Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
VIII. Aṭṭhaka Nipāta
I: Mettā Vagga

Sutta 2

Ādi-Brahma-Cariya-Paññā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[151]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Aṭṭh'ime bhikkhave, hetu aṭṭha paccayā ādi-Brahma-cariyikāya paññāya appaṭiladdhāya paṭilābhāya,||
paṭiladdhāya bhiyyo bhāvāya vepullāya bhāvanāya pāripūriyā saŋvattanti.|| ||

Katame aṭṭha?|| ||

2. Idha, bhikkhave, bhikkhu Satthāraɱ upanissāya viharati,||
aññataraɱ vā garu-ṭ-ṭhāniyaɱ sa-Brahma-cāriɱ yatth'assa tibbaɱ hir'ottappaɱ pacc'upaṭṭhitaɱ hoti pemañva gāravo ca.|| ||

Ayaɱ bhikkhave, paṭhamo hetu||
paṭhamo paccayo||
ādi-Brahma-cariyi'kāya paññāya appaṭiladdhāya paṭilābhāya paṭiladdhāya bhiyyo bhāvāya vepullāya bhāvanāya pāripūriyā saŋvattati.|| ||

[152]2. So taɱ Satthāraɱ upanissāya viharati aññataraɱ vā garu-ṭ-ṭhāniyaɱ sa-Brahma-cāriɱ,||
yatth'assa tibbaɱ hir'ottappaɱ pacc'upaṭṭhitaɱ hoti.|| ||

Pemañ ca gāravo ca,||
te kālena kālaɱ upasankamitvā paripucchati,||
paripañhati.|| ||

Idaɱ bhante kathaɱ?|| ||

Imassa kvattho ti?|| ||

Tassa te āyasmanto avivaṭaɱ c'eva vivaranti.|| ||

Anuttānīkataɱ ca uttānīɱ karontī ti.|| ||

Aneka-vihitesu kaŋkha-ṭ-ṭhānīyesu dhammse kaŋkhaɱ paṭivinodenti.|| ||

Ayaɱ bhikkhave, dutiyo hetu||
dutiyo paccayo||
ādi-Brahma-cariyikāya paññāya appaṭiladdhāya paṭilābhāya paṭiladdhāya bhiyyo bhāvāya vepullāya bhāvanāya pāripūriyā saŋvattati.|| ||

3. So taɱ dhammaɱ sutvā dvayena vūpakāsena sampādeti,||
kāya-vūpakāsena ca citta-vūpakāsena ca.|| ||

Ayaɱ bhikkhave, tatiyo hetu||
tatiyo paccayo||
ādi-Brahma-cariyikāya paññāya appaṭiladdhāya paṭilābhāya paṭiladdhāya bhiyyo bhāvāya vepullāya bhāvanāya pāripūriyā saŋvattati.|| ||

4. Sīlavā ca hoti Pātimokkha-saɱvara-saɱvuto viharati,||
ācāra-gocara-sampanno aṇumattesu vajjesu bhaya-dassāvī samādāya sikkhati sikkhā-padesu.|| ||

Ayaɱ bhikkhave, catuttho hetu||
catuttho paccayo||
ādi-Brahma-cariyikāya paññāya appaṭiladdhāya paṭilābhāya paṭiladdhāya bhiyyo bhāvāya vepullāya bhāvanāya pāripūriyā saŋvattati.|| ||

5. Bahu-s-suto hoti suta-dharo suta-sanni-cayo,||
ye te dhammā ādi-kalyāṇā majjhe-kalyāṇā pariyosāna-kalyāṇā sātthaɱ savyañ janaɱ kevala-paripuṇṇaɱ parisuddhaɱ brahma-cariyaɱ abhivadanti,||
tathā-rūpassa dhammā bahu-s-sutā honti.|| ||

Dhatā vacasā paricitā manas-ā-nupekkhitā diṭṭhiyā suppaṭi-viddhā.|| ||

Ayaɱ bhikkhave, pañcamo hetu||
pañcamo paccayo||
ādi-Brahma-cariyikāya paññāya appaṭiladdhāya paṭilābhāya paṭiladdhāya bhiyyo bhāvāya vepullāya bhāvanāya pāripūriyā saŋvattati.|| ||

[153]6. Āraddha-viriyo viharati akusalānaɱ dhammānaɱ pahānāya kusalānaɱ dhammānaɱ upasampadāya thāmavā daḷha-parakkamo anikkhitta-dhuro kusalesu dhammesu.|| ||

Ayaɱ bhikkhave, chaṭṭho hetu||
chaṭṭho paccayo||
ādi-Brahma-cariyikāya paññāya appaṭiladdhāya paṭilābhāya paṭiladdhāya bhiyyo bhāvāya vepullāya bhāvanāya pāripūriyā saŋvattati.|| ||

7. Saɱghagato kho pana anānākathiko hoti,||
atiracchānakathiko hoti,||
sāmaɱ vā dhammaɱ bhāsati,||
paraɱ vā ajjhesati,||
ariyaɱ vā tuṇhī-bhāvaɱ nātimaññati.|| ||

Ayaɱ bhikkhave, sattamo hetu||
sattamo paccayo||
ādi-Brahma-cariyikāya paññāya appaṭiladdhāya paṭilābhāya paṭiladdhāya bhiyyo bhāvāya vepullāya bhāvanāya pāripūriyā saŋvattati.|| ||

8. Pañcasu kho pana upādāna-k-khandhesu udayabbayānupassī viharati "Iti rūpaɱ,||
iti rūpassa samudayo,||
iti rūpassa atthagamo,||
iti vedanā,||
iti vedanāya samudayo,||
iti vedanāya atthagamo,||
iti saññā iti saññāya samudayo,||
iti saññāya atthagamo,||
iti sankhārā,||
iti sankhārānaɱ samudayo iti sankhārānaɱ atthagamo,||
iti viññāṇaɱ,||
iti viññāṇassa samudayo,||
viññāṇassa atthagamo'ti.|| ||

Ayaɱ bhikkhave, aṭṭhamo hetu||
aṭṭhamo paccayo||
ādi-Brahma-cariyikāya paññāya appaṭiladdhāya paṭilābhāya paṭiladdhāya bhiyyo bhāvāya vepullāya bhāvanāya pāripūriyā saŋvattati.|| ||

 

§

 

9. Tam enaɱ sa-Brahma-cārī evaɱ sambhāvayanti:||
"Ayaɱ kho āyasmā Satthāraɱ upanissāya viharati,||
aññataraɱ vā garu-ṭ-ṭhāniyaɱ sa-Brahma-cāriɱ,||
yatth'assa tibbaɱ hir'ottappaɱ pacc'upaṭṭhitaɱ hoti pemañca gāravo ca.|| ||

Addhā ayam āyasmā jānaɱ jānāti passaɱ passatī" ti.|| ||

Ayam pi dhammo piyattāya garuttāya bhāvanāya sāmaññāya ekī-bhāvāya saŋvattati.|| ||

10. Taɱ kho panāyam āyasmā Satthāraɱ upanissāya viharanto aññataraɱ vā garu-ṭ-ṭhāniyaɱ sa-Brahma-cāriɱ yatth'assa tibbaɱ hir'ottappaɱ pacc'upaṭṭhitaɱ hoti [154] pemañ ca gāravo ca,||
te kālena kālaɱ upasankamitvā paripucchati paripañhati:|| ||

Idaɱ bhante kathaɱ?|| ||

Imassa kvatthoti?"|| ||

Tassa te āyasmanto avivaṭaɱ c'eva vivaranti,||
anuttānīkatañ ca uttānīɱ karontī.|| ||

Aneka-vihitesu ca kaŋkhāṭhāniyesu dhammesu kaŋkhaɱ paṭivinodenti addhā ayam āyasmā jānaɱ jānāti passaɱ passatī ti.|| ||

Ayam pi dhammo piyattāya garuttāya bhāvanāya sāmaññāya ekī-bhāvāya saŋvattati.|| ||

11. 'Taɱ kho panāyam āyasmā dhammaɱ sutvā dvayena vūpakāsena sampādeti:||
kāya-vūpakāsena ca citta-vūpakāsena ca.|| ||

Addhā ayam āyasmā jānaɱ jānāti passaɱ passatī' ti.|| ||

Ayam pi dhammo piyattāya garuttāya bhāvanāya sāmaññāya ekībhāvāya saɱvattati.|| ||

'Sīlavā kho panāyam āyasmā Pātimokkha-saɱvara-saɱvuto viharati ācāra-gocara-sampanno,||
aṇumattesu vajjesu bhayadassāvī,||
samādāya sikkhati sikkhāpadesu.|| ||

Addhā ayam āyasmā jānaɱ jānāti passaɱ passatī' ti.|| ||

Ayam pi dhammo piyattāya garuttāya bhāvanāya sāmaññāya ekībhāvāya saɱvattati.|| ||

13. 'Bahussuto kho panāyam āyasmā sutadharo sutasannicayo.|| ||

Ye te dhammā ādikalyāṇā majjhe kalyāṇā pariyosāna-kalyāṇā sātthaɱ savyañjanaɱ kevala-paripuṇṇaɱ parisuddhaɱ brahma-cariyaɱ abhivadanti,||
tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.|| ||

Addhā ayam āyasmā jānaɱ jānāti passaɱ passatī' ti.|| ||

Ayam pi dhammo piyattāya garuttāya bhāvanāya sāmaññāya ekībhāvāya saɱvattati.|| ||

14. 'Āraddha-vīriyo kho panāyam āyasmā viharati akusalānaɱ dhammānaɱ pahānāya,||
kusalānaɱ dhammānaɱ upasampadāya,||
thāmavā daḷhaparakkamo anikkhittadhuro kusalesu dhammesu.|| ||

Addhā ayam āyasmā jānaɱ jānāti passaɱ passatī' ti.|| ||

Ayam pi dhammo piyattāya garuttāya bhāvanāya sāmaññāya ekībhāvāya saɱvattati.|| ||

[155] 15. 'Saŋghagato kho panāyam āyasmā anānākathiko hoti atira-c-chāna-kathiko.|| ||

Sāmaɱ vā dhammaɱ bhāsati||
paraɱ vā ajjhesati||
ariyaɱ vā tuṇhībhāvaɱ nātimaññati.|| ||

Addhā ayam āyasmā jānaɱ jānāti passaɱ passatī' ti.|| ||

Ayam pi dhammo piyattāya garuttāya bhāvanāya sāmaññāya ekībhāvāya saɱvattati.|| ||

16. 'Pañcasu kho panāyam āyasmā upādāna-k-khandhesu udayabbay'ānupassī viharati|| ||

"Iti rūpaɱ,||
iti rūpassa samudayo,||
iti rūpassa atthaŋgamo;||
iti vedanā||
iti vedanassa samudayo,||
iti vedanassa atthaŋgamo;||
iti saññā||
iti saññassa samudayo,||
iti saññassa atthaŋgamo;||
iti saŋkhārā||
iti saŋkhārassa samudayo,||
iti saŋkhārassa atthaŋgamo;||
iti viññāṇaɱ,||
iti viññāṇassa samudayo,||
iti viññāṇassa atthaŋgamo" ti.|| ||

Addhā ayam āyasmā jānaɱ jānāti passaɱ passatī' ti.|| ||

Ayam pi dhammo piyattāya garuttāya bhāvanāya sāmaññāya ekībhāvāya saɱvattati.|| ||

Ime kho, bhikkhave, aṭṭha hetū||
aṭṭha paccayā||
ādi-Brahma-cariyi-kāya paññāya appaṭiladdhāya paṭilābhāya,||
paṭiladdhāya bhiyyobhāvāya vepullāya bhāvanāya pāripūriyā saɱvattantī" ti. || ||

 


Copyright Statement