Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
VIII. Aṭṭhaka Nipāta
I: Mettā Vagga

Sutta 6

Dutiya Lokadhamma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[157]

[1][pts][than][olds][bodh] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

Aṭṭh'ime bhikkhave, loka-dhammā||
lokaɱ anuparivattanti,||
loko ca aṭṭha loka-dhamme anuparivattati.|| ||

Katame aṭṭha?|| ||

Lābho ca alābho ca yaso ca ayaso ca nindā ca pasaɱsā ca sukhaɱ ca dukkhaɱ ca,||
ime kho bhikkhave,||
aṭṭha-loka-dhammā lokaɱ anuparivattanti.|| ||

Loko ca ime aṭṭha-loka-dhamme anuparivattati.|| ||

A-s-sutavato bhikkhave,||
puthujjanassa uppajjati lābho pi,||
alābho pi,||
yaso pi,||
ayaso pi,||
nindā pi,||
pasaɱsā pi,||
sukham pi,||
dukkham pi.|| ||

Sutavato pi kho bhikkhave,||
ariya-sāvakassa uppajjati lābho pi,||
alābho pi,||
yaso pi,||
ayaso pi,||
nindā pi,||
pasaɱsā pi,||
sukham pi,||
dukkham pi.|| ||

Tatra, bhikkhave,||
ko viseso [158] ko adhippayāso kiɱ nānā-karaṇaɱ sutavato ariya-sāvakassa a-s-sutavatā puthujjanenāti?|| ||

Bhagava mūlakā no bhante dhammā,||
Bhagavantettikā,||
Bhagavam-paṭisaraṇā.|| ||

Sādhu vata bhante,||
Bhagavantaɱ yeva paṭibhātu etassa bhāsitassa attho,||
Bhagavato sutvā bhikkhū dhāressantī ti.|| ||

Tena hi bhikkhave,||
suṇātha sādhukaɱ manasi karotha,||
bhāsissāmī" ti.|| ||

"Evaɱ bhante" ti kho te bhikkhū Bhagavato paccassosuɱ.|| ||

Bhagavā etad avoca:|| ||

3. A-s-sutavato bhikkhave,||
puthujjanassa uppajjati lābho,||
so na iti paṭisañcikkha ti:|| ||

Uppanno kho me ayaɱ lābho,||
so ca kho anicco dukkho viparināmadhammoti,||
yathā-bhūtaɱ na-p-pajānā ti.|| ||

Uppajjati alābho,||
so na iti paṭisañcikkha ti:|| ||

Uppanno kho me ayaɱ alābho,||
so ca kho anicco dukkho viparināmadhammoti,||
yathā-bhūtaɱ na-p-pajānā ti.|| ||

Uppajjati yaso,||
so na iti paṭisañcikkhati:|| ||

Uppanno kho me ayaɱ yaso,||
so ca kho anicco dukkho viparināmadhammoti,||
yathā-bhūtaɱ na-p-pajānā ti.|| ||

Uppajjati ayaso,||
so na iti paṭisañcikkhati:|| ||

Uppanno kho me ayaɱ ayaso,||
so ca kho anicco dukkho viparināmadhammoti,||
yathā-bhūtaɱ na-p-pajānā ti.|| ||

Uppajjati nindā so na iti paṭisañcikkhati:|| ||

Uppannā kho me ayaɱ nindā,||
sā ca kho aniccā dukkhā viparināmadhammāti,||
yathā-bhūtaɱ na-p-pajānāti.|| ||

Uppajjati pasaɱsā so na itipaṭisañcikkhati:|| ||

Uppannā kho me ayaɱ pasaɱsā,||
sā ca kho aniccā dukkhā viparināmadhammāti,||
yathā-bhūtaɱ na-p-pajānāti.|| ||

Uppajjati sukhaɱ,||
so na iti paṭisañcikkhati:|| ||

Uppannaɱ kho me idaɱ sukhaɱ,||
taɱ ca kho aniccaɱ dukkhaɱ viparināmadhammanti,||
yathā-bhūtaɱ na-p-pajānāti.|| ||

Uppajjati dukkhaɱ,||
so na itipaṭisañcikkhati uppannaɱ kho me idaɱ dukkhaɱ,||
taɱ ca kho aniccaɱ dukkhaɱ viparināmadhammanti.|| ||

Yathā-bhūtaɱ na-p-pajānāti.|| ||

Tassa lābhopi cittaɱ pariyādāya tiṭṭhati,||
alobho pi cittaɱ pariyādāya tiṭṭhati,||
yasopi cittaɱ pariyādāya tiṭṭhati,||
ayasopi cittaɱ pariyādāya tiṭṭhati,||
nindā pi cittaɱ pariyādāya tiṭṭhati,||
pasaɱsāpi cittaɱ pariyādāya tiṭṭhati.|| ||

Sukham pi cittaɱ pariyādāya tiṭṭhati,||
dukkhampi cittaɱ pariyādāya tiṭṭhati.|| ||

So uppantaɱ lābhaɱ anurujjhati alābhe paṭivirujjhati.|| ||

Uppantaɱ yasaɱ anurujjhati ayase paṭivirujjhati uppannaɱ pasaɱsaɱ anurujjhati nindāya paṭivirujjhati.|| ||

Uppannaɱ sukhaɱ anurujjhati.|| ||

Dukkhe paṭivirujjhati so evaɱ anurodhavirodhasamāpanno na parimuccati,||
jātiyā jarāya maraṇena sokehi paridevehi dukkhehi domanassehi upāyāsehi,||
na parimuccati dukkhasmāti vadāmi.|| ||

4. Sutavato ca kho bhikkhave,||
ariya-sāvakassa uppajjati lābho.|| ||

So iti paṭisañcikkhati;||
Uppanto kho me ayaɱ lābho so ca kho anicco dukkho viparināmadhammoti yathā-bhūtaɱ pajānāti.|| ||

Uppajjati alābho.|| ||

So iti paṭisañcikkhati uppanto kho me ayaɱ alābho so ca kho anicco dukkho viparināmadhammoti yathā-bhūtaɱ pajānāti.|| ||

Uppajjati yaso.|| ||

[159] So iti paṭisañcikkhati uppanto kho me ayaɱ yaso.|| ||

So ca kho anicco dukkho viparināmadhammoti yathā-bhūtaɱ pajānāti.|| ||

Uppajjati ayaso.|| ||

So iti paṭisañcikkhati uppanno kho me ayaɱ ayaso.|| ||

So ca kho anicco dukkho viparināmadhammoti yathā-bhūtaɱ pajānāti.|| ||

Uppajjati nindā.|| ||

So iti paṭisañcikkhati uppantā kho me ayaɱ nindā.|| ||

Sā ca kho aniccā dukkhā viparināmadhammāti yathā-bhūtaɱ pajānāti.|| ||

Uppajjati pasaɱsā.|| ||

So iti paṭisañcikkhati uppantā kho me ayaɱ pasaɱsā.|| ||

Sā ca kho aniccā dukkhā viparināmadhammāti yathā-bhūtaɱ pajānāti.|| ||

Uppajjati sukhaɱ.|| ||

So iti paṭisañcikkhati uppantaɱ kho me idaɱ sukhaɱ.|| ||

Taɱ ca kho aniccaɱ dukkhaɱ viparināmadhammanti yathā-bhūtaɱ pajānāti.|| ||

Uppajjati dukkhaɱ.|| ||

So iti paṭisañcikkhati:|| ||

Uppannaɱ kho me idaɱ dukkhaɱ.|| ||

Tañ ca kho aniccaɱ dukkhaɱ viparināmadhammanti yathā-bhūtaɱ pajānāti.|| ||

Tassa lābho pi cittaɱ na pariyādāya tiṭṭhati,||
alobho pi cittaɱ na pariyādāya tiṭṭhati,||
yaso pi cittaɱ na pariyādāya tiṭṭhati,||
ayaso pi cittaɱ na pariyādāya tiṭṭhati,||
nindā'pi cittaɱ na pariyādāya tiṭṭhati,||
pasaɱsā'pi cittaɱ na pariyādāya tiṭṭhati,||
sukhampi cittaɱ na pariyādāya tiṭṭhati,||
dukkhampi cittaɱ na pariyādāya tiṭṭhati.|| ||

So uppannaɱ lābhaɱ nānurujjhati,||
alābhe nappaṭivirujjhati.|| ||

Uppannaɱ yasaɱ nānurujjhati,||
ayase nappaṭivirujjhati.|| ||

Uppannaɱ pasaɱsaɱ nānurujjhati,||
nindāya nappaṭivirujjhati.|| ||

Uppannaɱ sukhaɱ nānurujjhati,||
dukkhe nappaṭivirujjhati.|| ||

So evaɱ anurodhavirodhavi-p-pahīno parimuccati jātiyā jarāya maraṇena sokehi paridevehi dukkhehi domanassehi upāyāsehi.|| ||

Parimuccati dukkhasmāti vadāmi.|| ||

Ayaɱ kho bhikkhave,||
viseso ayaɱ adhippayāso idaɱ nānā-karaṇaɱ sutavato ariya-sāvakassa a-s-sutavatā puthujjanenāti.|| ||

Lābho alābho ayaso yaso ca||
Nindā pasaɱsā ca sukhañ ca dukkhaɱ,||
Ete aniccā manujesu dhammā||
Asassatā viparīnāmadhammā.|| ||

Ete ca ñatvā satimā su medho||
Avekkhati viparīnāmadhamme||
Iṭṭhassa dhammā na mathenti cittaɱ||
Aniṭṭhato no paṭighātameti.|| ||

Tassānurodhā [160] atha vā virodhā||
Vidhūpitā atthagatā na santi,||
Padañca ñatvā virajaɱ asokaɱ||
Sammappajānāti bhavassapāragūti.|| ||

 


Contact:
E-mail
Copyright Statement