Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
II. Majjhima-Paṇṇāsa
2. Bhikkhu Vagga

Sutta 65

Bhaddāli Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[437]

[1][chlm][pts][ntbb][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Ahaɱ kho bhikkhave ekāsanabhojanaɱ bhuñjāmi.|| ||

Ekā-sanabhojanaɱ kho ahaɱ bhikkhave bhuñjamāno appābādhatañ ca||
sañjānāmi appātaŋkatañ ca||
lahuṭṭhānañ ca||
balañ ca||
phāsu-vihārañ ca.|| ||

Etha tumhe pi bhikkhave ekāsanabhojanaɱ bhuñjatha,||
ekāsanabhojanaɱ kho bhikkhave tumhepi bhuñjamānā appābādhatañ ca sañjānissatha appātaŋkatañ ca lahuṭṭhānañca balañca phāsu-vihārañcāti.|| ||

Evaɱ vutte āyasmā Bhaddāli Bhagavantaɱ etad avoca: ' ahaɱ kho bhante na ussahāmi ekāsanabhojanaɱ bhuñjituɱ.|| ||

Ekāsanabhojanaɱ hi me bhante bhuñjato siyā kukkuccaɱ,||
siyā vippaṭisāro ti.|| ||

Tena hi tvaɱ Bhaddāli yattha nimantito assasi tattha ekadesaɱ bhuñjitvā ekadesaɱ nīharitvāpi bhuñjeyyāsi.|| ||

Evam pi [438] kho tvaɱ Bhaddāli bhuñjamāno2 yāpessasīti.|| ||

Evam pi kho ahaɱ bhante na ussahāmi bhuñjituɱ.|| ||

Evam pi hi me bhante bhuñjato siyā kukkuccaɱ siyā vippaṭisāro ti.|| ||

Atha kho āyasmā Bhaddāli Bhagavatā sikkhā-pade paññāpiyamāne bhikkhu-saŋghe sikkhaɱ samādiyamāne anussāhaɱ pavedesi.|| ||

Atha kho āyasmā Bhaddāli sabbantaɱ temāsaɱ na Bhagavato sammukhībhāvaɱ adāsi yathā taɱ satthu sāsane sikkhāya aparipūra-kārī.|| ||

Tena kho pana samayena sambahulā bhikkhū Bhagavato cīvara-kammaɱ karonti,||
niṭṭhita-cīvaro Bhagavā temāsaccayena cārikaɱ pakkamissatī ti.|| ||

Atha kho āyasmā Bhaddāli yena te bhikkhū ten'upasankami.|| ||

Upasaŋkamitvā tehi bhikkhūhī saddhiɱ sammodi,||
sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ Bhaddāliɱ te bhikkhū etad avocuɱ:|| ||

"Idaɱ kho āvuso Bhaddāli Bhagavato cīvara-kammaɱ karīya" ti.|| ||

Niṭṭhita-cīvaro Bhagavā temāsaccayena cārikaɱ pakkamissatī' ti.|| ||

Iŋghāvuso Bhaddāli etaɱ desakaɱ sādhukaɱ manasi karohi.|| ||

Mā te pacchā dukkarataraɱ ahosī ti.|| ||

"Evam āvuso" ti kho āyasmā Bhaddāli tesaɱ bhikkhūnaɱ paṭissutvā yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Bhaddāli Bhagavantaɱ etad avoca: accayo maɱ bhante accagamā yathā-bālaɱ yathāmūḷhaɱ yathā akusalaɱ,||
yohaɱ Bhagavatā sikkhā-pade paññāpiyamāne bhikkhu-saŋghe sikkhaɱ samādiyamāne anussāhaɱ pavedesiɱ.|| ||

Tassa me bhante Bhagavā accayaɱ accayato patigaṇhātu āyatiɱ saɱvarāyāti.|| ||

Taggha tvaɱ Bhaddāli accayo accagamā yathā-bālaɱ yathāmūḷhaɱ yathā akusalaɱ,||
yaɱ tvaɱ mayā sikkhā-pade paññāpiyamāne bhikkhu-saŋghe sikkhaɱ samādiyamāne anussāhaɱ pavedesi.|| ||

Samayo pi kho te Bhaddāli appaṭividdho ahosi,||
Bhagavā kho Sāvatthīyaɱ viharati.|| ||

Bhagavā pi maɱ jānissati:||
'Bhaddāli nāma bhikkhu Satthu sāsane sikkhāya aparipūra-kārī' ti.|| ||

Ayam pi kho te Bhaddāli samayo appaṭividdho ahosi.|| ||

Samayo pi kho te Bhaddāli appaṭividdho ahosi.|| ||

Sambahulā [439] kho bhikkhū Sāvatthīyaɱ vassaɱ upagatā,||
tepi maɱ jānissanti:||
'Bhaddāli nāma bhikkhu satthu sāsane sikkhāya aparipūra-kārī' ti.|| ||

Ayam pi kho te Bhaddāli samayo appaṭividdho ahosi.|| ||

Samayo pi kho te Bhaddāli appaṭividdho ahosi.|| ||

Sambahulā kho bhikkhuniyo Sāvatthīyaɱ vassaɱ upagatā,||
tāpi maɱ jānissanti:||
'Bhaddāli nāma bhikkhu satthu sāsane sikkhāya aparipūra-kārī' ti.|| ||

Ayam pi kho te Bhaddāli samayo appaṭividdho ahosi.|| ||

Samayo pi kho te Bhaddāli appaṭividdho ahosi.|| ||

Sambahulā kho upāsakā Sāvatthīyaɱ paṭivasanti.|| ||

Te pi maɱ jānissanti:||
'Bhaddāli nāma bhikkhu satthu sāsane sikkhāya aparipūra-kārī' ti.|| ||

Ayam pi kho te Bhaddāli samayo appaṭividdho ahosi.|| ||

Samayo pi kho te Bhaddāli appaṭividdho ahosi: sambahulā kho upāsikā Sāvatthīyaɱ paṭivasanti.|| ||

Tāpi maɱ jānissanti: Bhaddāli nāma bhikkhu satthu sāsane sikkhāya aparipūra-kārī' ti.|| ||

Ayam pi kho te Bhaddāli samayo appaṭividdho ahosi.|| ||

Samayo pi kho te Bhaddāli appaṭividdho ahosi: sambahulā kho nānā titthiyā samaṇa-brāhmaṇā Sāvatthīyaɱ vassaɱ upagatā,||
tepi maɱ jānissanti:||
'Bhaddāli nāma bhikkhu samaṇassa Gotamassa sāvako theraññataro satthu sāsane sikkhāya aparipūra-kārī' ti.|| ||

Ayam pi kho te Bhaddāli samayo appaṭividdho ahosī" ti.|| ||

"Accayo maɱ bhante accagamā yathā-bālaɱ yathāmūḷhaɱ yathā akusalaɱ,||
yo'haɱ Bhagavatā sikkhā-pade paññāpiyamāne bhikkhu-saŋghe sikkhaɱ samādiyamāne anussāhaɱ pavedesiɱ.|| ||

Tassa me bhante Bhagavā accayaɱ accayato patigaṇhātu āyatiɱ saɱvarāyā" ti.|| ||

"Taggha tvaɱ Bhaddāli accayo accagamā yathā-bālaɱ yathāmūḷhaɱ yathāakusalaɱ yaɱ tvaɱ mayā sikkhā-pade paññāpiyamāne bhikkhu-saŋghe sikkhaɱ samādiyamāne anussāhaɱ pavedesi.|| ||

Taɱ kiɱ maññasi Bhaddāli?|| ||

Idhassa bhikkhu ubhato-bhāga-vimutto,||
tam ahaɱ evaɱ vadeyyaɱ:|| ||

'Ehi me tvaɱ bhikkhu paŋke saŋkamo hohī' ti.|| ||

Apinu so saŋkameyya vā aññena vā kāyaɱ sannāmeyya,||
noti vā vadeyyā" ti.|| ||

"No h'etaɱ bhante."|| ||

"Taɱ kiɱ maññasi Bhaddāli?|| ||

'Idhassa bhikkhu paññā-vimutto,||
tam ahaɱ evaɱ vadeyyaɱ:|| ||

'Ehi me tvaɱ bhikkhu paŋke saŋkamo hohī' ti.|| ||

Apinu so saŋkameyya vā aññena vā kāyaɱ sannāmeyya,||
noti vā vadeyyā" ti.|| ||

"No h'etaɱ bhante."|| ||

"Taɱ kiɱ maññasi Bhaddāli?

Idh'assa bhikkhu kāyasakkhī,||
tam ahaɱ evaɱ vadeyyaɱ:|| ||

'Ehi me tvaɱ bhikkhu paŋke saŋkamo hohī' ti.|| ||

Apinu so saŋkameyya vā aññena vā kāyaɱ sannāmeyya,||
noti vā vadeyyā" ti?|| ||

"No h'etaɱ bhante."|| ||

"Taɱ kiɱ maññasi Bhaddāli?|| ||

Idhassa bhikkhu diṭṭha-p-patto,||
tam ahaɱ evaɱ vadeyyaɱ:|| ||

'Ehi me tvaɱ bhikkhu paŋke saŋkamo hohī' ti.|| ||

Apinu so saŋkameyya vā aññena vā kāyaɱ sannāmeyya,||
noti vā vadeyyā" ti.|| ||

"No h'etaɱ bhante."|| ||

"Taɱ kiɱ maññasi Bhaddāli?|| ||

Idhassa bhikkhu saddhā-vimutto,||
tam ahaɱ evaɱ vadeyyaɱ:|| ||

'Ehi me tvaɱ bhikkhu paŋke saŋkamo hohī' ti.|| ||

Apinu so saŋkameyya vā aññena vā kāyaɱ sannāmeyya,||
noti vā vadeyyā" ti?|| ||

"No h'etaɱ bhante."|| ||

"Taɱ kiɱ maññasi Bhaddāli?

Idhassa bhikkhu dhamm'ānusārī,||
tam ahaɱ evaɱ vadeyyaɱ:|| ||

'Ehi me tvaɱ bhikkhu paŋke saŋkamo hohī' ti.|| ||

Apinu so saŋkameyya vā aññena vā kāyaɱ sannāmeyya,||
noti vā vadeyyā" ti?|| ||

"No h'etaɱ bhante".|| ||

"Taɱ kiɱ maññasi Bhaddāli?|| ||

Idhassa bhikkhu saddh'ānusārī,||
tam ahaɱ evaɱ vadeyyaɱ:|| ||

'Ehi me tvaɱ bhikkhu paŋke saŋkamo hohī' ti.|| ||

Apinu so saŋkameyya vā aññena vā kāyaɱ sannāmeyya,||
noti vā vadeyyā" ti?|| ||

"No h'etaɱ bhante".|| ||

"Taɱ kiɱ maññasi Bhaddāli?|| ||

'Api nu tvaɱ Bhaddāli tasmiɱ samaye ubhato bhāga-vimutto vā hosi,||
paññā-vimutto [440] cā kāyasakkhī vā diṭṭha-p-patto vā saddhā-vimutto vā dhamm'ānusārī cā saddh'ānusārī vā" ti?|| ||

"No h'etaɱ bhante".|| ||

"Nanu tvaɱ Bhaddāli tasmiɱ samaye ritto tuccho aparaddho" ti?|| ||

"Evaɱ bhante".|| ||

Accayo maɱ bhante accagamā yathā-bālaɱ yathāmūḷhaɱ yathā akusalaɱ,||
yohaɱ Bhagavatā sikkhā-pade paññāpiyamāne bhikkhu-saŋghe sikkhaɱ samādiyamāne anussāhaɱ pavedesi.|| ||

Tassa me bhante Bhagava accayaɱ accayato patigaṇhātu āyatiɱ saɱvarāyā" ti.|| ||

"Taggha tvaɱ Bhaddāli accayo accagamā yathā-bālaɱ yathāmūḷhaɱ yathā akusalaɱ yaɱ tvaɱ mayā sikkhā-pade paññāpiyamāne bhikkhu-saŋghe sikkhaɱ samādiyamāne anussāhaɱ pavedesi.|| ||

Yato ca kho tvaɱ Bhaddāli accayaɱ accayato disvā yathā-dhammaɱ paṭikarosi.|| ||

Taɱ te mayaɱ patigaṇhāma.|| ||

Vuddhi hesā Bhaddāli ariyassa vinaye yo accayaɱ accayato disvā yathā-dhammaɱ paṭikaroti,||
āyatiɱ saŋvaraɱ āpajjati.|| ||

Idha Bhaddāli ekacco bhikkhu satthu sāsane sikkhāya aparipūra-kārī hoti,||
tassa evaɱ hoti: yan nūnāhaɱ vivittaɱ sen'āsanaɱ bhajeyyaɱ,||
araññaɱ rukkha-mūlaɱ pabbataɱ kandaraɱ giri-guhaɱ susānaɱ vana-patthaɱ abbhokāsaɱ pa'ālapuñjaɱ.|| ||

App'evanāmāhaɱ uttariɱ manussa-dhammā alam-ariya-ñāṇa-dassanavisesaɱ sacchikareyyanti.|| ||

So vivittaɱ sen'āsanaɱ bhajati,||
araññaɱ rukkha-mūlaɱ pabbataɱ kandaraɱ giri-guhaɱ susānaɱ vana-patthaɱ abbhokāsaɱ pa'ālapuñjaɱ.|| ||

Tassa tathā vūpakaṭṭhassa viharato Satthāpi upavadati.|| ||

Anuvicca pi viññū sabrahma-cārī upavadanti.|| ||

Devatā pi upavadanti.|| ||

Attāpi attānaɱ upavadati.|| ||

So Satthārāpi upavadito anuvicca viññūhi sabrahma-cārīhi upavadito devatāhipi upavadito attanāpi attānaɱ upavadito na uttariɱ manussa-dhammā2 alam-ariya-ñāṇa-dassanavisesaɱ sacchi-karoti.|| ||

Taɱ kissa hetu?|| ||

Evaɱ h'etaɱ Bhaddāli hoti,||
yathā taɱ satthu sāsane sikkhāya aparipūra-kārissa.|| ||

Idha Bhaddāli ekacco bhikkhu satthu sāsane sikkhāya paripūra-kārī hoti,||
tassa evaɱ hoti: yan nūnāhaɱ vivittaɱ sen'āsanaɱ bhajeyyaɱ,||
araññaɱ rukkha-mūlaɱ pabbataɱ kandaraɱ giri-guhaɱ susānaɱ vana-patthaɱ abbhokāsaɱ [441] pa'ālapuñjaɱ.|| ||

App'evanāmāhaɱ uttariɱ manussa-dhammā alam-ariya-ñāṇa-dassanavisesaɱ sacchikareyyanti.|| ||

So vivittaɱ sen'āsanaɱ bhajati,||
araññaɱ rukkha-mūlaɱ pabbataɱ kandaraɱ giri-guhaɱ susānaɱ vana-patthaɱ abbhokāsaɱ pa'ālapuñjaɱ.|| ||

Tassa tathā vūpakaṭṭhassa viharato Satthāpi na upavadati.|| ||

Anuvicca pi viññū sabrahma-cārī na upavadanti.|| ||

Na devatāpi na upavadanti.|| ||

Attāpi attānaɱ na upavadati.|| ||

So Satthārāpi anupavadito anuvicca viññūhi sabrahma-cārīhi anupavadito devatāhipi anupavadito attanāpi attānaɱ anupavadito uttariɱ manussa-dhammā2 alam-ariya-ñāṇa-dassanavisesaɱ sacchi-karoti.|| ||

So vivicc'eva kāmehi vivicca akusalehi dhammehi sa-vitakkaɱ sa-vicāraɱ viveka-jaɱ pīti-sukhaɱ paṭhamaɱ-jhānaɱ upasampajja viharati taɱ kissa hetu: evaɱ h'etaɱ Bhaddāli hoti yathātaɱ satthu sāsane sikkhāya paripūra-kārissa.|| ||

Puna ca paraɱ Bhaddāli bhikkhu vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhi-jaɱ pīti-sukhaɱ dutiyaɱ-jhānaɱ upasampajja viharati.|| ||

Taɱ kissa hetu?|| ||

Evaɱ h'etaɱ Bhaddāli hoti yathā taɱ satthu sāsane sikkhāya paripūra-kārissa.|| ||

Puna ca paraɱ Bhaddāli bhikkhu pītiyā ca virāgā upekkhako ca viharati.|| ||

Sato ca sampajāno sukhañca kāyena paṭisaŋvedeti.|| ||

Yantaɱ ariyā ācikkhanti 'Upekkhako satimā sukha-vihārī' ti,||
tatiyaɱ-jhānaɱ upasampajja viharati.|| ||

Taɱ kissa hetu?|| ||

Evaɱ h'etaɱ Bhaddāli hoti yathātaɱ satthu sāsane sikkhāya paripūra-kārissa.|| ||

Puna ca paraɱ Bhaddāli bhikkhu sukhassa ca pahānā dukkhassa ca pahānā pubbe va somanassa-domanassānaɱ atthaŋ-gamā adukkha-ɱ-asukhaɱ upekkhā sati-pārisuddhiɱ catutthaɱ-jhānaɱ upasampajja viharati.|| ||

Taɱ kissa hetu?|| ||

Evaɱ h'etaɱ Bhaddāli hoti yathātaɱ satthu sāsane sikkhāya paripūra-kārissa.|| ||

So evaɱ samāhite citte parisuddhe pariyodāte anaŋgaṇe vigatūpakkilese mudubhūte kammaniye ṭhite ānejjappatte4 pubbe-nivāsānussati-ñāṇāya cittaɱ abhininnāmeti.|| ||

So aneka-vihitaɱ pubbe-nivāsaɱ anussarati,||
seyyath'īdaɱ: ekam pi jātiɱ dve pi jātiyo,||
Tisso pi jātiyo catasso pi jātiyo pañca pi jātiyo dasa pi jātiyo vīsatim pi jātiyo tiɱsam pi jātiyo cattārīsam pi jātiyo paññāsam pi jātiyo jāti-satam pi jāti-sahassam pi jāti-sata-sahassam pi anekepi saɱvaṭṭa-kappe anekepi vivaṭṭa-kappe anekepi saɱvaṭṭa-vivaṭṭa-kappe amutrāsiɱ evaɱ-nāmo evaɱ-gotto evaɱ-vaṇṇo evam-āhāro evaɱ-sukha-dukkha-paṭisaŋvedī evam-āyu-pariyanto.|| ||

So tato cuto amutra udapādiɱ5 tatrāpāsiɱ evaɱ-nāmo evaɱ-gotto evaɱ-vaṇṇo evam-āhāro evaɱ-sukha-dukkha-paṭisaŋvedī evam-āyu-pariyanto.|| ||

So tato cuto idh'ūpapanno' ti.|| ||

Iti sākāraɱ sa-uddesaɱ aneka-vihitaɱ pubbe-nivāsaɱ anussarati.|| ||

Taɱ kissa hetu?|| ||

evaɱ [442] h'etaɱ Bhaddāli hoti yathā taɱ satthu sāsane sikkhāya paripūra-kārissa.|| ||

So evaɱ samāhite citte parisuddhe pariyodāte anaŋgaṇe vigatūpakkilese mudubhūte kammaniye ṭhite ānejjappatte sattānaɱ cūtūpapātañāṇāya cittaɱ abhininnāmeti.|| ||

So dibbena cakkhunā visuddhena atikkanta-mānusa-kena satte passati cavamāne upapajjamāne,||
hine paṇīte suvaṇṇe dubbaṇṇe sugate duggate yathā-kammūpage satte pajānāti.|| ||

Ime vata bhonto sattā kāya-du-c-caritena samannāgatā vacī-du-c-caritena samannāgatā mano-du-c-caritena samannāgatā ariyānaɱ upavādakā micchā-diṭṭhikā micchā-diṭṭhi-kamma-samādānā,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā,||
ime vā pana bhonto sattā kāya-sucaritena samannāgatā vacī-sucaritena samannāgatā mano-sucaritena samannāgatā ariyānaɱ anupavādakā sammā-diṭṭhikā sammā-diṭṭhi-kamma-samādānā,||
te kāyassa bhedā param maraṇā sugatiɱ saggaɱ lokaɱ upannā' ti.|| ||

Iti dibbena cakkhunā visuddhena atikkanta-mānusa-kena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathā-kammūpage satte pajānāti.|| ||

Taɱ kissa hetu?|| ||

evaɱ h'etaɱ Bhaddāli hoti yathā taɱ satthu sāsane sikkhāya paripūra-kārissa.|| ||

So evaɱ samāhite citte parisuddhe pariyodāte anaŋgaṇe vigatūpakkilese mudubhūte kammaniye ṭhite ānejjappatte āsavānaɱ khaya-ñāṇāya cittaɱ abhininnāmeti.|| ||

So idaɱ 'dukkhan' ti yathā-bhūtaɱ pajānāti.|| ||

'Ayaɱ dukkha-samudayo' ti yathā-bhūtaɱ pajānāti.|| ||

'Ayaɱ dukkha-nirodho' ti yathā-bhūtaɱ pajānāti.|| ||

'Ayaɱ dukkha-nirodha-gāminī-paṭipadā' ti yathā-bhūtaɱ pajānāti.|| ||

Ime āsavāti yathā-bhūtaɱ pajānāti.|| ||

'Ayaɱ āsava-samudayo' ti yathā-bhūtaɱ pajānāti.|| ||

'Ayaɱ āsava-nirodho' ti yathā-bhūtaɱ pajānāti.|| ||

'Ayaɱ āsava-nirodha-gāminī-paṭipadā' ti yathā-bhūtaɱ pajānāti.|| ||

Tassa evaɱ jānato evaɱ passato kāmāsavā pi cittaɱ vimuccati.|| ||

Bhavāsavāpi cittaɱ vimuccati.|| ||

Avijjāsavā pi cittaɱ vimuccati.|| ||

Vimuttasmiɱ 'vimuttami' ti ñāṇaɱ hoti.|| ||

Khīṇā jāti,||
vusitaɱ Brahma-cariyaɱ,||
kataɱ karaṇīyaɱ,||
nāparaɱ itthattāyā ti pajānāti.|| ||

Taɱ kissa hetu?|| ||

Evaɱ h'etaɱ Bhaddāli hoti yathā taɱ satthu sāsane sikkhāya paripūra-kārissāti.|| ||

Evaɱ vutte āyasmā Bhaddāli Bhagavantaɱ etad avoca: konu kho bhante hetu ko paccayo yena-m-idh'ekaccaɱ bhikkhuɱ pavayha pavayha kāraṇaɱ karonti.|| ||

Ko pana bhante hetu ko paccayo yena-m-idh'ekaccaɱ bhikkhuɱ no tathā pavayha pavayha1 kāraṇaɱ karontī ti.|| ||

Idha Bhaddāli ekacco bhikkhu abhiṇhāpattiko hoti āpattibahulo.|| ||

So bhikkhūhi vuccamāno aññenaññaɱ paṭicarati.|| ||

Bahiddhā kathaɱ apanāmeti.|| ||

Kopañca dosañ ca appaccayañ ca pātu-karoti.|| ||

Na sammā vattati.|| ||

Na lomaɱ pāteti.|| ||

Na netthāraɱ vattati.|| ||

Yena saŋgho atta-mano [443] hoti taɱ karomīti nāha.|| ||

Tatra Bhaddāli bhikkhūnaɱ evaɱ hoti: ayaɱ kho āvuso bhikkhu abhiṇhāpattiko āpattibahulo,||
so bhikkhūhi vuccamāno aññenaññaɱ paṭicarati.|| ||

Bahiddhā kathaɱ apanāmeti.|| ||

Kopañca dosañ ca appaccayañ ca pātu-karoti.|| ||

Na sammā vattati.|| ||

Na lomaɱ pāteti.|| ||

Na netthāraɱ vattati.|| ||

Yena saŋgho atta-mano hoti taɱ karomīti nāha.|| ||

Sādhu vatāya-smanto imassa bhikkhuno tathā tathā upaparikkhatha yathāssidaɱ adhikaraṇaɱ na khippam'eva vūpasameyyāti.|| ||

Tassa kho etaɱ Bhaddāli bhikkhuno bhikkhū tathā tathā upaparikkhanti yathāssidaɱ adhikaraṇaɱ na khippam'eva vūpasammati.|| ||

Idha pana baddāli ekacco bhikkhu abhiṇhāpattiko hoti āpatti bahulo.|| ||

So bhikkhūhi vuccamāno nāññenaññaɱ paṭicarati.|| ||

Na bahiddhā kathaɱ apanāmeti.|| ||

Na kopañ ca dosañ ca appaccayañ ca pātu-karoti.|| ||

Sammā vattati,||
lomaɱ pāteti.|| ||

Netthāraɱ vattati.|| ||

Yena saŋgho atta-mano hoti taɱ karomīti āha.|| ||

Tatra Bhaddāli bhikkhūnaɱ evaɱ hoti: 'ayaɱ kho āvuso bhikkhu abhiṇhāpattiko āpattibahulo,||
so bhikkhūhi vuccamāno nāññenaññaɱ paṭicarati.|| ||

Na bahiddhā kathaɱ apanāmeti.|| ||

Na kopañ ca dosañ ca appaccayañ ca pātu-karoti.|| ||

Sammā vattati.|| ||

Lomaɱ pāteti netthāraɱ vattati.|| ||

Yena saŋgho atta-mano hoti taɱ karomīti āha.|| ||

Sādhu vatāya-smanto imassa bhikkhuno tathā tathā upaparikkhatha yathāssidaɱ1 adhikaraṇaɱ khippam'eva vūpasameyyāti.|| ||

Tassa kho etaɱ Bhaddāli bhikkhuno bhikkhū tathā tathā upaparikkhanti yathāssidaɱ1 adhikaraṇaɱ khippam'eva vūpasammati.|| ||

Idha Bhaddāli ekacco bhikkhu adhiccāpattiko hoti anāpattibahulo.|| ||

So bhikkhūhi vuccamāno aññenaññaɱ paṭicarati.|| ||

Bahiddhā kathaɱ apanāmeti kopañ ca dosañ ca appaccayañ ca pātu-karoti.|| ||

Na sammā vattati.|| ||

Na lomaɱ pāteti.|| ||

Na netthāraɱ vattati,||
yena saŋgho atta-mano hoti taɱ karomīti nāha.|| ||

Tatra Bhaddāli bhikkhūnaɱ evaɱ hoti: ayaɱ kho āvuso bhikkhu adhiccāpattiko anāpattibahulo,||
so bhikkhūhi vuccamāno aññenaññaɱ paṭicarati.|| ||

Bahiddhā kathaɱ apanāmeti.|| ||

Kopañca dosañ ca appaccayañ ca pātu-karoti.|| ||

Na sammā vattati.|| ||

Na lomaɱ pāteti.|| ||

Na netthāraɱ vattati yena saŋgho atta-mano hoti taɱ karomīti nāha.|| ||

Sādhu vatāya-smanto imassa bhikkhuno tathā tathā upaparikkhatha yathāssidaɱ adhikaraṇaɱ na khippam'eva vūpasameyyāti.|| ||

Tassa kho etaɱ Bhaddāli bhikkhuno bhikkhū tathā tathā upaparikkhanti yathāssidaɱ adhikaraṇaɱ [444] na khippam'eva vūpasammati.|| ||

Idha pana Bhaddāli ekacco bhikkhū adhiccāpattiko hoti anāpatti bahulo.|| ||

So bhikkhūhi vuccamāno nāññenaññaɱ paṭicarati.|| ||

Na bahiddhā kathaɱ apanāmeti.|| ||

Na kopañ ca dosañ ca appaccayañ ca pātu-karoti.|| ||

Sammā vattati.|| ||

Lomaɱ pāteti.|| ||

Netthāraɱ vattati.|| ||

Yena saŋgho atta-mano hoti taɱ karomīti āha,||
tatra Bhaddāli bhikkhūnaɱ evaɱ hoti: 'ayaɱ kho āvuso bhikkhu adhiccāpattiko anāpatti bahulo.|| ||

So bhikkhūhi vuccamāno nāññenaññaɱ paṭicarati.|| ||

Na bahiddhā kathaɱ apanāmeti.|| ||

Na kopañ ca dosañ ca appaccayañ ca pātu-karoti.|| ||

Sammā vattati.|| ||

Lomaɱ pāteti.|| ||

Netthāraɱ vattati.|| ||

Yena saŋgho atta-mano hoti taɱ karomīti āha.|| ||

Sādhuvatāya-smanto imassa bhikkhuno tathā tathā upaparikkhatha yathāssidaɱ adhikaraṇaɱ khippam'eva vūpasameyyāti.|| ||

Tassa kho etaɱ Bhaddāli bhikkhuno bhikkhū tathā tathā upaparikkhanti yathāssidaɱ adhikaraṇaɱ khippam'eva vūpasammati.|| ||

Idha Bhaddāli ekacco bhikkhu saddhā-mattakena vahati pemamattakena.|| ||

Tatra Bhaddāli bhikkhūnaɱ evaɱ hoti:|| ||

'Ayaɱ kho āvuso bhikkhu saddhā mattakena vahati pemamattakena.|| ||

Sace mayaɱ imaɱ bhikkhuɱ pavayha: pavayha2 kāraṇaɱ karissāma.|| ||

Mā'yampissa taɱ saddhā-mattakaɱ pemamattakaɱ tamhāpi parihāyīti.|| ||

Seyyathā pi Bhaddāli purisassa ekaɱ cakkhuɱ tassa mitt-ā-maccā ñātisā-lohitā taɱ ekaɱ cakkhuɱ rakkheyyuɱ: mā yampissa taɱ ekaɱ cakkhuɱ tamhāpi parihāyī' ti.|| ||

Evam eva kho Bhaddāli idh'ekacco bhikkhu saddhā-mattakena vahati pemamattakena.|| ||

Tatra Bhaddāli bhikkhūnaɱ evaɱ hoti:|| ||

'Ayaɱ kho āvuso bhikkhu saddhā-mattakena vahati pemamattakena.|| ||

Sace maya imaɱ bhikkhuɱ pavayha pavayha|| ||

Kāraṇaɱ karissāma,||
māyampissa taɱ saddhā-mattakaɱ pemamattakaɱ tamhāpi parihāyī' ti.|| ||

Ayaɱ kho Bhaddāli hetu ayaɱ paccayo yena-m-idh'ekaccaɱ bhikkhuɱ pavayha pavayha kāraṇaɱ karonti.|| ||

Ayaɱ pana Bhaddāli hetu ayaɱ paccayo yena-m-idh'ekaccaɱ bhikkhuɱ no tathā pavayha pavayha kāraṇaɱ karontī ti.|| ||

Ko nu kho bhante hetu,||
ko paccayo,||
yena pubbe appatarāni [445] c'eva sikkhā-padāni ahesuɱ,||
bahutarā ca bhikkhū aññāya saṇṭhahiɱsu.|| ||

Ko pana bhante hetu ko paccayo yen'etarahi bahutarāni c'eva sikkhā-padāni honti.|| ||

Appatarā ca bhikkhū aññāya saṇṭhahantī ti.|| ||

Evaɱ h'etaɱ Bhaddāli hoti: sattesu hāyamānesu Sad'Dhamme antara-dhāyamāne bahutarāni c'eva sikkhā-padāni honti.|| ||

Appatarā ca bhikkhū aññāya saṇṭhahanti.|| ||

Na tāva Bhaddāli Satthā sāvakānaɱ sikkhāpadaɱ paññāpeti.|| ||

Yāva na idh'ekacce āsava-ṭ-ṭhānīyā dhammā saŋghe pātu-bhavanti.|| ||

Yato ca kho Bhaddāli idh'ekacce āsava-ṭ-ṭhānīyā dhammā saŋghe pātu-bhavanti,||
atha Satthā sāvakānaɱ sikkhāpadaɱ paññāpeti.|| ||

Tesaɱ yeva āsava-ṭ-ṭhānīyānaɱ dhammānaɱ paṭighātāya.|| ||

Na tāva Bhaddāli idh'ekacce āsava-ṭ-ṭhānīyā dhammā saŋghe pātu-bhavanti,||
yāva na saŋgho mahattaɱ patto hoti.|| ||

Yato ca kho Bhaddāli saŋgho mahattaɱ patto hoti.|| ||

Atha idh'ekacce asavaṭṭhāniyā dhammā saŋghe pātu-bhavanti,||
atha Satthā sāvakānaɱ sikkhāpadaɱ paññāpeti tesaɱ yeva āsava-ṭ-ṭhānīyānaɱ dhammānaɱ paṭighātāya.|| ||

Na tāva Bhaddāli idh'ekacce āsava-ṭ-ṭhānīyā dhammā saŋghe pātu-bhavanti,||
yāva na saŋgho lābhaggaɱ patto hoti.|| ||

Yato ca kho Bhaddāli saŋgho lābhaggaɱ patto hoti.|| ||

Atha idh'ekacce asavaṭṭhāniyā dhammā saŋghe pātu-bhavanti,||
atha Satthā sāvakānaɱ sikkhāpadaɱ paññāpeti tesaɱ yeva āsava-ṭ-ṭhānīyānaɱ dhammānaɱ paṭighātāya.|| ||

Na tāva Bhaddāli idh'ekacce āsava-ṭ-ṭhānīyā dhammā saŋghe pātu-bhavanti,||
yāva na saŋgho yasaggaɱ patto hoti.|| ||

Yato ca kho Bhaddāli saŋgho yasaggaɱ patto hoti.|| ||

Atha idh'ekacce asavaṭṭhāniyā dhammā saŋghe pātu-bhavanti,||
atha Satthā sāvakānaɱ sikkhāpadaɱ paññāpeti tesaɱ yeva āsava-ṭ-ṭhānīyānaɱ dhammānaɱ paṭighātāya.|| ||

Na tāva Bhaddāli idh'ekacce āsava-ṭ-ṭhānīyā dhammā saŋghe pātu-bhavanti,||
yāva na saŋgho bāhu-saccaɱ patto hoti.|| ||

Yato ca kho Bhaddāli saŋgho bāhu-saccaɱ patto hoti.|| ||

Atha idh'ekacce asavaṭṭhāniyā dhammā saŋghe pātu-bhavanti,||
atha Satthā sāvakānaɱ sikkhāpadaɱ paññāpeti tesaɱ yeva āsava-ṭ-ṭhānīyānaɱ dhammānaɱ paṭighātāya.|| ||

Na tāva Bhaddāli idh'ekacce āsava-ṭ-ṭhānīyā dhammā saŋghe pātu-bhavanti,||
yāva na saŋgho rattaññutaɱ patto hoti.|| ||

Yato ca kho Bhaddāli saŋgho rattaññutaɱ patto hoti.|| ||

Atha idh'ekacce asavaṭṭhāniyā dhammā saŋghe pātu-bhavanti,||
atha Satthā sāvakānaɱ sikkhāpadaɱ paññāpeti tesaɱ yeva āsava-ṭ-ṭhānīyānaɱ dhammānaɱ paṭighātāya.|| ||

Appakā kho tumhe Bhaddāli tena samayena ahuvattha yadā vo ahaɱ ājānīyasusūpamaɱ dhamma-pariyā'yaɱ desesiɱ,||
sarasi tvaɱ Bhaddāli" ti.|| ||

No h'etaɱ bhante.|| ||

Tatra Bhaddāli kaɱ hetuɱ paccesīti.|| ||

So hi nūnāhaɱ bhante dīgha-rattaɱ satthu sāsane sikkhāya aparipūra-kārī ahosinti.|| ||

Na kho Bhaddāli eseva hetu esa paccayo,||
api ca me tvaɱ Bhaddāli dīgha-rattaɱ cetasā ceto paricca vidito.|| ||

Nacāyaɱ mogha-puriso mayā dhammaɱ desiyamāne aṭṭhikatvā3 manasi-katvā sabba-cetaso samannā-haritvā ohita-soto dhammaɱ suṇātī ti.|| ||

Api ca te ahaɱ Bhaddāli ājānīyasusūpamaɱ dhamma-pariyā'yaɱ desissāmi taɱ suṇāhi,||
sādhukaɱ mana-sikarohi,||
[446] bhāsissāmīti,||
evaɱ bhante' ti kho āyasmā Bhaddāli Bhagavato paccassosi.|| ||

Bhagavā etad avoca:|| ||

Seyyathā pi Bhaddāli dakkho assadamako bhadraɱ ass-ā-jānīyaɱ labhitvā paṭhamen'eva mukhādhāne kāraṇaɱ kāreti.|| ||

Tassa mukhādhāne kāraṇaɱ kāriyamānassa hontiyeva visūkāyitāni visevitāni vipphanditāni kānici kānici,||
yathā taɱ akāritapubbaɱ kāraṇaɱ kāriyamānassa.|| ||

So abhiṇhakāraṇā anupubba-kāraṇā tasmiɱ ṭhāne parinibkhāyati.|| ||

Yato kho Bhaddāli bhadro ass-ā-jānīyo abhiṇhakāraṇā anupubba-kāraṇā tasmiɱ ṭhāne parinibbuto hoti.|| ||

Tam enaɱ assadamako uttariɱ1 kāraṇaɱ kāreti yugādhāne.|| ||

Tassa yugādhāne kāraṇaɱ kāriyamānassa hontiyeva visūkāyitāni visevitāni vipphanditāni kānici kānici,||
yathā taɱ akāritapubbaɱ kāraṇaɱ kāriyamānassa.|| ||

So abhiṇhakāraṇā anupubba-kāraṇā tasmiɱ ṭhāne parinibkhāyati.|| ||

Yato kho Bhaddāli bhadro ass-ā-jānīyo abhiṇhakāraṇā anupubba-kāraṇā tasmiɱ ṭhāne parinibbuto hoti.|| ||

Tam enaɱ assadamako uttariɱ kāraṇaɱ kāreti anukkame maṇḍale khurakāse dhāve ravatthe rājaguṇe rājavaɱse uttame jave uttame haye uttame sākhalye.|| ||

Tassa uttame jave uttame haye uttame sākhalye kāraṇaɱ kāriyamānassa hontiyeva visūkāyitāni visevitāni vipphanditāti kānici kānici,||
yathā taɱ akāritapubbaɱ kāraṇaɱ kāriyamānassa.|| ||

So abhiṇhakāraṇā anupubba-kāraṇā tasmiɱ ṭhāne parinibkhāyati.|| ||

Yato ca kho Bhaddāli bhadro ass-ā-jānīyo abhiṇhakāraṇā anupubba-kāraṇā tasmiɱ ṭhāne parinibbuto hoti,||
tam enaɱ assadamako uttariɱ vaṇṇiyañ ca valiyañ ca.|| ||

Anuppavecchati imehi kho Bhaddāli dasahaŋgehi samannāgato bhadro ass-ā-jānīyo rājā-raho hoti rāja-bhoggo rañño aŋganteva saŋkhaɱ gacchati.|| ||

Evam eva kho Bhaddāli dasahi dhammehi samannāgato bhikkhu āhuṇeyyo hoti pāhuneyyo dakkhiṇeyyo añjali-karaṇīyo anuttaraɱ puñña-k-khettaɱ lokassa.|| ||

Katamehi dasahi?|| ||

Idha Bhaddāli bhikkhu||
asekkhāya sammā-diṭṭhiyā samannāgato hoti,||
asekkhena sammā-saŋkappena samannāgato hoti,||
asekkhāya sammā-vācāya samannāgato hoti,||
asekkhena sammā-kammantena samannāgato hoti,||
asekkhena sammā-ājivena samannāgato hoti,||
asekkhena sammā-vāyāmena samannāgato hoti,||
asekkhāya [447] sammā-satiyā samannāgato hoti,||
asekkhena sammā-samādhinā samannāgato hoti,||
asekkhena sammā-ñāṇena samannāgato hoti,||
asekkhāya sammā-vimuttiyā samannāgato hoti.|| ||

Imehi kho Bhaddāli dasahi dhammehi samannāgato bhikkhu āhuṇeyyo hoti,||
pāhuṇeyyo dakkhiṇeyyā añjali-karaṇīyo anuttaraɱ puñña-k-khettaɱ lokassā" ti.|| ||

Idam avoca Bhagavā atta-mano āyasmā Bhaddāli Bhagavato bhāsitaɱ abhinandīti.|| ||

Bhaddāli suttaɱ pañcamaɱ


Contact:
E-mail
Copyright Statement