Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
II. Nātha Vagga

Sutta 20

Dutiya Ariya-Vāsa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[29]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Kurūsu viharati Kammāssa-dammaɱ [30] nāma Kurūnaɱ nigamo.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Dasa yime bhikkhave ariya-vāsā,||
ye ariyā āvasiɱsu vā||
āvasanti vā||
āvasissanti vā.|| ||

Katame dasa?|| ||

3. Idha bhikkhave bhikkhu||
pañc'aŋga-vi-p-pahīno hoti||
chaḷ-aŋga-samannā-gato||
ek'ārakkho||
catur'āpasseno||
panuṇṇa-pacc'eka-sacco||
sama-vaya-saṭṭh'esano||
anāvila-saŋkappo||
passaddha-kāya-sankhāro||
su-vimutta-citto||
su-vimutta-pañño.|| ||

 

§

 

4. Kathañ ca bhikkhave bhikkhu pañc'aŋga-vi-p-pahīno hoti?|| ||

Idha, bhikkhave, bhikkhuno kāma-c-chando pahīno hoti,||
vyāpādo pahīno hoti,||
thīna-middhaɱ pahīnaɱ hoti,||
uddhacca-kukkuccaɱ pahīnaɱ hoti,||
vicikicchā pahīnā hoti.|| ||

Evaɱ kho bhikkhave bhikkhu pañc'aŋga-vi-p-pahīno hoti.|| ||

5. Kathañ ca bhikkhave bhikkhu chaḷ-aŋga-samannā-gato hoti?|| ||

Idha, bhikkhave, bhikkhu cakkhunā rūpaɱ disvā n'eva sumano hoti,||
na dummano.|| ||

Upekkhako viharati sato sampajāno.|| ||

-◦-

Sotena saddaɱ sutvā n'eva sumano hoti,||
na dummano||
upekkhako viharati sato sampajāno.|| ||

-◦-

Ghānena gandhaɱ ghāyitvā n'eva sumano hoti,||
na dummano||
upekkhako viharati sato sampajāno.|| ||

-◦-

Jivhāya rasaɱ sāyitvā n'eva sumano hoti,||
na dummano||
upekkhako viharati sato sampajāno.|| ||

-◦-

Kāyena poṭṭabbaɱ phusitvā n'eva sumano hoti,||
na dummano||
upekkhako viharati sato sampajāno.|| ||

-◦-

Manasā dhammaɱ viññāya n'eva sumano hoti,||
na dummano||
upekkhako viharati sato sampajāno.|| ||

Evaɱ kho bhikkhave bhikkhu chaḷ-aŋga-samannā-gato hoti.|| ||

6. Kathañ ca bhikkhave bhikkhu ek'ārakkho hoti?|| ||

Idha, bhikkhave, bhikkhu sat'ārakkhena cetasā samannāgato hoti.|| ||

Evaɱ kho bhikakhave bhikakhu ek'ārakakho hoti.|| ||

7. Kathañ ca bhikkhave bhikkhu catur'āpasseno hoti?|| ||

Idha, bhikkhave, bhikkhu saŋkhāy'ekaɱ paṭisevati.|| ||

Saŋkhāy'ekaɱ adhivāseti,||
saŋkhāy'ekaɱ parivajjeti,||
saŋkhāy'ekaɱ vinodeti.|| ||

Evaɱ kho bhikkhave bhikkhu catur'āpasseno hoti.|| ||

[31] 8. Kathañ ca bhikkhave bhikkhu panuṇṇa-pacc'eka-sacco hoti?|| ||

Idha, bhikkhave, bhikkhuno yāni tāni puthu-samaṇa-brāhmaṇānaɱ||
puthu-pacceka-saccāni||
seyyath'īdaɱ:|| ||

'Sassato loko' ti vā;||
'Assato loko' ti vā;||
'Antavā loko' ti vā;||
'Anantavā loko' ti vā;||
'Taɱ jīvaɱ taɱ sarīran' ti vā;||
'Aññaɱ jīvaɱ aññaɱ sarīran' ti vā;||
'Hoti Tathāgato param maraṇā' ti vā;||
'Na hoti Tathāgato param maraṇā' ti vā;||
'Hoti va na hoti va Tathāgato param maraṇā' ti vā;||
'N'eva hoti na na hoti Tathāgato param maraṇā' ti vā.|| ||

Sabbāni tāni nuṇṇāni honti panuṇṇāni,||
cattāni vantāni muttāni pahīnāni paṭinissaṭṭhāni,||
evaɱ kho bhikkhave bhikkhu panuṇṇa pacceka-sacco hoti.|| ||

9. Kathañ ca bhikkhave bhikkhu sama-vaya-saṭṭh'esano hoti?|| ||

Idha, bhikkhave, bhikkhuno kām'esanā pahīnā hoti,||
bhav'esanā pahīnā hoti,||
brahma-cariy'esanā paṭi-p-passaddhā.|| ||

Evaɱ kho bhikkhave bhikkhu sama-vaya-saṭṭh'esano hoti.|| ||

10. Kathañ ca bhikkhave bhikkhu anāvila-saŋkappo hoti?|| ||

Idha, bhikkhave, bhikkhuno kāma-saŋkappo pahīno hoti,||
vyāpāda-saŋkappo pahīno hoti,||
vihiɱsā-saŋkappo pahīno hoti.|| ||

Evaɱ kho bhikkhave bhikkhu anāvila-saŋkappo hoti.|| ||

11. Kathañ ca bhikkhave bhikkhu passaddha-kāya-sankhāro hoti?|| ||

Idha, bhikkhave, bhikkhu sukhassa ca pahānā||
dukkhassa ca pahānā||
pubb'eva somanassa domanassānaɱ atthaŋ-gamā||
adukkha-m-asukhaɱ||
upekkhā-sati-pārisuddhiɱ||
catuttha-jhānaɱ upasampajja viharati.|| ||

Evaɱ kho bhikkhave bhikkhu passaddha-kāya-sankhāro hoti.|| ||

12. Kathañ ca bhikkhave bhikkhu su-vimutta-citto hoti?|| ||

Idha, bhikkhave, bhikkhuno rāgā cittaɱ vimuttaɱ hoti,||
dosā cittaɱ vimuttaɱ hoti,||
mohā cittaɱ vimuttaɱ hoti.|| ||

Evaɱ kho bhikkhave bhikkhu su-vimutta-citto hoti.|| ||

13. Kathañ ca bhikkhave bhikkhu su-vimutta-pañño hoti?|| ||

[32] Idha, bhikkhave, bhikkhu:|| ||

'Rāgo me pahīno,||
ucchinna-mūlo tālā-vatthu-kato,||
anabhāva-kato.|| ||

Āyatiɱ anuppāda-dhammo' ti pajānāti.|| ||

-◦-

'Doso me pahīno,||
ucchinna-mūlo tālā-vatthu-kato,||
anabhāva-kato.|| ||

Āyatiɱ anuppāda-dhammo' ti pajānāti.|| ||

-◦-

'Moho me pahīno ucchinna-mūlo tālā-vatthu-kato,||
anabhāva-kato.|| ||

Āyatiɱ anuppāda-dhammo' ti pajāniti.|| ||

Evaɱ kho bhikkhave bhikkhu su-vimutta-pañño hoti.|| ||

 

§

 

Ye hi keci bhikkhave atītam addhānaɱ ariyā ariyavāse āvasiɱsu,||
sabbe te im'eva dasa ariyavāse āvasiɱsu.|| ||

Ye hi keci, bhikkhave, anāgatam addhānaɱ ariyā ariyavāse āvasissanti,||
sabbe te im'eva dasa ariyavāse āvasissanti.|| ||

Ye hi keci, bhikkhave, etarahi ariyā ariyavāse āvasanti,||
sabbe te im'eva dasa ariyavāse āvasanti.|| ||

Ime kho bhikkhave dasa ariya-vāsā,||
ye ariyā āvasiɱsu vā,||
āvasanti vā,||
āvasissanti vā" ti.|| ||

Nātha Vaggo Dutiyo

 


Contact:
E-mail
Copyright Statement