Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
II. Majjhima-Paṇṇāsa
3. Paribbājaka Vagga

Sutta 78

Samaṇamaṇḍikā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][than][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati||
Jetavane Anāthapiṇḍikassa ārāme.|| ||

Tena kho pana samayena Uggāhamāno paribbājako Samaṇa-Maṇḍikā-putto samaya-p-pavādake tindukācīre eka-sālake Mallikāya ārāme [23] paṭivasati mahatiyā paribbājaka-parisāya saddhiɱ timattehi paribbājaka-satehi.|| ||

Atha kho Pañcakaŋgo thapati Sāvatthīyā ni-k-khami divādivassa Bhagavantaɱ dassanāya.|| ||

Atha kho Pañcakaŋgassa thapatissa etad ahosi:|| ||

Akālo kho tāva Bhagavantaɱ dassanāya,||
paṭisallīno Bhagavā;||
mano-bhāvanīyānam pi bhikkhūnaɱ asamayo dassanāya,||
paṭisallīnā mano-bhāvanīyā bhikkhū.|| ||

Yan nūnāhaɱ yena samayappavādako tindukācīro eka-sālako Mallikāya ārāmo yena Uggāhamāno paribbājako Samaṇa-Maṇḍikā-putto ten'upasankameyyan ti.|| ||

Atha kho Pañcakaŋgo thapati yena samayappavādako tindukāciro eka-sālako Mallikāya ārāmo.|| ||

Yena Uggāhamāno paribbājako Samaṇa-Maṇḍikā-putto ten'upasankami.|| ||

Tena kho pana samayena Uggāhamāno paribbājako Samaṇa-Maṇḍikā-putto mahatiyā paribbājaka-parisāya saddhiɱ nisinno hoti unnādiniyā uccā-saddāya mahā-saddāya aneka-vihitaɱ tiracchāna-kathaɱ kathentiyā.|| ||

Seyyath'īdaɱ:||
rāja-kathaɱ,||
cora-kathaɱ,||
mahā mattakathaɱ,||
senā-kathaɱ,||
bhaya-kathaɱ,||
yuddha-kathaɱ,||
anna-kathaɱ,||
pāna-kathaɱ,||
vattha-kathaɱ,||
sayāna-kathaɱ,||
mālā-kathaɱ,||
gandha-kathaɱ,||
ñāti-kathaɱ,||
yāna-kathaɱ,||
gāma-kathaɱ,||
nigama-kathaɱ,||
nagara-kathaɱ,||
jana-pada-kathaɱ,||
itthi-kathaɱ,||
sūra-kathaɱ,||
visikhā-kathaɱ,||
kumbhaṭṭhāna-kathaɱ,||
pubba-peta-kathaɱ,||
nānatta-kathaɱ,||
loka-k-khāyikaɱ samuddakkhāyikaɱ iti bhav-ā-bhava-kathaɱ iti vā.|| ||

Addasā kho Uggāhamāno paribbājako Samaṇa-Maṇḍikā-putto Pañcakaŋgaɱ thapatiɱ dūrato va āga-c-chantaɱ.|| ||

Disvāna sakaɱ parisaɱ saṇṭhapesi:|| ||

Appa-saddā bhonto hontu,||
mā bhonto saddam akattha.|| ||

Ayaɱ samaṇassa Gotamassa sāvako āga-c-chati,||
Pañcakaŋgo thapati.|| ||

Yāvatā kho pana samaṇassa Gotamassa sāvakā gihī odāta-vasanā Sāvatthīyaɱ paṭivasanti.|| ||

Ayaɱ tesaɱ aññataro Pañcakaŋgo thapati.|| ||

Appa-sadda-kāmā kho pana te āyasmanto appa-saddavinītā appa-saddassa vaṇṇavādino,||
app'eva nāma appa-saddaɱ parisaɱ viditvā upasankamitabbaɱ maññeyyā" ti.|| ||

Atha kho te paribbājakā tuṇhī ahesuɱ.|| ||

Atha kho Pañcakaŋgo thapati yena Uggāhamāno paribbājako Samaṇa-Maṇḍikā-putto ten'upasankami.|| ||

Upasaŋkamitvā Uggāhamānena paribbājakena Samaṇa-Maṇḍikā-puttena saddhiɱ [24] sammodi.|| ||

Sammodanīyaɱ kathaɱ sārāṇiyaɱ vīti-sāretvā eka-m-antaɱ nisīdi.|| ||

Eka-m-antaɱ nisinnaɱ kho Pañcakaŋgaɱ thapatiɱ Uggāhamāno paribbājako Samaṇa-Maṇḍikā-putto etad avoca:|| ||

"Catūhi kho ahaɱ thapati,||
dhammehi samannāgataɱ purisa-puggalaɱ paññā-pemi sampanna-kusalaɱ parama-kusalaɱ uttamapattipattaɱ samaṇaɱ ayojjhaɱ.|| ||

Katamehi catūhi?|| ||

Idha thapati na kāyena pāpakaɱ kammaɱ karoti,||
na pāpikaɱ vācaɱ bhāsati,||
na pāpakaɱ saŋkappaɱ saŋkappeti,||
na pāpakaɱ ājivaɱ ājivati.|| ||

Imehi kho ahaɱ thapati,||
catūhi dhammehi samannāgataɱ purisa-puggalaɱ paññā-pemi sampanna-kusalaɱ parama-kusalaɱ uttamapattipattaɱ samaṇaɱ ayojjhan ti.|| ||

Atha kho Pañcakaŋgo thapati Uggāhamānassa paribbājakassa Samaṇa-Maṇḍikā-puttassa bhāsitaɱ n'eva abhinandi,||
na-p-paṭikkosi.|| ||

Anabhinan'ditvā a-p-paṭikkositvā uṭṭhāy'āsanā pakkāmi.|| ||

Bhagavato santike etassa bhāsitassa atthaɱ ājānissāmi ti.|| ||

Atha kho Pañcakaŋgo thapati yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisidi.|| ||

Eka-m-antaɱ nisinno kho Pañcakaŋgo thapati yāvatako ahosi Uggāhamānena paribbājakena Samaṇa-Maṇḍikā-puttena saddhiɱ kathā-sallāpo,||
taɱ sabbaɱ Bhagavato ārocesi.|| ||

Evaɱ vutte Bhagavā Pañcakaŋgaɱ thapatiɱ etad avoca:|| ||

Evaɱ sante kho thapati,||
daharo kumāro mando uttāna-seyyako sampanna-kusalo bhavissati parama-kusalo uttamapattipatto samaṇo ayojjho,||
yathā Uggāhamānassa paribbājakassa Samaṇa-Maṇḍikā-puttassa vacanaɱ.|| ||

Daharassa hi thapati,||
kumārassa mandassa uttāna-seyyakassa kāyo ti pi na hoti,||
kuto pana kāyena pāpakaɱ kammaɱ karissati aññatra phanditamattā.|| ||

Daharassa hi thapati||
kumārassa mandassa uttāna-seyyakassa vācā ti pi na hoti.|| ||

Kuto pana pāpikaɱ vācaɱ bhāsissati,||
aññatra roditamattā.|| ||

Daharassa hi thapati||
kumārassa mandassa uttāna-seyyakassa saŋkappo ti pi na hoti,||
kuto pana pāpikaɱ saŋkappaɱ saŋkappissati||
aññatra vikujitamattā.|| ||

Daharassa hi thapati,||
kumārassa mandassa uttāna-seyyakassa ājivo ti pi na hoti,||
kuto pana [25] pāpakaɱ ājivaɱ ājivissati,||
aññatra mātuthaññā.|| ||

Evaɱ sante kho thapati,||
daharo kumāro mando uttāna-seyyako sampanna-kusalo bhavissati parama-kusalā uttamapattipatto samaṇo ayojjho,||
yathā Uggāhamānassa paribbājakassa Samaṇa-Maṇḍikā-puttassa vacanaɱ.|| ||

Catuhi kho ahaɱ thapati,||
dhammehi samannāgataɱ purisa-puggalaɱ paññā-pemi na c'eva sampanna-kusalaɱ na parama-kusalaɱ na uttamapattipattaɱ samaṇaɱ ayojjhaɱ,||
api c'imaɱ daharaɱ kumāraɱ mandaɱ uttāna-seyyakaɱ samadhi-gayha tiṭṭhati.|| ||

Katamehi catūhi?|| ||

Idha thapati na kāyena pāpakaɱ kammaɱ karoti,||
na pāpikaɱ vācaɱ bhāsati,||
na pāpakaɱ saŋkappaɱ saŋkappeti||
aa pāpakaɱ ājivaɱ ājivati.|| ||

Imehi kho ahaɱ thapati,||
catūhi dhammehi samannāgataɱ purisa-puggalaɱ paññā-pemi na c'eva sampanna-kusalaɱ na parama-kusalaɱ na uttamapattipattaɱ samaṇaɱ ayojjhaɱ,||
api c'imaɱ daharaɱ kumāraɱ mandaɱ uttāna-seyyakaɱ samadhi-gayha tiṭṭhati.|| ||

Dasahi kho ahaɱ thapati,||
dhammehi samannāgataɱ purisa-puggalaɱ paññā-pemi sampanna-kusalaɱ parama-kusalaɱ uttamapattipattaɱ samaṇaɱ ayojjhaɱ.|| ||

Ime akusala-sīlā||
t'āhaɱ thapati,||
veditabban ti vadāmi.|| ||

Ito samuṭṭhānā akusala-sīlā,||
t'āhaɱ thapati,||
veditabban ti vadāmi|| ||

Idha akusala-sīlā aparisesā nirujjhanti||
t'āhaɱ thapati,||
veditabban ti vadāmi.|| ||

Evaɱ paṭipanno akusalānaɱ sīlānaɱ nirodhāya paṭipanno hoti||
t'āhaɱ thapati,||
veditabbanti vadāmi.|| ||

Ime kusala-sīlā||
t'āhaɱ thapati,||
veditabban ti vadāmi.|| ||

Ito samuṭṭhānā kusala-sīlā||
t'āhaɱ thapati,||
veditabban ti vadāmi.|| ||

Idha kusala-sīlā aparisesā nirujjhanti||
t'āhaɱ thapati,||
veditabban ti vadāmi.|| ||

Evaɱ paṭipanno kusalānaɱ sīlānaɱ nirodhāya paṭipanno hoti||
t'āhaɱ thapati,||
veditabban ti vadāmi.|| ||

Ime akusala-saŋkappā||
t'āhaɱ thapati,||
veditabban ti vadāmi.|| ||

Ito samuṭṭhānā akusala-saŋkappā||
t'āhaɱ thapati,||
veditabban ti vadāmi.|| ||

Idha [26] akusala-saŋkappā aparisesā nirujjhanti||
t'āhaɱ thapati,||
veditabban ti vadāmi.|| ||

Evaɱ paṭipanno akusalānaɱ saŋkappānaɱ nirodhāya paṭipanno hoti||
t'āhaɱ thapati,||
veditabban ti vadāmi.|| ||

Ime kusala-saŋkappā||
t'āhaɱ thapati,||
veditabban ti vadāmi.|| ||

Ito samuṭṭhānā kusala-saŋkappā||
t'āhaɱ thapati,||
veditabban ti vadāmi.|| ||

Idha kusala-saŋkappā aparisesā nirujjhanti||
t'āhaɱ thapati,||
veditabban ti vadāmi.|| ||

Evaɱ paṭipanno kusalānaɱ saŋkappānaɱ nirodhāya paṭipanno hoti||
t'āhaɱ thapati,||
veditabban ti vadāmi.|| ||

Katame ca thapati, akusala-sīlā?|| ||

Akusalaɱ kāya-kammaɱ,||
akusalaɱ vacī-kammaɱ,||
pāpako ājivo.|| ||

Ime vuccanti thapati, akusala-sīlā.|| ||

Ime ca, thapati, akusala-sīlā kiɱ samuṭṭhānā?|| ||

Samuṭṭhānam pi n'esaɱ vuttaɱ citta-samuṭṭhānā ti'ssa vacanīyaɱ.|| ||

Katamaɱ cittaɱ?|| ||

Cittam pi hi bahuɱ aneka-vidhaɱ nāna-p-pakārakaɱ sacittaɱ sarāgaɱ sadosaɱ samohaɱ.|| ||

Ito samuṭṭhānā akusala-sīlā.|| ||

Ime ca thapati,||
akusala-sīlā kuhiɱ aparisesā nirujjhanti?|| ||

Nirodho pi n'esaɱ vutto.|| ||

Idha thapati,||
bhikkhu kāya-du-c-caritaɱ pahāya kāya-su-caritaɱ bhāveti,||
vacī-du-c-caritaɱ pahāya vacī-su-caritaɱ bhāveti,||
mano-du-c-caritaɱ pahāya mano-su-caritaɱ bhāveti,||
micchā-ājivaɱ pahāya sammā-ājivena jivikaɱ kappeti.|| ||

Etth'ete akusala-sīlā aparisesā nirujjhanti.|| ||

Kathaɱ paṭipanno ca, thapati, akusalānaɱ sīlānaɱ nirodhāya paṭipanno hoti?|| ||

Idha, thapati, bhikkhū||
anuppannānaɱ pāpakānaɱ akusalānaɱ dhammānaɱ anuppādāya chandaɱ janeti vāyamati viriyaɱ ārabhati cittaɱ paggaṇhāti padahati;||
uppannānaɱ pāpakānaɱ akusalānaɱ dhammānaɱ pahānāya chandaɱ janeti vāyamati viriyaɱ ārabhati cittaɱ paggaṇhāti padahati;||
anuppannānaɱ kusalānaɱ dhammānaɱ uppādāya chandaɱ janeti vāyamati viriyaɱ ārabhati cittaɱ paggaṇhāti padahati;||
uppannānaɱ kusalānaɱ dhammānaɱ ṭhitiyā asammosāya bhiyyo-bhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Evaɱ paṭi- [27] panno kho, thapati, akusalānaɱ sīlānaɱ nirodhāya paṭipanno hoti.|| ||

Katame ca thapati, kusala-sīlā?|| ||

Kusalaɱ kāya-kammaɱ,||
kusalaɱ vacī-kammaɱ||
ājīva-pārisuddhi pi kho ahaɱ thapati,||
sīlasmiɱ vadāmi.|| ||

Ime vuccanti, thapati, kusala-sīlā.|| ||

Ime ca, thapati,||
kusala-sīlā kiɱ samuṭṭhānā?|| ||

Samuṭṭhānam pi n'esaɱ vuttaɱ.|| ||

Citta-samuṭṭhānā ti'ssa vacanīyaɱ.|| ||

Katamaɱ cittaɱ?|| ||

Cittam pi hi bahuɱ aneka-vidhaɱ nāna-p-pakārakaɱ.|| ||

Yaɱ cittaɱ vīta-rāgaɱ vīta-dosaɱ vīta-mohaɱ.|| ||

Ito samuṭṭhānā akusala-sīlā.|| ||

Ime ca, thapati, kusala-sīlā kuhiɱ aparisesā nirujjhanti?|| ||

Nirodho pi n'esaɱ vutto,||
idha, thapati,||
bhikkhu sīlavā hoti,||
no ca sīlamayo,||
tañ ca ceto-vimuttiɱ paññā-vimuttiɱ yathā-bhūtaɱ pajānāti.|| ||

Yatth'assa te kusalasīlā aparisesā nirujjhanti.|| ||

Kathaɱ paṭipanno ca thapati kusalānaɱ sīlānaɱ nirodhāya paṭipanno hoti?|| ||

Idha thapati anuppannānaɱ pāpakānaɱ akusalānaɱ dhammānaɱ anuppādāya chandaɱ janeti vāyamati viriyaɱ ārabhati cittaɱ paggaṇhāti padahati,||
uppannānaɱ pāpakānaɱ akusalānaɱ dhammānaɱ pahānāya chandaɱ janeti vāyamati viriyaɱ ārabhati cittaɱ paggaṇhāti padahati;||
anuppannānaɱ kusalānaɱ dhammānaɱ uppādāya chandaɱ janeti vāyamati viriyaɱ ārabhati cittaɱ paggaṇhāti padahati;||
uppannānaɱ kusalānaɱ dhammānaɱ ṭhitiyā asammosāya bhiyyo bhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Evaɱ paṭipanno kho thapati kusalānaɱ sīlānaɱ nirodhāya paṭipanno hoti.|| ||

Katame ca thapati, akusala saŋkappā?|| ||

Kāma-saŋkappo,||
vyāpāda-saŋkappo,||
vihiɱsā-saŋkappo.|| ||

Ime vuccanti thapati akusala-saŋkappā.|| ||

Ime ca, thapati, akusala-saŋkappā kiɱ samuṭṭhānā?|| ||

Samuṭṭhānam pi n'esaɱ vuttaɱ.|| ||

Saññā-samuṭṭhānā ti'ssa vacanīyā.|| ||

Katamā saññā?|| ||

Saññā pi hi bahū anekavidhā nāna-p-pakārakā,||
kāma-saññā,||
vyāpāda-saññā,||
vihiɱsā saññā.|| ||

Ito samuṭṭhānā akusala-saŋkappā.|| ||

Ime ca thapati,||
akusala-saŋkappā kuhiɱ aparisesā nirujjhanti?|| ||

Nirodho pi n'esaɱ vutto.|| ||

Idha, thapati, bhikkhū vivicc'eva kāmehī [28] vivicca akusalehī dhammehī sa-vitakkaɱ sa-vicāraɱ viveka-jaɱ pitisukhaɱ paṭhamaɱ-jhānaɱ upasampajja viharati.|| ||

Etth'ete akusala-saŋkappā aparisesā nirujjhanti.|| ||

Kathaɱ paṭipanno ca, thapati,||
akusalānaɱ saŋkappānaɱ nirodhāya paṭipanno hoti?|| ||

Idha thapati, bhikkhu anuppannānaɱ pāpakānaɱ akusalānaɱ dhammānaɱ anuppādāya chandaɱ janeti vāyamati viriyaɱ ārabhati cittaɱ paggaṇhāti padahati;||
uppannānaɱ pāpakānaɱ akusalānaɱ dhammānaɱ pahānāya chandaɱ janeti vāyamati viriyaɱ ārabhati cittaɱ paggaṇhāti padahati;||
anuppannānaɱ kusalānaɱ dhammānaɱ uppādāya chandaɱ janeti vāyamati viriyaɱ ārabhati cittaɱ paggaṇhāti padahati;||
uppannānaɱ kusalānaɱ dhammānaɱ ṭhitiyā asammosāya bhiyyo bhāvāya vepullāya bhāvanāya pāripūriyā chanda janeti vāyamati viriyaɱ ārabhati cittaɱ paggaṇhāti padahati.|| ||

Evaɱ paṭipanno kho, thapati,||
akusalānaɱ saŋkappānaɱ nirodhāya paṭipanno hoti.|| ||

Katame ca, thapati, kusala-saŋkappā?|| ||

Nekkhamma-saŋkappo||
avyāpāda-saŋkappo,||
avihiɱsā-saŋkappo.|| ||

Ime vuccanti thapati kusala-saŋkappā.|| ||

Ime ca thapati, kusala-saŋkappā kiɱ samuṭṭhānā?|| ||

Samuṭṭhānam pi n'esaɱ vuttaɱ.|| ||

Saññā-samuṭṭhānā ti'ssa vacanīyā.|| ||

Katamā saññā?|| ||

Saññā pi hi bahū anekavidhā nāna-p-pakārakā,||
nekkhamma-saññā||
avyāpāda-saññā||
avihiɱsā-saññā.|| ||

Ito samuṭṭhānā kusala-saŋkappā.|| ||

Ime ca, thapati, kusala-saŋkappā kuhiɱ aparisesā nirujjhanti?|| ||

Nirodho pi n'esaɱ vutto.|| ||

Idha, thapati, bhikkhū vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ avicāraɱ||
samādhi-jaɱ pīti-sukhaɱ||
dutiyaɱ-jhānaɱ upasampajja viharati.|| ||

Etth'ete kusala-saŋkappā aparisesā nirujjhanti.|| ||

Kathaɱ paṭipanno ca, thapati,||
kusalānaɱ saŋkappānaɱ nirodhāya paṭipanno hoti?|| ||

Idha thapati, bhikkhu anuppannānaɱ pāpakānaɱ akusalānaɱ dhammānaɱ anuppādāya chandaɱ janeti vāyamati viriyaɱ ārabhati cittaɱ paggaṇhāti padahati;||
uppannānaɱ pāpakānaɱ akusalānaɱ dhammānaɱ pahānāya chandaɱ janeti vāyamati viriyaɱ ārabhati cittaɱ paggaṇhāti padahati;||
anuppannānaɱ kusalānaɱ dhammānaɱ uppādāya chandaɱ janeti vāyamati viriyaɱ ārabhati cittaɱ paggaṇhāti padahati;||
uppannānaɱ kusalānaɱ dhammānaɱ ṭhitiyā asammosāya bhiyyo bhāvāya vepullāya bhāvanāya pāripūriyā chanda janeti vāyamati viriyaɱ ārabhati cittaɱ paggaṇhāti padahati.|| ||

Evaɱ paṭipanno kho, thapati,||
kusalānaɱ saŋkappānaɱ nirodhāya paṭipanno hoti.|| ||

Katamehi c'āhaɱ thapati,||
dasahi dhammehi samannāgataɱ purisa-puggalaɱ [29] paññā-pemi sampanna-kusalaɱ parama-kusalaɱ uttamapattipattaɱ samaṇaɱ ayojjhaɱ?|| ||

Idha thapati, bhikkhu asekhāya sammā-diṭṭhiyā samannāgato hoti,||
asekhena sammā-saŋkappena samannāgato hoti,||
asekhāya sammā-vācāya samannāgato hoti,||
asekhena sammā-kammantena samannāgato hoti,||
asekhena sammā-ājīvena samannāgato hoti,||
asekhena sammā-vāyāmena samannāgato hoti,||
asekhāya sammā-satiyā samannāgato hoti,||
asekhena sammā-samādhinā samannāgato hoti,||
asekhena sammā-ñāṇena samannāgato hoti,||
asekhāya sammā-vimuttiyā samannāgato hoti.|| ||

Imehi kho ahaɱ thapati,||
dasahi dhammehi samannāgataɱ purisa-puggalaɱ paññā-pemi sampanna-kusalaɱ parama-kusalaɱ uttamapattipattaɱ samaṇaɱ ayojjhanti.|| ||

Idam avoca Bhagavā.|| ||

Attamano Pañcakaŋgo thapati Bhagavato bhāsitaɱ abhinanditi.

Samaṇamaṇḍikā suttaɱ aṭṭhamaɱ


 

Contact:
E-mail
Copyright Statement