Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Sattaka Nipāta
Dhana Vaggo

Sutta 4

Vitthata Satta-Bala Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[3]

[1][pts][upal] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

2. Satt'imāni bhikkhave, balāni.|| ||

Katamāni satta?|| ||

3. Saddhā-balaɱ,||
viriya-balaɱ,||
hiri-balaɱ,||
ottappa-balaɱ,||
sati-balaɱ,||
samādhi-balaɱ,||
paññā-balaɱ.|| ||

Imāni kho bhikkhave satta-balāni.|| ||

 

§

 

4. Katamañ ca bhikkhave, saddhā-balaɱ?|| ||

Idha, bhikkhave, ariya-sāvako saddho hoti,||
sadda-hati Tathāgatassa bodhiɱ:|| ||

"Iti pi so Bhagavā,||
arahaɱ,||
Sammā-Sam-Buddho,||
vijjā-caraṇa-sampanno,||
Sugato,||
loka-vidū,||
anuttaro purisa-damma-sārathī,||
Satthā deva-manussānaɱ,||
Buddho,||
Bhagavā" ti.|| ||

Idaɱ vuccati bhikkhave saddhā-balaɱ.|| ||

5. Katamañ ca bhikkhave, viriya-balaɱ?|| ||

Idha, bhikkhave, ariya-sāvako āraddha-viriyo viharati:,||
akusalānaɱ dhammānaɱ pahānāya,,||
kusalānaɱ dhammānaɱ upasampadāya,,||
thāmavā daḷha-parakkamo anikkhitta-dhūro kusalesu dhammesu.|| ||

Idaɱ vuccati bhkhave, viriya-balaɱ.|| ||

6. Katamañ ca bhikkhave, hiri-balaɱ?|| ||

Idha, bhikkhave, ariya-sāvako hirimā hoti,,||
hirīyati kāya-du-c-caritena,,||
vacī-du-c-caritena,,||
mano-du-c-caritena,,||
hirīyati pāpakānaɱ akusalānaɱ dhammānaɱ samāpattiyā.|| ||

Idaɱ vuccati bhikkhave, hiri-balaɱ.|| ||

7. Katamañ ca bhikkhave, ottappa-balaɱ?|| ||

Idha, bhikkhave, ariya-sāvako ottapī hoti,,||
ottapati kāya-du-c-caritena,,||
vacī-du-c-caritena,,||
mano-du-c-caritena,,||
ottapati pāpakānaɱ akusalānaɱ dhammānaɱ samāpattiyā.|| ||

Idaɱ vuccati bhikkhave, ottappa-balaɱ.|| ||

8. Katamañ ca bhikkhave, sati-balaɱ?|| ||

Idha, bhikkhave, ariya-sāvako satimā hoti,||
paramena sati-nepakkena samannāgato cira-katam pi,||
cira-bhāsitam pi,||
saritā anussaritā.|| ||

Idaɱ vuccati bhikkhave, sati-balaɱ.|| ||

9. Katamañ ca bhikkhave, samādhi-balaɱ?|| ||

Idha, bhikkhave, vivicc'eva kāmehi,||
vivicca akusalehi dhammehi,||
sa-vitakkaɱ,||
sa-vicāraɱ,||
viveka-jaɱ pīti-sukhaɱ,||
paṭhamaɱ-jhānaɱ upasampajja viharati.|| ||

-◦-

Vitakka vicārānaɱ vūpasamā,||
ajjhattaɱ sampasādanaɱ,||
cetaso ekodi-bhāvaɱ,||
avitakkaɱ,||
avicāraɱ,||
samādhi-jaɱ pīti-sukhaɱ,||
dutiyaɱ-jhānaɱ upasampajja viharati.|| ||

-◦-

Pītiyā ca virāgā,||
upekkhako ca viharati,||
sato ca sampajāno,||
sukhañ ca kāyena paṭisaŋvedeti,||
yantaɱ ariyā āvikkhanti:|| ||

'Upekkhako satimā sukha-vihārī' ti|| ||

taɱ tatiyaɱ-jhānaɱ upasampajja viharati.|| ||

-◦-

Sukhassa ca pahānā,||
dukkhassa ca pahānā,||
pubb'eva somanassa-domanassānaɱ atthaŋ-gamā,||
adukkha-m-asukhaɱ,||
upekkhā-sati-pārisuddhiɱ,||
catutthaɱ-jhānaɱ upasampajja viharati.|| ||

Idaɱ vuccati bhikkhave, samādhi-balaɱ.|| ||

10. Katamañ ca bhikkhave, paññā-balaɱ?|| ||

Idha, bhikkhave, ariya-sāvako paññavā hoti,||
uday'attha-gāminiyā paññāya,||
samannāgato ariyāya nibbedhi-kāya,||
sammā dukkha-k-khaya-gāminiyā.|| ||

Idaɱ vuccati bhikkhave, paññā-balaɱ.|| ||

Imāni kho bhikkhave, satta-balāni.

 


 

Saddhā-balaɱ viriya-balaɱ hiri ottappiyaɱ balaɱ||
Sati-balaɱ samādhi ca paññā ve sattamaɱ balaɱ.||
Etehi balavā bhikkhū sukhaɱ jīvatī paṇḍito.||
Yoniso vicine dhammaɱ paññāyatthaɱ vipassati.||
Pajjotass'eva Nibbānaɱ vimokkho hoti cetaso, ti.|| ||

 


Contact:
E-mail
Copyright Statement