Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
II. Majjhima-Paṇṇāsa
4. Rāja Vagga

Sutta 81

Ghaṭīkāra Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][upal] Evaɱ me sutaɱ:|| ||

Ekaɱ samayaɱ Bhagavā Kosalesu cārikaɱ carati mahatā bhikkhu-saŋghena saddhiɱ.|| ||

Atha kho Bhagavā maggā okkamma aññatarasmiɱ padese sitaɱ pātvākāsi.|| ||

Atha kho āyasmato Ānandassa etad ahosi:|| ||

'Ko nu kho hetu, ko paccayo Bhagavato sitassa pātu-kammāya?|| ||

Na akāraṇe Tathāgatā sitaɱ pātu-karontī' ti.|| ||

Atha kho āyasmā Ānando ekaɱsaɱ cīvaraɱ katvā yena Bhagavā ten'añjalim paṇāmetvā Bhagavantaɱ etad avoca:|| ||

'Ko nu kho bhante hetu,||
ko paccayo Bhagavato sitassa pātu-kammāya,||
na akāraṇe Tathāgatā sitaɱ pātu-karontī' ti.

'Bhūta-pubbaɱ, Ānanda,||
imasmiɱ padese Vebhaḷiŋgaɱ nāma gāmani-gamo ahosi iddho c'eva phīto ca bahu-jano ākiṇṇamanusso.|| ||

Vebhaḷiŋgaɱ kho Ānanda,||
gāmani-gamaɱ Kassapo Bhagavā arahaɱ Sammā-Sam-Buddho upanissāya vihāsi.|| ||

Idha sudaɱ, Ānanda,||
Kassapassa Bhagavato arahato Sammā-Sam-Buddhassa ārāmo ahosi.|| ||

Idha sudaɱ Ānanda Kassapo Bhagavā arahaɱ Sammā-Sam-Buddho nisinnako bhikkhu-Saŋghaɱ ovadatī' ti.|| ||

Atha kho āyasmā Ānando catugguṇā saŋghāṭiɱ paññā-petvā Bhagavantaɱ etad avoca:|| ||

'Tena hi, bhante, Bhagavā nisīdatu.|| ||

Ev'ayaɱ bhūmippadeso dvīhi arahantehī Sammā-Sam-Buddhehi paribhūtto bhavissatī' ti.|| ||

Nisīdi Bhagavā paññatte āsane.|| ||

Nisajja kho Bhagavā āyasmantaɱ Ānandaɱ āmantesi:|| ||

'Bhūta-pubbaɱ Ānanda,||
imasmiɱ padese Vebhaḷiŋgaɱ nāma gāmani-gamo ahosi iddho c'eva phito ca bahu-jano ākiṇṇamanusso.|| ||

Vebhaḷiŋgaɱ kho Ānanda,||
gāmani-gamaɱ Kassapo Bhagavā arahaɱ Sammā-Sam-Buddho upanissāya vihāsi.|| ||

Idha sudaɱ, Ānanda,||
Kassapassa Bhagavato arahato Sammā-Sam-Buddhassa ārāmo ahosi.|| ||

Idha sudaɱ, Ānanda,||
Kassapo Bhagavā arahaɱ Sammā-Sam-Buddho nisinnako [46] bhikkhu-Saŋghaɱ ovadati.|| ||

Vebhaḷiŋge kho, Ānanda, gāmani-game Ghaṭīkāro nāma kumbhakāro Kassapassa Bhagavato arahato Sammā-Sam-Buddhassa upaṭṭhāko ahosi aggupaṭṭhāko.|| ||

Ghaṭīkārassa kho, Ānanda,||
kumbhakārassa Jotipālo nāma māṇavo sahāyo ahosi piyasahāyo.|| ||

Atha kho, Ānanda,||
Ghaṭīkāro kumbhakāro Jotipālaɱ māṇavaɱ āmantesi:|| ||

"Āyāma, samma Jotipāla,||
Kassapaɱ Bhagavantaɱ arahantaɱ Sammā-Sam-Buddhaɱ dassanāya upasankamissāma.|| ||

Sādhusammataɱ hi me tassa Bhagavato dassanaɱ arahato Sammā-Sam-Buddhassā" ti.|| ||

Evaɱ vutte, Ānanda,||
Jotipālo māṇavo Ghaṭīkāraɱ kumbhakāraɱ etad avoca:|| ||

"Alaɱ, samma Ghaṭīkāra,||
kiɱ pana tena muṇḍakena samaṇakena diṭṭhenā" ti?|| ||

Dutiyam pi kho Ānanda,||
Jotipālo māṇavo Ghaṭīkāra kumbhakāraɱ etad avoca:|| ||

"Āyāma, samma Jotipāla,||
Kassapaɱ Bhagavantaɱ arahantaɱ Sammā-Sam-Buddhaɱ dassanāya upasankamissāma.|| ||

Sādhusammataɱ hi me tassa Bhagavato dassanaɱ arahato Sammā-Sam-Buddhassā" ti.|| ||

Evaɱ vutte, Ānanda,||
Jotipālo māṇavo Ghaṭīkāraɱ kumbhakāraɱ etad avoca:|| ||

"Alaɱ, samma Ghaṭīkāra,||
kiɱ pana tena muṇḍakena samaṇakena diṭṭhenā" ti?|| ||

Tatiyam pi kho Ānanda,||
Jotipālo māṇavo Ghaṭīkāraɱ kumbhakāraɱ etad avoca:|| ||

"Āyāma, samma Jotipāla,||
Kassapaɱ Bhagavantaɱ arahantaɱ Sammā-Sam-Buddhaɱ dassanāya upasankamissāma.|| ||

Sādhusammataɱ hi me tassa Bhagavato dassanaɱ arahato Sammā-Sam-Buddhassā" ti.|| ||

Evaɱ vutte, Ānanda,||
Jotipālo māṇavo Ghaṭīkāraɱ kumbhakāraɱ etad avoca:|| ||

"Alaɱ, samma Ghaṭīkāra,||
kiɱ pana tena muṇḍakena samaṇakena diṭṭhenā" ti?|| ||

"Tena hi, samma Jotipāla,||
sottiɱ sināniɱ ādāya nadiɱ gamissāma sināyitun" ti.|| ||

"Evaɱ sammā" ti kho Ānanda,||
Jotipālo māṇavo Ghaṭīkārassa kumbhakārassa paccassosi.|| ||

Atha kho, Ānanda,||
Ghaṭīkāro ca kumbhakāro Jotipālo ca māṇavo sottiɱ sināniɱ ādāya nadiɱ agamaɱsu sināyituɱ.

Atha kho, Ānanda,||
Ghaṭīkāro kumbhakāro Jotipālaɱ māṇavaɱ āmantesi:|| ||

"Ayaɱ, samma Jotipāla,||
Kassapassa Bhagavato arahato Sammā-Sam-Buddhassa avidūre ārāmo.|| ||

Āyāma samma Jotipāla,||
Kassapaɱ Bhagavantaɱ arahantaɱ Sammā-Sam-Buddhaɱ dassanāya upasankamissāma.|| ||

Sādhusammataɱ hi me tassa Bhagavato dassanaɱ arahato Sammā-Sam-Buddhassā" ti.|| ||

Evaɱ vutte Ānanda Jotipālo māṇavo Ghaṭīkāraɱ kumbhakāraɱ etad avoca:|| ||

"Alaɱ, samma Ghaṭīkāra,||
kiɱ pana [47] tena muṇḍakena samaṇakena diṭṭhenā" ti?|| ||

Dutiyam pi kho Ānanda Ghaṭīkāro kumbhakāro Jotipālaɱ māṇavaɱ etad avoca:|| ||

"Ayaɱ, samma Jotipāla,||
Kassapassa Bhagavato arahato Sammā-Sam-Buddhassa avidūre ārāmo.|| ||

Āyāma samma Jotipāla,||
Kassapaɱ Bhagavantaɱ arahantaɱ Sammā-Sam-Buddhaɱ dassanāya upasankamissāma.|| ||

Sādhusammataɱ hi me tassa Bhagavato dassanaɱ arahato Sammā-Sam-Buddhassā" ti.|| ||

Evaɱ vutte Ānanda Jotipālo māṇavo Ghaṭīkāraɱ kumbhakāraɱ etad avoca:|| ||

"Alaɱ, samma Ghaṭīkāra,||
kiɱ pana tena muṇḍakena samaṇakena diṭṭhenā" ti?|| ||

Tatiyam pi kho Ānanda Ghaṭīkāro kumbhakāro Jotipālaɱ māṇavaɱ etad avoca:|| ||

"Ayaɱ samma Jotipāla,||
Kassapassa Bhagavato arahato Sammā-Sam-Buddhassa avidūre ārāmo.|| ||

'Āyāma samma Jotipāla,||
Kassapaɱ Bhagavantaɱ arahantaɱ Sammā-Sam-Buddhaɱ dassanāya upasankamissāma.|| ||

Sādhusammataɱ hi me tassa Bhagavato dassanaɱ arahato Sammā-Sam-Buddhassā" ti.|| ||

Tatiyam pi kho Ānanda,||
Jotipālo māṇavo Ghaṭīkāraɱ kumbhakāraɱ etad avoca:|| ||

"Alaɱ samma Ghaṭīkāra,||
kiɱ pana tena muṇḍakena samaṇakena diṭṭhenā" ti?|| ||

Atha kho, Ānanda,||
Ghaṭīkāro kumabhakāro Jotipālaɱ māṇavaɱ ovaṭṭikāya parāmasitvā etad avoca:|| ||

"Ayaɱ samma Jotipāla,||
Kassapassa Bhagavato arahato Sammā-Sam-Buddhassa avidūre ārāmo.|| ||

Āyāma samma Jotipāla,||
Kassapaɱ Bhagavantaɱ arahantaɱ Sammā-Sam-Buddhaɱ dassanāya upasankamissāma.|| ||

Sādhusammataɱ hi me tassa Bhagavato dassanaɱ arahato Sammā-Sam-Buddhassā" ti.|| ||

Atha kho, Ānanda,||
Jotipālo māṇavo ovaṭṭikaɱ viniveṭhetvā Ghaṭīkāraɱ kumbhakāraɱ etad avoca:|| ||

"Alaɱ samma Ghaṭīkāra,||
kiɱ pana tena muṇḍakena samaṇakena diṭṭhenā" ti?|| ||

Atha kho, Ānanda,||
Ghaṭīkāro kumbhakāro Jotipālaɱ māṇavaɱ sīsanahātaɱ kesesu parāmasitvā etad avoca:|| ||

"Ayaɱ, samma Jotipāla,||
Kassapassa Bhagavato avidūre ārāmo.|| ||

Āyāma, samma Jotipāla,||
Kassapaɱ Bhagavantaɱ arahataɱ Sammā-Sam-Buddhaɱ dassanāya upasankamissāma.|| ||

Sādhusammataɱ hi me tassa Bhagavato dassanaɱ arahato Sammā-Sam-Buddhassā" ti.|| ||

Atha kho, Ānanda,||
Jotipālassa māṇavassa etad ahosi:|| ||

"Acchariyaɱ vata bho,||
abbhūtaɱ vata bho.|| ||

Yatra hi nāmāyaɱ Ghaṭīkāro kumbhakāro ittarajacco samāno amhākaɱ sīsanahātānaɱ kesesu parāmasitabbaɱ maññissati.|| ||

'Na vat'idaɱ orakaɱ maññe bhavissatī'" ti.|| ||

Ghaṭīkāraɱ kumbhakāraɱ etad avoca:|| ||

"Yāvetadohi pi, samma Ghaṭīkārā" ti.|| ||

"Yāvetadohi pi, samma Jotipāla,||
tathā hi pana [48] me sādhusammataɱ tassa Bhagavato dassanaɱ arahato Sammā-Sam-Buddhassā" ti.|| ||

"Tena hi, samma Ghaṭīkāra,||
muñca gamissāmā" ti.|| ||

Atha kho, Ānanda,||
Ghaṭīkāro ca kumbhakāro Jotipālo ca māṇavo yena Kassapo Bhagavā arahaɱ Sammā-Sam-Buddho ten'upasankamiɱsu.|| ||

Upasaŋkamitvā Ghaṭīkāro kumbhakāro Kassapaɱ Bhagavantaɱ arahantaɱ Sammā-Sam-Buddhaɱ abhivādetvā eka-m-antaɱ nisīdi.|| ||

Jotipālo pana māṇavo Kassapena Bhagavatā arahatā Sammā-Sam-Buddhena saddhiɱ sammodi,||
sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho Ānanda,||
Ghaṭīkāro kumbhakāro Kassapaɱ Bhagavantaɱ arahantaɱ Sammā-Sam-Buddhaɱ etad avoca:|| ||

"Ayaɱ me, bhante,||
Jotipālo māṇavo sahāyo piyasahāyo,||
imassa Bhagavā dhammaɱ desetū" ti.|| ||

Atha kho, Ānanda,||
Kassapo Bhagavā arahaɱ Sammā-Sam-Buddho Ghaṭīkārañ ca kumbhakāraɱ Jotipālañ ca māṇavaɱ dhammiyā kathāya sandassesi,||
samādapesi,||
samuttejesi,||
samp'ahaɱsesi.|| ||

Atha kho, Ānanda,||
Ghaṭīkāro ca kumbhakāro Jotipālo ca māṇavo Kassapena Bhagavatā arahatā Sammā-Sam-Buddhena dhammiyā kathāya sanda-s-sitā||
samāda-pitā||
samutte-jitā||
samp'ahaɱsitā||
Kassapassa Bhagavato arahato Sammā-Sam-Buddhassa bhāsitaɱ abhinan'ditvā anumo-ditvā uṭṭhāy'āsanā Kassapaɱ Bhagavantaɱ arahantaɱ Sammā-Sam-Buddhaɱ abhivādetvā padakkhiṇaɱ katvā pakkamiɱsu.|| ||

Atha kho, Ānanda,||
Jotipālo māṇavo Ghaṭīkāraɱ kumbhakāraɱ etad avoca:|| ||

"Imaɱ nu tvaɱ, samma Ghaṭīkāra,||
dhammaɱ suṇanto,||
atha ca pana na agārasmā anagāriyaɱ pabbajasī" ti?|| ||

"Nanu maɱ, samma Jotipāla,||
jānāsi:||
andhe jiṇṇe mātā-pitaro posemī" ti?

"Tena hi, samma Ghaṭīkāra,||
ahaɱ agārasmā anagāriyaɱ pabbajissāmī" ti.|| ||

Atha kho, Ānanda,||
Ghaṭīkāro ca kumbhakāro Jotipālo ca māṇavo yena Kassapo Bhagavā arahaɱ Sammā-Sam-Buddho [49] ten'upasankamiɱsu.|| ||

Upasaɱkamitvā Kassapaɱ Bhagavantaɱ arahantaɱ Sammā-Sam-Buddhaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinno kho, Ānanda,||
Ghaṭīkāro kumbhakāro Kassapaɱ Bhagavantaɱ arahantaɱ Sammā-Sam-Buddhaɱ etad avoca:|| ||

"Ayaɱ me bhante,||
Jotipālo māṇavo sahāyo piyasahāyo.|| ||

Imaɱ Bhagavā pabbājetu" ti.|| ||

Alattha kho, Ānanda,||
Jotipālo māṇavo Kassapassa Bhagavato arahato Sammā-Sam-Buddhassa santike pabbajjaɱ alattha upasampadaɱ.|| ||

Atha kho, Ānanda,||
Kassapo Bhagavā arahaɱ Sammā-Sam-Buddho acir'ūpasampanne Jotipāle māṇave addhamāsūpasampanne Vebhaḷiŋge yath-ā-bhirantaɱ viharitvā yena Bārāṇasī tena cārikaɱ pakkāmi.|| ||

Anupubbena cārikaɱ cara-māno yena Bārāṇasī tad avasari.|| ||

Tatra sudaɱ, Ānanda,||
Kassapo Bhagavā arahaɱ Sammā-Sam-Buddho Bāraṇasiyaɱ viharati Isipatane Migadāye.|| ||

Assosi kho Ānanda, Kikī Kāsirājā:|| ||

"Kassapo kira Bhagavā arahaɱ Sammā-Sam-Buddho Bārāṇasiɱ anuppatto,||
Bārāṇasiyaɱ viharati Isipatane Migadāye" ti.|| ||

Atha kho, Ānanda,||
Kikī Kāsirājā bhadrāni bhadrāni yānāni yojāpetvā bhadraɱ yānaɱ abhiruhitvā bhadrehi bhadrehi yānehi Bārāṇasiyā niyyāsi mahatā rājānubhāvena Kassapaɱ Bhagavantaɱ arahantaɱ Sammā-Sam-Buddhaɱ dassanāya.|| ||

Yāvatikā yānassa bhūmi yānena gantvā yānā paccorohitvā pattiko va yena Kassapo Bhagavā arahaɱ Sammā-Sam-Buddho ten'upasankami.|| ||

Upasaŋkamitvā Kassapaɱ Bhagavantaɱ arahantaɱ Sammā-Sam-Buddhaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho, Ānanda, Kikiɱ Kāsirājānaɱ Kassapo Bhagavā arahaɱ Sammā-Sam-Buddho dhammiyā kathāya sandessesi,||
samādapesi,||
samuttejesi,||
samp'ahaɱsesi.|| ||

Atha kho, Ānanda,||
Kikī Kāsirājā Kassapena Bhagavatā arahatā Sammā-Sam-Buddhena dhammiyā kathāya,||
sanda-s-sito,||
samāda-pito,||
samutte-jito,||
samp'ahaɱsito,||
Kassapaɱ Bhagavantaɱ arahantaɱ Sammā-Sam-Buddhaɱ etad avoca:|| ||

[50] "Adhivāsetu me, bhante,||
Bhagavā svātanāya bhattaɱ saddhiɱ bhikkhu-saŋghenā" ti.|| ||

Adhivāsesi kho, Ānanda,||
Kassapo Bhagavā arahaɱ Sammā-Sam-Buddho tuṇhī-bhāvena.|| ||

Atha kho, Ānanda,||
Kikī Kāsirājā Kassapassa Bhagavato arahato Sammā-Sam-Buddhassa adhivāsanaɱ viditvā uṭṭhāy'āsanā Kassapaɱ Bhagavantaɱ arahantaɱ Sammā-Sam-Buddhaɱ abhivādetvā padakkhiṇaɱ katvā pakkāmi.|| ||

Atha kho, Ānanda,||
Kikī Kāsirājā tassa rattiyā accayena sake nivesane paṇītaɱ khādanīyaɱ bhojanīyaɱ paṭiyādāpetvā paṇḍumuṭikassa sālino vicitakālakaɱ aneka-sūpaɱ aneka-vyañjanaɱ,||
Kassapassa Bhagavato arahato Sammā-Sam-Buddhassa kālaɱ ārocāpesi:|| ||

"Kālo bhante, niṭṭhitaɱ bhattan" ti.|| ||

Atha kho, Ānanda,||
Kassapo Bhagavā arahaɱ Sammā-Sam-Buddho pubbaṇha-samayaɱ nivāsetvā patta-cīvaraɱ ādāya yena Kikissa Kāsirañño nivesanaɱ ten'upasankami,||
upasankamitvā paññatte āsane nisīdi saddhiɱ bhikkhu-saŋghena.|| ||

Atha kho, Ānanda,||
Kikī Kāsirājā Buddhapamukhaɱ bhikkhu-Saŋghaɱ paṇītena khādanīyena bhojanīyena sahatthā santappesi,||
sampavāresi.|| ||

Atha kho, Ānanda,||
Kikī Kāsirājā Kassapaɱ Bhagavantaɱ arahantaɱ Sammā-Sam-Buddhaɱ bhuttāviɱ oṇitapattapāṇiɱ aññataraɱ nīcaɱ āsanaɱ gahetvā eka-m-antaɱ nisīdi.|| ||

Eka-m-antaɱ nisinno kho Ānanda,||
Kikī Kāsirājā Kassapaɱ Bhagavantaɱ arahantaɱ Sammā-Sam-Buddhaɱ etad avoca:|| ||

"Adhivāsetu me, bhante,||
Bhagavā Bārāṇasiyaɱ vassāvāsaɱ,||
eva-rūpaɱ Saŋghassa upaṭṭhānaɱ bhavissatī" ti.|| ||

"Alaɱ mahārāja,||
adhivuttho me vassāvāso" ti.|| ||

Dutiyam pi kho, Ānanda,||
Kikī Kāsirājā Kassapaɱ Bhagavantaɱ arahantaɱ Sammā-Sam-Buddhaɱ etad avoca:|| ||

"Adhivāsetu me bhante,||
Bhagavā Bārāṇasiyaɱ vassāvāsaɱ,||
eva-rūpaɱ Saŋghassa upaṭṭhānaɱ bhavissatī" ti.|| ||

"Alaɱ mahārāja,||
adhivuttho me vassāvāso" ti.|| ||

Tatiyam pi kho Ānanda,||
Kikī Kāsirājā Kassapaɱ Bhagavantaɱ arahantaɱ Sammā-Sam-Buddhaɱ etad avoca:|| ||

"Adhivāsetu me bhante,||
Bhagavā Bārāṇasiyaɱ vassāvāsaɱ,||
eva-rūpaɱ Saŋghassa upaṭṭhānaɱ bhavissatī" ti.|| ||

"Alaɱ mahārāja,||
adhivuttho me vassāvāso" ti.|| ||

Atha kho, Ānanda, Kikissa Kāsirañño:|| ||

"Na me Kassapo Bhagavā [51] arahaɱ Sammā-Sam-Buddho adivāseti Bārāṇasiyaɱ vassāvāsan" ti ahu-d-eva aññathattaɱ,||
ahu domanassaɱ.|| ||

Atha kho, Ānanda,||
Kikī Kāsirājā Kassapaɱ Bhagavantaɱ arahantaɱ Sammā-Sam-Buddhaɱ etad avoca:|| ||

"Atthi nu te bhante,||
añño koci mayā upaṭṭhākataro" ti?|| ||

"Atthi, mahārāja,||
Vebhaḷiŋgaɱ nāma gāmani-gamo.|| ||

Tattha Ghaṭīkāro nāma kumbhakāro.|| ||

So me upaṭṭhāko aggupaṭṭhāko.|| ||

Tuyhaɱ kho pana mahārāja:|| ||

'Na me Kassapo Bhagavā arahaɱ Sammā-Sam-Buddho adivāseti Bārāṇasiyaɱ vassāvāsanti,||
atthi aññathattaɱ atthi domanassaɱ.'|| ||

Ta-y-idaɱ Ghaṭīkāre kumbhakāre n'atthi na ca bhavissati.|| ||

Ghaṭīkāro kho, mahārāja, kumabhakāro||
Buddhaɱ saraṇaɱ gato,||
dhammaɱ saraṇaɱ gato,||
Saŋghaɱ saraṇaɱ gato.|| ||

Ghaṭīkāro kho, mahārāja, kumbhakāro||
pāṇāti-pātā paṭivirato,||
adinn'ādāna paṭivirato,||
kāmesu micchā-cārā paṭivirato,||
musā-vādā paṭivirato,||
surā-mera-yamajja-pamā-daṭṭhānā paṭivirato.|| ||

Ghaṭīkāro kho, mahārāja, kumbhakāro||
Buddhe avecca-p-pasādena samannāgato,||
dhamme avecca-p-pasādena samannāgato||
saŋghe avecca-p-pasādena samannāgato,||
ariya-kantehi sīlehi samannāgato.|| ||

Ghaṭīkāro kho, mahārāja, kumabhakāro||
dukkhe nikkaŋkho,||
dukkha-samudaye nikkaŋkho,||
dukkha-nirodhe nikkaŋkho,||
dukkha-nirodha-gāminiyā paṭipadāya nikkaŋkho.|| ||

Ghaṭīkāro kho, mahārāja, kumabhakāro||
eka-bhattiko brahma-cārī sīlavā kalyāṇa-dhammo.|| ||

Ghaṭīkāro kho, mahārāja, kumabhakāro||
nikkhittamaṇisuvaṇṇo,||
apetajāta-rūpa-rajato.|| ||

Ghaṭīkāro kho, mahārāja,||
kumbhakāro na musalena||
na sahatthā paṭhaviɱ khaṇati.|| ||

Yaɱ hoti kulapaluggaɱ vā mūsikukkāro vā taɱ kāmena āharitvā bhājanaɱ karitvā evam āha:|| ||

"Ettha yo icchati taṇḍulapabhivattāni vā||
muggapabhivattāni vā||
kalāyapabhivattāni vā||
nikkhi-pitvā yaɱ icchati taɱ haratu" ti.|| ||

Ghaṭīkāro kho, mahārāja, kumbhakāro||
andhe [52] jiṇṇe mātā-pitaro poseti.

Ghaṭīkāro kho, mahārāja, kumbhakāro||
pañcannaɱ ora-m-bhāgiyānaɱ saŋyojanānaɱ parikkhayā opapātiko tattha parinibbāyī anāvattidhammo tasmā lokā.

Ekam idāhaɱ, mahārāja,||
samayaɱ Vebhaḷiŋge gāmani-game viharāmi.|| ||

Atha khvāhaɱ, maharāja,||
pubbaṇha-samayaɱ nivāsetvā patta-cīvaraɱ ādāya yena Ghaṭīkārassa kumbhakārassa mātā-pitaro ten'upasankamiɱ.|| ||

Upasaŋkamitvā Ghaṭīkārassa kumbhakārassa mātā-pitaro etad avocaɱ:|| ||

'Handa ko nu kho ayaɱ bhaggavo gato' ti?|| ||

'Nikkhanto kho te bhante upaṭṭhāko,||
ato kumhiyā odanaɱ gahetvā pariyogā sūpaɱ gahetvā paribhuñjā' ti.|| ||

Atha khvāhaɱ, mahārāja,||
kumbhiyā odanaɱ gahetvā pariyogā sūpaɱ gahetvā paribhuñjitvā uṭṭhāy'āsanā pakkamiɱ.|| ||

Atha kho, mahārāja,||
Ghaṭīkāro kumbhakāro yena mātā-pitaro ten'upasankami.|| ||

Upasaŋkamitvā mātā-pitaro etad avoca:|| ||

'Ko kumbhiyā odanaɱ gahetvā pariyogā sūpaɱ gahetvā paribhuñjitvā uṭṭhāy āsanā pakkanto' ti?|| ||

'Kassapo tāta, Bhagavā arahaɱ Sammā-Sam-Buddho kumbhiyā odanaɱ gahetvā pariyogā sūpaɱ gahetvā paribhuñjitvā uṭṭhāy'āsanā pakkanto' ti.|| ||

Atha kho, maharāja,||
Ghaṭīkārassa kumbhakārassa etad ahosi:|| ||

'Lābhā vata me,||
su-laddhaɱ vata me||
yassa me Kassapo Bhagavā arahaɱ Sammā-Sam-Buddho evaɱ ahivissattho' ti.|| ||

Atha kho mahārāja,||
Ghaṭīkāraɱ kumbhakāraɱ addhamāsaɱ pīti-sukhaɱ na vijahi sattāhaɱ mātā-pitunnaɱ.|| ||

Ekam idāhaɱ, mahārāja,||
samayaɱ tatth'eva Vebhaḷiŋge gāmani-game viharāmi.|| ||

Atha khvāhaɱ, mahārāja,||
pubbaṇha-samayaɱ nivāsetvā patta-cīvaraɱ ādāya yena Ghaṭīkārassa kumbhakārassa mātā-pitaro ten'upasankamiɱ,||
upasankamitvā Ghaṭīkārassa kumbhakārassa mātā-pitaro etad avocaɱ:|| ||

'Handa ko nu kho ayaɱ bhaggavo gato' ti?|| ||

'Nikkhanto kho te bhante,||
upaṭṭhāko,||
ato khaḷopiyā kummāsaɱ gahetvā pariyogā sūpaɱ gahetvā paribhuñjā' ti.|| ||

Atha khvāhaɱ, mahārāja,||
khaḷopiyā kummāsaɱ gahetvā pariyogā [53] sūpaɱ gahetvā paribhuñjitvā uṭṭhāy'āsanā pakkamiɱ.|| ||

Atha kho mahārāja,||
Ghaṭīkāro kumbhakāro yena mātā-pitaro ten'upasankami,||
upasankamitvā mātā-pitaro etad avoca:|| ||

'Ko khaḷopiyā kummāsaɱ gahetvā pariyogā sūpaɱ gahetvā paribhuñjitvā uṭṭhāy āsanā pakkanto' ti?|| ||

'Kassapo tāta,||
Bhagavā arahaɱ Sammā-Sam-Buddho khaḷopiyā kummāsaɱ gahetvā pariyogā sūpaɱ gahetvā paribhuñjitvā uṭṭhāy āsanā pakkanto' ti.|| ||

Atha kho, mahārāja, Ghaṭīkārassa kumbhakārassa etad ahosi:|| ||

'Lābhā vata me,||
su-laddhaɱ vata me,||
yassa me Kassapo Bhagavā arahaɱ Sammā-Sam-Buddho evaɱ abhavissattho' ti.|| ||

Atha kho, mahārāja,||
Ghaṭīkāraɱ kumbhakāraɱ addhamāsaɱ pīti-sukhaɱ na vijahi,||
sattāhaɱ mātā-pitunnaɱ.|| ||

Ekam idāhaɱ, mahārāja,||
samayaɱ tatth'eva Vebhaḷiŋge gāmani-game viharāmi.|| ||

Tena kho pana samayena kuṭi ovassati.|| ||

Atha khvāhaɱ mahārāja,||
bhikkhū āmantesiɱ:|| ||

'Gacchatha bhikkhave,||
Ghaṭīkārassa kumbhakārassa nivesane tiṇaɱ jānāthā' ti.|| ||

Evaɱ vutte mahārāja,||
bhikkhū maɱ etad avocuɱ:|| ||

'N'atthi kho bhante,||
Ghaṭīkārassa kumbhakārassa nivesane tiṇaɱ,||
atthi ca khvāssa āvesanaɱ tiṇacchadanan' ti.|| ||

'Gacchatha bhikkhave, Ghaṭīkārassa kumbhakārassa āvesanaɱ uttiṇaɱ karothā' ti.|| ||

Atha kho te, mahārāja bhikkhū Ghaṭīkārassa kumabhakārassa āvesanaɱ uttiṇam akaɱsu.|| ||

Atha kho, mahārāja,||
Ghaṭīkārassa kumabhakārassa mātā-pitaro bhikkhū etad avocuɱ:|| ||

'Ke āvesanaɱ uttiṇaɱ karontī' ti?|| ||

'Bhikkhū, bhagini,||
Kassapassa Bhagavato arahato Sammā-Sam-Buddhassa kuṭi ovassatī' ti.|| ||

'Haratha bhante,||
haratha bhadramukhā' ti.|| ||

Atha kho mahārāja,||
Ghaṭīkāro kumbhakāro yena mātā-pitaro ten'upasankami,||
upasankamitvā mātā-pitaro etad avoca:|| ||

'Ke āvesanaɱ uttiṇamakaɱsū' ti?|| ||

'Bhikkhū tāta,||
Kassapassa kira Bhagavato arahato Sammā-Sam-Buddhassa kuṭi ovassatī' ti.|| ||

Atha kho mahārāja,||
Ghaṭīkārassa kumbhakārassa etad ahosi:|| ||

'Lābhā vata me,||
su-laddhaɱ vata me,||
yassa me Kassapo Bhagavā arahaɱ Sammā-Sam-Buddho evaɱ abhivissattho' ti.|| ||

Atha kho mahārāja,||
Ghaṭīkāraɱ kumbha- [54] kāraɱ addhamāsaɱ pīti-sukhaɱ na vijahi,||
sattāhaɱ mātā-pitunnaɱ.|| ||

Atha kho taɱ, mahārāja āvesanaɱ sabbaɱ temāsaɱ ākāsacchadanaɱ aṭṭhāsi,||
na cātivassi.|| ||

Eva-rūpo ca, mahārāja,||
Ghaṭīkāro kumbhakāro ti.|| ||

Lābhā bhante,||
Ghaṭīkārassa kumbhakārassa,||
su-laddhaɱ.|| ||

Bhante, Ghaṭīkārassa kumbhakārassa yassa Bhagavā evaɱ abhivissattho ti.|| ||

Atha kho, Ānanda,||
Kikī Kāsirājā Ghaṭīkārassa kumbhakārassa pañca-mattāni taṇḍulavāhasatāni pāhesi paṇḍumuṭikassa sālino tadupiyañ ca sūpeyyaɱ.|| ||

Atha kho te, Ānanda,||
rājapurisā Ghaṭīkāraɱ kumbhakāraɱ upasankamitvā etad avocuɱ:|| ||

"Imāni te bhante,||
pañca-mattāni taṇḍulavāhasatāni Kikinā Kāsirājena pahitāni paṇḍumuṭikassa sālino tadupiyañ ca sūpeyyaɱ.|| ||

'Tāni bhante, patigaṇhātu'" ti.|| ||

"Rājā kho bhahukicco bahu-karaṇiyo,||
alaɱ me rañño va hotū" ti.|| ||

Siyā kho pana te Ānanda, evam assa:|| ||

"Añño nūna tena samayena Jotipālo māṇavo ahosī" ti.|| ||

Na kho pan'etaɱ Ānanda, evaɱ daṭṭhabbaɱ.|| ||

Ahaɱ tena samayena Jotipālo māṇavo ahosin' ti.|| ||

Idam avoca Bhagavā atta-mano āyasmā Ānando Bhagavato bhāsitaɱ abhinandī ti.

Ghaṭīkāra Suttaɱ Paṭhamaɱ


 

Contact:
E-mail
Copyright Statement