahare bhikkhu vakkhāma,||
yattha hi nāma tvaɱ jiṇṇo vuddho mahallako Tathāgatassa saŋkhittena ovādaɱ yā casī" ti?|| ||

"Desetu me bhante Bhagavā saŋkhittena dhammaɱ,||
desetu Sugato saŋkhittena dhammaɱ,||
app'eva nāmāhaɱ Bhagavato bhāsitassa atthaɱ ājāneyyaɱ app'eva nāmāhaɱ Bhagavato bhāsitassa dāyādo assan" ti.|| ||

"Cattāro'me Māluŋkya-putta taṇhuppādā yattha bhikkhuno taṇhā uppajjamānā uppajjati.|| ||

Katame cattāro?|| ||

Cīvara-hetu vā Māluŋkya-putta bhikkhuno taṇhā uppajjamānā uppajjati,||
piṇḍa-pāta-hetu vā māluŋakyaputta bhikkhuno taṇhā uppajjamānā uppajjati,||
senāsana-hetu vā Māluŋkya-putta bhikkhuno taṇhā uppajjamānā uppajjati,||
iti bhav-ā-bhava-hetu vā Māluŋkya-putta bhikkhuno taṇhā uppajjamānā uppajjati.|| ||

Ime kho Māluŋkya-putta cattāro taṇhuppādā yattha bhikkhuno taṇhā uppajjamānā uppajjati.|| ||

[249] Yato kho Māluŋkya-putta bhikkhuno taṇhā pahīṇā hoti,||
ucchinna-mūlā tālā-vatthu-katā anabhāva-katā āyatiɱ anuppāda-dhammā.|| ||

Ayaɱ vuccati Māluŋkya-putta bhikkhu acchecchi taṇhaɱ,||
vāvattayi saŋyojanaɱ,||
sammā mānābhi-samayā antam akāsi dukkhassā" ti.|| ||

Atha kho āyasmā Māluŋkya-putto Bhagavatā iminā ovādena ovadito uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho āyasmā Māluŋkya-putto eko vupakaṭṭho appamatto ātāpī pahit'atto viharanto na cirass'eva yass'attathāya kula-puttā samma-d-eva agārasmā anagāriyaɱ pabbajanti,||
tad anuttaraɱ brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi:|| ||

Khīṇā jāti,||
vusitaɱ brahma-cariyaɱ,||
kataɱ karaṇīyaɱ,||
nāparaɱ itthattāyā ti abbhaññāsi.|| ||

Aññataro ca pan'āyasmā Māluŋkya-putto arahataɱ ahosī ti.|| ||

 


Copyright Statement