Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Sattaka Nipāta
Mahā Vaggo

Sutta 67

Bhāvan-ā-nuyutta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[125]

[1][pts] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

2. Bhāvanaɱ ananuyttassa bhikkhave bhikkhuno viharato kiñ cāpi evaɱ icchā uppajjeyya:|| ||

"Aho vata me anupādāya āsavehi cittaɱ vimucceyyā" ti.|| ||

Atha khvassa n'eva anupādāya āsavehi cittaɱ vimuccati.|| ||

Taɱ kissa hetu?|| ||

"Abhāvitattātissa vacanīyaɱ."|| ||

Kissa abhāvitattā?|| ||

Catunnaɱ sati-paṭṭhānānaɱ,||
catunnaɱ samma-p-padhānānaɱ,||
catunnaɱ iddhi-pādānaɱ,||
pañcannaɱ indriyānaɱ,||
pañcannaɱ balānaɱ,||
sattannaɱ bojjhaŋgānaɱ,||
ariyassa aṭṭhaŋgikassa Maggassa.|| ||

Seyyathā pi, bhikkhave, kukkuṭiyā aṇḍāni aṭṭha vā||
dasa vā dvādasa vā,||
tānassu kukkuṭiyā na sammā adhisayitāni na sammā pariseditāni na sammā paribhā- [126] vitāni.|| ||

Kiñ cāpi tassā kukkuṭiyā evaɱ icchā uppajjeyya:|| ||

"Aho vata me kukkuṭapotakā pādanakhasikhāya vā||
mukhatuṇḍakena vā||
aṇḍakosaɱ padāletvā sottinā abhinibbhijjeyyun" ti.|| ||

Atha kho abhabbāva te kukkuṭapotakā pādanakhasikhāya vā||
mukhatuṇḍakena vā||
aṇḍakosaɱ padāletvā sotthinā abhinibbhijjituɱ.|| ||

Taɱ kissa hetu?|| ||

Tathā hi bhikkhave kukkuṭiyā aṇḍāni na sammā adhisayitāni na sammā pariseditāni,||
na sammā paribhāvitāni,||
evam eva kho, bhikkhave,||
bhāvanaɱ ananuyuttassa bhikkhuno viharato kiñcā pi evaɱ icchā uppajjeyya:|| ||

"Aho vata me anupādāya āsavehi cittaɱ vimucceyyā" ti.|| ||

Atha khavassa n'eva anupādāya āsavehi cittaɱ vimuccati.|| ||

Taɱ kissa hetu?|| ||

Abhāvitattātissa vacanīyaɱ.|| ||

Kissa abhāvitattā?|| ||

Catunnaɱ sati-paṭṭhānānaɱ,||
catunnaɱ samma-p-padhānānaɱ,||
catunnaɱ iddhi-pādānaɱ,||
pañcannaɱ indriyānaɱ,||
pañcannaɱ balānaɱ,||
sattannaɱ bojjhaŋgānaɱ,||
ariyassa aṭṭhaŋgikassa Maggassa.|| ||

3. Bhāvanaɱ anuyuttassa bhikkhave, bhikkhuno viharato kiñ cāpi na evaɱ icchā uppajjeyya:|| ||

"Aho vata me anupādāya āsavehi cittaɱ vimucceyyā" ti.|| ||

Atha khvassa anupādāya āsavehi cittaɱ vimuccati.|| ||

Taɱ kissa hetu?|| ||

Bhāvitattātissa vacanīyaɱ.|| ||

Kissa bhāvitattā?|| ||

Catunnaɱ sati-paṭṭhānānaɱ,||
catunnaɱ samma-p-padhānānaɱ,||
catunnaɱ iddhi-pādānaɱ,||
pañcannaɱ indriyānaɱ,||
pañcannaɱ balānaɱ,||
sattannaɱ bojjhaŋgānaɱ,||
ariyassa aṭṭhaŋgikassa Maggassa.|| ||

Seyyathā pi, bhikkhave, kukkuṭiyā aṇḍāni aṭṭha vā dasa vā dvādasa vā,||
tān'assu kukkuṭiyā sammā-adhisayitāni sammā-pariseditāni sammā-paribhāvitāni.|| ||

Kiñ cāpi tassā kukkuṭiyā na evaɱ icchā uppajjeyya:|| ||

"Aho vata me kukkuṭapotakā pādanakhasikhāya vā mukhatuṇḍakena vā||
aṇḍakosaɱ padāletvā sottinā abhinibbhijjeyyun" ti.|| ||

Atha kho bhabbā'va te kukkuṭapotakā pādanakhasikhāya vā mukhatuṇḍakena vā aṇḍakosaɱ padāletvā sotthinā abhinibbhijjituɱ.|| ||

Taɱ kissa hetu?|| ||

Tathā h'amuni bhikkhave kukkuṭiyā aṇḍāni sammā-adhisayitāni sammā-pariseditāni, sammā-paribhāvitāni.|| ||

Evam eva kho bhikkhave bhāvanaɱ ananuyuttassa bhikkhuno viharato kiñ cāpi na evaɱ icchā uppajjeyya:|| ||

"Aho [127] vata me anupādāya āsavehi cittaɱ vimucceyyā" ti.|| ||

Atha khavassa anupādāya āsavehi cittaɱ vimuccati.|| ||

Taɱ kissa hetu?|| ||

Bhāvitattā ti'ssa vacanīyaɱ.|| ||

Kissa bhāvitattā?|| ||

Catunnaɱ sati-paṭṭhānānaɱ,||
catunnaɱ samma-p-padhānānaɱ,||
catunnaɱ iddhi-pādānaɱ,||
pañcannaɱ indriyānaɱ,||
pañcannaɱ balānaɱ,||
sattannaɱ bojjhaŋgānaɱ,||
ariyassa aṭṭhaŋgikassa Maggassa.|| ||

4. Seyyathā pi, bhikkhave, palagaṇḍassa vā palagaṇḍantevāsikassa vā dissante'va vāsijaṭe aŋgulipadāni dissati aŋguṭṭhapadaɱ, no ca khvāssa evaɱ ñāṇaɱ hoti:|| ||

"Ettakaɱ vā me ajja vāsijaṭassa khīṇaɱ,||
ettakaɱ hīyyo,||
ettakaɱ pare" ti.|| ||

Atha khavāssa khīṇe khīṇante'va ñāṇaɱ hoti:|| ||

Evam eva kho bhikkhave, bhāvanaɱ anuyuttassa bhikkhuno viharato kiñ cāpi na evaɱ ñāṇaɱ hoti:|| ||

"Ettakaɱ me ajja āsavānaɱ khīṇaɱ,||
ettakaɱ vā bhiyyo,||
ettakaɱ vā pare" ti.|| ||

Atha khavāssa khīṇe khīṇante'va ñāṇaɱ hoti.|| ||

Seyyathā pi, bhikkhave, sāmuddikāya nāvāya vettabandhanabaddhāya chammāsāni udake pariyādāya hemantikena thale ukkhittāya vāt'ātapaparetāni bandhanāni,||
tāni pāvussakena meghena ahippavuṭṭāni appakasiren'eva paṭippassambhanti putikāni bhavanti:||
evam eva kho, bhikkhave, bhāvanaɱ anuyuttassa bhikkhuno viharato appakasiren'eva saŋyojanāni paṭippassambhanti pūtikānī bhavantī ti.|| ||

 


Contact:
E-mail
Copyright Statement