Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Sattaka Nipāta
Mahāyañña-Vagga

Sutta 47

Methuna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[54]

[1][olds] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho Jānussoṇī brāhmaṇo yena ten'upasankami.|| ||

Upasaŋkamitvā Bhagavatā saddhiɱ sammodi,||
sammodanīyaɱ kathaɱ sārāṇīyaɱ vīti-sāretvā eka-m-antaɱ nisidi.|| ||

Eka-m-antaɱ nisinno kho Jānussoṇi brāhmaṇo Bhagavantaɱ etad avoca:|| ||

'Bhavam pi no Gotamo brahma-cārī paṭijānātī' ti?|| ||

'Yaɱ hi taɱ brāhmaṇa,
sammā vadamāno vadeyya:|| ||

"Akhaṇḍaɱ acchiddaɱ asabalaɱ akammāsaɱ||
paripuṇṇaɱ||
parisuddhaɱ||
Brahma-cariyaɱ caratī" ti;|| ||

mam'eva taɱ brāhmaṇa,
sammā vadamāno vadeyya,
ahaɱ hi brāhmaṇa,
akhaṇḍaɱ acchiddaɱ asabalaɱ akammāsaɱ||
paripuṇṇaɱ||
parisuddhaɱ||
Brahma-cariyaɱ carāmī' ti.|| ||

 

§

 

'Kim pana bho Gotama,||
Brahma-cariyassa khaṇḍam pi chiddam pi sabalam pi kammāsam pī' ti?|| ||

2. Idha brāhmaṇa,||
ekacco samaṇo vā brāhmaṇo vā sammā brahma-cārī paṭijānamāno na h'eva kho mātu-gāmena saddiɱ dvayandvayasamāpattiɱ samāpajjati,||
api ca kho mātu-gāmassa ucchādanaparimaddananahāpanasambāhanaɱ sādiyati.|| ||

So taɱ assādeti,||
taɱ nikāmeti||
tena ca vittiɱ āpajjati.|| ||

Idam pi kho brāhmaṇa,||
Brahma-cariyayassa khaṇḍam pi chiddam pi sabalam pi kammāsam pi.|| ||

Ayaɱ vuccati brāhmaṇa,||
aparisuddhaɱ Brahma-cariyaɱ carati saɱyutto methunena saɱyogena,||
na parimuccati jātiyā jarā-maraṇena sokehi paridevehi dukkhehi domanassehi upāyāsehi,||
na parimuccati dukkhasmāti vadāmi.|| ||

3. Puna ca paraɱ brāhmaṇa,||
idh'ekacco samaṇo vā brāhmaṇo vā sammā brahma-cārī paṭijānamāno na h'eva kho mātu-gāmena saddhiɱ dvayandvayasamāpattiɱ samāpajjati,||
na pi mātu-gāmassa ucchādanaparimaddananahāpanasambāhanaɱ sādiyati,||
api ca kho mātu-gāmena saddhiɱ sañjagghati sankī'ati sanke'āyati.|| ||

4. Puna ca paraɱ brāhmaṇa,||
idh'ekacco samaṇo vā brāhmaṇo vā sammā brahma-cārī paṭijānamāno na h'eva kho mātu-gāmena saddhiɱ dvayandvayasamāpattiɱ samāpajjati,||
na pi mātu-gāmassa ucchādanaparimaddananahāpanasambāhanaɱ sādiyati||
na pi mātu-gāmena saddhiɱ sañjagghati sankī'ati sanke'āyati||
api ca kho mātu-gāmassa cakkhunā cakkhuɱ upanijjhāyati pekkhati.|| ||

5. Puna ca paraɱ brāhmaṇa,||
idh'ekacco samaṇo vā brāhmaṇo vā sammā brahma-cārī paṭijānamāno na h'eva kho mātu-gāmena saddhiɱ dvayandvayasamāpattiɱ samāpajjati,||
na pi mātu-gāmassa ucchādanaparimaddananahāpanasambāhanaɱ sādiyati,||
na pi mātu-gāmena saddhiɱ sañjagghati sankī'ati sanke'āyati,||
na pi mātu-gāmassa cakkhunā cakkhūɱ upanijjhāyatipekkhati||
api ca kho mātu-gāmassa saddaɱ suṇāti,||
tiro-kuḍḍaɱ vā tiro-pākāraɱ vā hasantiyā vā bhaṇantiyā vā gāyantīyā vā rodantiyā vā.|| ||

6. Puna ca paraɱ brāhṇa,||
idh'ekacco samaṇo vā brāhmaṇo vā sammā brahma-cārī paṭijānamāno na h'eva kho mātu-gāmena saddiɱ dvayandvayasamāpattiɱ samāpajjati,||
na pi mātu-gāmassa ucchādanaparimaddananahāpanasambāhanaɱ sādiyati,||
na pi mātu-gāmena saddhiɱ sañjagghati sankī'ati sanke'āyati,||
na pi mātu-gāmassa cakkhunā cakkhūɱ upanijjhāyatipekkhati,||
na pi mātu-gāmassa saddaɱ suṇāti,||
tiro-kuḍḍaɱ vā tiro-pākāraɱ vā hasantiyā vā bhaṇantīyā vā gāyantiyā vā rodantiyā vā||
api ca kho yāni'ssa tāni pubbe mātu-gāmena saddhiɱ hasitalapitakīḷitānitāni anussarati.|| ||

7. Puna ca paraɱ brāhmaṇa,||
idh'ekacco samaṇo vā brāhmaṇo vā sammā brahma-cārī paṭijānamāno na h'eva kho mātu-gāmena saddhiɱ dvayandvayasamāpattiɱ samāpajjati,||
na pi mātu-gāmassa ucchādanaparimaddananahāpana sambāhanaɱ sādiyati,||
na pi mātu-gāmena saddhiɱ sañjagghati sankī'ati sanke'āyati,||
na pi mātu-gāmassa cakkhunā cakkhuɱ upanijjhāyati pekkhati,||
na pi mātu-gāmassa saddhaɱ suṇāti,||
tiro-kuḍḍaɱ vā tiro-pākāraɱ vā hasantiyā vā bhaṇantiyā vā gāyantiyā vā rodantiyā vā,||
na pi yānissa tāni pubbe mātugā mena saddhiɱ hasitalapitaki'itāni tāni anussarati||
api ca kho passati gahapatiɱ vā gahapati-puttaɱ vā pañcahi kāma-guṇehi samappitaɱ samaŋgibhūtaɱ parivāriyamānaɱ.|| ||

8. Puna ca paraɱ brāhmaṇa,||
idh'ekacco samaṇo vā brāhmaṇo vā sammā brahma-cārī paṭijānamāno na h'eva kho mātu-gāmena saddhiɱ dvayandvayasamāpattiɱ samāpajjati,||
na pi mātu-gāmassa ucchādanaparimaddananahāpana sambāhanaɱ sādiyati,||
na pi mātu-gāmena saddhiɱ sañjagghati sankī'ati sanke'āyati,||
na pi mātu-gāmassa cakkhunā cakkhuɱ upanijjhāyati pekkhati,||
na pi mātu-gāmassa saddhaɱ suṇāti,||
tiro-kuḍḍaɱ vā tiro-pākāraɱ vā hasantiyā vā bhaṇantiyā vā gāyantiyā vā rodantiyā vā,||
na pi yānissa tāni pubbe mātugā mena saddhiɱ hasitalapitaki'itāni tāni anussarati,||
na pi passati pahapati,||
vāgahapati-puttaɱ vā pañcahi kāma-guṇehi samappitaɱ samaŋgibhūtaɱ parivāriyamānaɱ||
api ca kho aññataraɱ deva-nikāyaɱ paṇidhāya Brahma-cariyaɱ carati 'imināhaɱ sīlena vā vatena vā tapena vā brahma-cariyena vā devo vā bhavissāmi deva-ñ-ñataro vā' ti.|| ||

So taɱ assādeti,||
taɱ nikāmeti,||
tena ca vittiɱ āpajjati.|| ||

Idam pi kho brāhmaṇa,||
Brahma-cariyassa khaṇḍam pi chiddam pi sabalam pi kammāsam pi.|| ||

Ayaɱ vuccati brāhmaṇā,||
aparisuddhaɱ Brahma-cariyaɱ carati,||
saɱyutto methunena saɱyogena na parimuccati,||
jātiyā jarāyamaraṇena sokehi paridevehi dukkhehi domanassehi upāyāsehi.|| ||

Na parimuccati dukkhasmā ti vadāmi.|| ||

Yāvakīvañ c'āhaɱ brāhmaṇa||
imesaɱ sattannaɱ methunasaɱyogānaɱ aññataraññataraɱ methunasaɱyogaɱ attani appahīnaɱ samanupassiɱ,||
n'eva tāvāhaɱ brāhmaṇa,||
sa-devake loke sa-mārake sa-brahmake,||
sa-s-samaṇa-brāhmaṇiyā pajāyā sadeva-manussāya anuttaraɱ sammā-sambodhiɱ abhisambuddho paccaññāsiɱ.|| ||

Yato ca kho ahaɱ brāhmaṇa,||
imesaɱ sattannaɱ methunasaɱyogānaɱ na aññataraññataraɱ methunasaɱyogaɱ attani appahīnaɱ samanupassiɱ,||
ath'āhaɱ brāhmaṇa,||
sa-devake loke sa-mārake sa-brahmake,||
sa-s-samaṇa-brāhmaṇiyā pajāya sadeva-manussāya anuttaraɱ sammā-sambodiɱ abhisambuddho paccaññāsiɱ.|| ||

Ñāṇañ ca pana me dassanaɱ udapādi:|| ||

'Akuppā me ceto-vimutti,||
ayam antimā jāti,||
n'atthi dāni punabbhevo' ti.|| ||

 

§

 

Evaɱ vutte Jānussoṇī brāhmaṇo Bhagavantaɱ etad avoca:|| ||

'Abhikkantaɱ bho Gotama||
abhikkantaɱ bho Gotama,||
seyyathā pi bho Gotama nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya andha-kāre vā tela-pajjotaɱ dhāreyya,||
"cakkhūmanto rūpāni dakkhinti" ti,||
evam eva hotā Gotamena aneka-pariyāyena dhammo pakāsito.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan' ti.|| ||

 


Contact:
E-mail
Copyright Statement