Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
VIII. Aṭṭhaka Nipāta
III: Gahapati-Vagga

Sutta 24

Hatthaka-Āḷavaka Sangaha-Vatthu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[218]

[1][pts][than][bodh][olds] Ekaɱ samayaɱ Bhagavā Āḷaviyaɱ viharati Aggālave cetiye.|| ||

Atha kho Hatthako Āḷavako pañca-mattehi upā- [219] saka-satehi parivuto yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Hatthakaɱ Āḷavakaɱ Bhagavā etad avoca:|| ||

2. "Mahatī kho tyāyaɱ Hatthaka, parisā,||
kathaɱ pana tvaɱ Hatthaka,||
imaɱ mahatiɱ parisaɱ sangaṇhāhī" ti?|| ||

 

§

 

"Yān'imāni bhante,||
Bhagavatā desitāni cattāri sangaha-vatthūni,||
ten'āhaɱ imaɱ parisaɱ sangaṇhāmi:|| ||

Ahaɱ bhante, yaɱ jānāmi:|| ||

"Ayaɱ dānena sangahetabbo" ti,||
taɱ dānena sangaṇhāmi;|| ||

yaɱ jānāmi||
"Ayaɱ peyyavajjena sangahetabbo" ti,||
taɱ peyyavajjena sangaṇhāmi;|| ||

yaɱ jānāmi||
"Ayaɱ attha-cariyāya sangahetabbo" ti||
taɱ attha-cariyāya sangaṇhāmi;|| ||

yaɱ jānāmi||
"Ayaɱ samān'attatāya sangahetabbo" ti||
taɱ samān'attatāya sangaṇhāmi.|| ||

Saŋvijjanti kho pana me bhante, kule bhogā,||
daliddassa kho no tathā sotabbaɱ maññantī" ti.|| ||

3. "Sādhu sādhu Hatthaka!|| ||

Yoni kho tyāyaɱ Hatthaka,||
mahatiɱ parisaɱ sangahetuɱ.|| ||

Ye hi keci Hatthaka,||
atītam addhānaɱ parisaɱ sangahesuɱ,||
sabbe te imeh'eva catūhi sangaha-vatthūhi mahatiɱ parisaɱ sangahesuɱ.|| ||

Ye pi hi keci Hatthaka,||
anāgatam addhānaɱ mahatiɱ parisaɱ sangahessanti,||
sabbe te imeh'eva catūhi sangaha-vatthuhi mahatiɱ parisaɱ sangahi'ssanti.|| ||

Ye pi hi keci Hatthaka,||
etarahi mahatiɱ parisaɱ sangaṇhanti,||
sabbe te imeh'eva catūhi sangaha-vatthūhi mahatiɱ parisaɱ sangaṇhantī" ti.|| ||

4. Atha kho Hatthako Āḷavako Bhagavatā dhammiyā kathāya sanda-s-sito samāda-pito samutte-jito sampahaɱ-sito uṭṭhāy āsanā Bhagavantaɱ abhivādetvā padakkhiṇaɱ katvā [220] pakkāmi.|| ||

 

§

 

Atha kho Bhagavā acira-pakkante Hatthake Āḷavake bhikkhū āmantesi:|| ||

5. "Aṭṭhahi bhikkhave, acchariyehi abbhutehi dhammehi samannāgataɱ Hatthakaɱ Āḷavakaɱ dhāretha.|| ||

Katamehi aṭṭhahi?|| ||

6. Saddho bhikkhave, Hatthako Āḷavako,||
sīlavā bhikkhave, Hatthako Āḷavako,||
hirimā bhikkhave, Hatthako Āḷavako,||
ottapī bhikkhave, Hatthako Āḷavako,||
bahu-s-suto bhikkhave, Hatthako Āḷavako,||
cāgavā bhikkhave, Hatthako Āḷavako,||
paññavā bhikkhave, Hatthako Āḷavako,||
appiccho bhikkhave Hatthako Āḷavako.|| ||

Imehi kho bhikkhave, aṭṭhahi acchariyehi abbhutehi dhammehi samannāgataɱ Hatthakaɱ Āḷavakaɱ dhārethā" ti.|| ||

 


Contact:
E-mail
Copyright Statement