Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 


Saɱyutta Nikaya:
Sagatha Vagga:

Brahmana Saɱyutta

Suttas 1-22

Adapted from the 1995 edition of the digital version of the Sri Lanka Buddha Jayanti Tripitaka Series.

 


[160]

Sutta 1

Dhanañjānī Suttaɱ

[1.1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

2. Tena kho pana samayena aññatarassa Bhāradvājagotta-brāhmaṇassa Dhanañjānī nāma brāhmaṇī abhi-p-pasannā hoti Buddhe ca dhamme ca saŋghe ca.|| ||

3. Atha kho Dhanañjānī brāhmaṇī Bhāradvājagottassa brāhmaṇassa bhattaɱ upasaŋharantī upakkhalitvā ti-k-khattuɱ udānaɱ udānesi:|| ||

"Namo tassa Bhagavato arahato Sammā-Sam-Buddhassa.|| ||

Namo tassa Bhagavato arahato Sammā-Sam-Buddhassa.|| ||

Namo tassa Bhagavato arahato Sammā-Sam-Buddhassā" ti.|| ||

4. Evaɱ vutte Bhāradvājagotto brāhmaṇo Dhanañjāniɱ brāhmaṇiɱ etad avoca:|| ||

"Evam eva panāyaɱ vasali yasmiɱ vā tasmiɱ vā tassa muṇḍakassa samaṇassa vaṇṇaɱ bhāsati.|| ||

Idāni tyāhaɱ vasali tassa Satthuno vādaɱ āropessāmī" ti.|| ||

5. "Na khvāhaɱ taɱ brāhmaṇa passāmi sa-devake loke sa-mārake sa-brahmake sa-s-samaṇa-brāhmaṇiyā pajāya sa-devaka-manussāya yo tassa Bhagavato vādaɱ āropeyya arahato Sammā-Sam-Buddhassa.|| ||

Api ca tvaɱ brāhmaṇa gaccha.|| ||

Gantvā vijānissasī" ti.|| ||

6. Atha kho Bhāradvājagotto brāhmaṇo kupito anatta-mano yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

[161] 7. Eka-m-antaɱ nisinno kho Bhāradvājagotto brāhmaṇo Bhagavantaɱ gāthāya ajjhabhāsi:|| ||

"Kiɱ su chetvā sukhaɱ seti kiɱ su chetvā na socati,||
Kissa'ssa eka-dhammassa vadhaɱ rocesi Gotamā" ti.|| ||

"Kodhaɱ chetvā sukhaɱ seti ko'dhaɱ chetvā na socati,||
Kodhassa visamūlassa madhur'aggassa brāhmaṇa,||
Vadhaɱ ariyā pasaɱ-santi taɱ hi chetvā na socatī" ti.|| ||

9. Evaɱ vutte Bhāradvājagotto brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā||
akkujjeyya paṭi-c-channaɱ vā||
vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya 'cakkhu-manto rūpāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyyāhaɱ bhoto Gotamassa santike pabbajjaɱ,||
labheyyaɱ upasampadan" ti.|| ||

10. Alattha kho Bhāradvājagotto brāhmaṇo Bhagavato santike pabbajjaɱ,||
alattha upasampadaɱ.|| ||

11. Acir'ūpasampanno kho pan'āyasmā Bhāradvājo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

"Khīṇā jāti,||
vusitaɱ Brahma-cariyaɱ,||
kataɱ karaṇīyaɱ.||
Nāparaɱ itthattāyā" ti abbhaññāsi.|| ||

12. Aññataro ca pan'āyasmā Bhāradvājo arahataɱ ahosī.|| ||

 

§

 

Sutta 2

Akkosa Suttaɱ

[2.1][pts][than] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

2. Assosi kho Akkosaka Bhāradvājo brāhmaṇo "Bhāradvāja-gotto kira brāhmaṇo samaṇassa Gotamassa santike āgārasmā anagāriyaɱ pabba-jito" ti.|| ||

3. Kupito anatta-mano yena Bhagavā ten'upasankami.|| ||

[162] Upasaŋkamitvā Bhagavantaɱ asabbhāhi pharusāhi vācāhi akkosati paribhāsati.|| ||

4. Evaɱ vutte Bhagavā Akkosaka Bhāradvājaɱ brāhmaṇaɱ etad avoca:|| ||

"Taɱ kiɱ maññasi brāhmaṇa.|| ||

Api nu kho te āga-c-chanti mitt-ā-maccā ñātisā-lohitā atithayo" ti?|| ||

5. "App'ekadā me bho Gotama āga-c-chanti mitt-ā-maccā ñātisā-lohitā atithayo" ti.|| ||

6. "Taɱ kiɱ maññasi brāhmaṇa.|| ||

Api nu tesaɱ anuppadesi khādanīyaɱ vā bhojanīyaɱ sāyanīyaɱ" ti?|| ||

7. "App'ekadā nes'āhaɱ bho Gotama anuppademi khādanīyaɱ bhojanīyaɱ sāyanīyaɱ" ti.|| ||

8. "Sace kho pana te brāhmaṇa na paṭigaṇhanti kassa taɱ hotī.|| ||

9. Sace te bho Gotama na paṭigaṇhanti ambhākam eva taɱ hotī" ti.|| ||

10. "Evam eva kho brāhmaṇa yaɱ tvaɱ amhe anakkosante akkosasi,||
arosente rosesi,||
abhaṇḍante bhaṇḍasi,||
taɱ te mayaɱ na paṭiggaṇhāma.|| ||

Tav'ev'etaɱ brāhmaṇa hotī" ti.|| ||

"Yo kho brāhmaṇa akkosantaɱ paccakkosati,||
rosentaɱ paṭiroseti,||
bhaṇḍantaɱ paṭibhaṇḍati,||
ayaɱ vuccati brāhmaṇa sambhuñjati vītiharati.|| ||

Te mayaɱ tayā n'eva sambhuñjāma na vītiharāma.|| ||

Tav'ev'etaɱ brāhmaṇa hoti,||
tav'ev'etaɱ brāhmaṇa hotī" ti.|| ||

11. [Brāhmaṇo:]

"Bhavantaɱ kho Gotama sarājikā parisā evaɱ jānāti:|| ||

'Arahaɱ Samaṇo Gotamo' ti.|| ||

Atha ca pana bhavaɱ Gotamo kujjhatī" ti.|| ||

[Bhagavā:]

"Akko'dhassa kuto kodho dantassa samajīvino,||
Samma-d-aññā vimuttassa upasantassa tādino.||
Tass'eva tena pāpiyo yo kuddhaɱ paṭikujjhati,||
Kuddhaɱ appaṭikujjhanto saŋgāmaɱ jeti dujjayaɱ.||
Ubhinnam atthaɱ carati attano ca parassa ca,||
Paraɱ saŋkupitaɱ ñatvā yo sato upasammati.||
Ubhinnaɱ tikicchantaɱ attano ca parassa ca,||
Janā maññanti bālo ti ye Dhammassa akovidā" ti.|| ||

[163] 13. Evaɱ vutte Akkosaka Bhāradvājo brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā||
akkujjeyya paṭi-c-channaɱ vā||
vivareyya mūḷhassa vā||
Maggaɱ ācikkheyya,||
andha-kāre vā||
tela-pajjotaɱ dhāreyya cakkhu-manto 'rūpāni dakkhintī' ti.|| ||

Evam evaɱ bhotā Gotamena aneka-pariyāyena Dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyyāhaɱ bhoto Gotamassa santike pabbajjaɱ,||
labheyyaɱ upasampadan" ti.|| ||

14. Alattha kho Akkosaka Bhāradvājo brāhmaṇo Bhagavato santike pabbajjaɱ,||
alattha upasampadaɱ.|| ||

15. Acir'ūpasampanno kho pan'āyasmā Akkosaka Bhāradvājo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

'Khīṇā jāti,||
vusitaɱ Brahma-cariyaɱ,||
kataɱ karaṇīyaɱ.||
Nāparaɱ itthattāyā' ti abbhaññāsi.|| ||

16. Aññataro ca pan'āyasmā Bhāradvājo arahataɱ ahosī.|| ||

 

§

 

Sutta 3

Asurindaka Suttaɱ

[3.1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

2. Assosi kho Asurindaka Bhāradvājo brāhmaṇo "Bhāradvājagotto kira brāhmaṇo samaṇassa Gotamassa santike agārasmā anagāriyaɱ pabba-jito" ti.|| ||

3. Kupito anatta-mano yena Bhagavā ten'upasankami.|| ||

Upasaŋkamitvā Bhagavantaɱ asabbhāhi pharusāhi vācāhi akkosati paribhāsati.|| ||

4. Evaɱ vutte Bhagavā tuṇhī ahosi.|| ||

5. Atha kho Asurindaka Bhāradvājo brāhmaṇo Bhagavantaɱ etad avoca:

"Jito'si samaṇa,||
jito'si samaṇā" ti.|| ||

6. [Bhagavā:]

"Jayaɱ ve maññati bālo vācāya pharusaɱ bhaṇaɱ,||
Jayañ c'ev'assa taɱ hoti yā titikkhā vijānato.||
Tass'eva tena pāpiyo yo kuddhaɱ paṭikujjhati,||
Kuddham appaṭikujjhanto saŋgāmaɱ jeti dujjayaɱ.||
Ubhinnam atthaɱ carati attano ca parassa ca,||
Paraɱ saɱkupitaɱ ñatvā yo sato upasammati.||
Ubhinnaɱ tikicchantaɱ attano ca parassa ca,||
Janā maññanti bālo ti ye Dhammassa akovidā" ti.|| ||

[164] 7. Evaɱ vutte Asurindaka Bhāradvājo brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rupāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyyāhaɱ bhoto Gotamassa santike pabbajjaɱ,||
labheyyaɱ upasampadan" ti.|| ||

Alattha kho Asurindaka Bhāradvājo brāhmaṇo Bhagavato santike pabbajjaɱ,||
alattha upasampadaɱ.|| ||

Acir'ūpasampanno kho pan'āyasmā Asurindaka Bhāradvājo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

"Khīṇā jāti,||
vusitaɱ Brahma-cariyaɱ,||
kataɱ karaṇīyaɱ.||
Nāparaɱ itthattāyā" ti abbhaññāsi.|| ||

8. Aññataro ca pan'āyasmā Bhāradvājo arahataɱ ahosī.|| ||

 

§

 

Sutta 4

Bilaŋgika Suttaɱ

[4.1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

2. Assosi kho BilaŋgikaBhāradvājo brāhmaṇo "Bhāradvājagotto kira brāhmaṇo samaṇassa Gotamassa santike agārasmā anagāriyaɱ pabba-jito" ti.|| ||

3. Kupito anatta-mano yena Bhagavā ten'upasankami.|| ||

Upasaŋkamitvā tuṇhī-bhūto eka-m-antaɱ aṭṭhāsi.|| ||

4. Atha kho Bhagavā bilaŋgikassa Bhāradvājassa brāhmaṇassa cetasā ceto parivitakkam aññāya Bilaŋgikaɱ Bhāradvājaɱ brāhmaṇaɱ gāthāya ajjhabhāsi:|| ||

"Yo appaduṭṭhassa narassa dussati||
suddhassa posassa anaŋgaṇassa,||
Tam eva bālaɱ pacceti pāpaɱ||
sukhumo rajo paṭivātaɱ va khitto" ti.|| ||

5. Evaɱ vutte Bilaŋgika Bhāradvājo brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rupāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyyāhaɱ bhoto Gotamassa santike pabbajjaɱ,||
labheyyaɱ upasampadan" ti.|| ||

Alattha kho Bilaŋgika Bhāradvājo brāhmaṇo Bhagavato santike pabbajjaɱ,||
alattha upasampadaɱ.|| ||

Acir'ūpasampanno kho pan'āyasmā BilaŋgikaBhāradvājo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

Khīṇā jāti,||
vusitaɱ Brahma-cariyaɱ,||
kataɱ karaṇīyaɱ.||
Nāparaɱ itthattāyāti abbhaññāsi.|| ||

6. Aññataro ca pan'āyasmā Bhāradvājo arahataɱ ahosī ti.|| ||

 

§

 

Sutta 5

Ahiɱsaka Suttaɱ

[5.1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

2. Atha kho AhiɱsakaBhāradvājo brāhmaṇo yena Bhagavā ten'upasankami.|| ||

Upasaŋkamitva Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

[165] 3. Eka-m-antaɱ nisinno kho AhiɱsakaBhāradvājo brāhmaṇo Bhagavantaɱ etad avoca:

"Ahisaɱsakāhaɱ bho Gotama,||
Ahiɱsakāhaɱ bho gotamā" ti.|| ||

4. [Bhagavā:]|| ||

"Yathā nāmaɱ tathā c'assa siyā kho tvaɱ ahiɱsako,||
Yo ca kāyena vācāya manasā ca na hiɱsati,||
Sa ce ahiɱsako hoti yo paraɱ na vihiɱsatī" ti.|| ||

5. Evaɱ vutte Ahiɱsaka Bhāradvājo brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya 'cakkhu-manto rupāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyyāhaɱ bhoto Gotamassa santike pabbajjaɱ,||
labheyyaɱ upasampadan" ti.|| ||

Alattha kho Ahiɱsaka Bhāradvājo brāhmaṇo Bhagavato santike pabbajjaɱ,||
alattha upasampadaɱ.|| ||

Acir'ūpasampanno kho pan'āyasmā AhiɱsakaBhāradvājo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

Khīṇā jāti,||
vusitaɱ Brahma-cariyaɱ,||
kataɱ karaṇīyaɱ.||
Nāparaɱ itthattāyāti abbhaññāsi.|| ||

6. Aññataro ca pan'āyasmā Bhāradvājo arahataɱ ahosī ti.|| ||

 

§

 

Sutta 6

Jaṭā Suttaɱ

[6.1][pts][than][olds] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Atha kho JaṭāBhāradvājo brāhmaṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

3. Eka-m-antaɱ nisinno kho JaṭāBhāradvājo brāhmaṇo Bhagavantaɱ gāthāya ajjhabhāsi:|| ||

"Anto-jaṭā bahi-jaṭā jaṭāya jaṭitā pajā,||
Taɱ taɱ Gotama pucchāmi ko imaɱ vijaṭaye jaṭan" ti?|| ||

[Bhagavā:]|| ||

"Sīle patiṭṭhāya naro sapañño cittaɱ paññañ ca bhāvayaɱ,||
Ātāpī nipako bhikkhu so imaɱ vijaṭaye jaṭaɱ.|| ||

Yesaɱ rāgo ca doso ca avijjā ca virājitā,||
Khīṇ'āsavā arahanto tesaɱ vijaṭitā jaṭā.|| ||

Yattha nāmañ ca rūpañ ca asesaɱ uparujjhati,||
Paṭighaɱ rūpa-saññā ca etthe sā chijjate jaṭā" ti.|| ||

Evaɱ vutte Jaṭā Bhāradvājo brāhmaṇo Bhagavantaɱ etad avoca:|| ||

Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rupāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyy'āhaɱ bhoto Gotamassa santike pabbajjaɱ,||
labheyyaɱ upasampadan" ti.|| ||

Alattha kho Jaṭā Bhāradvājo brāhmaṇo Bhagavato santike pabbajjaɱ,||
alattha upasampadaɱ.|| ||

Acir'ūpasampanno kho pan'āyasmā Jaṭā Bhāradvājoeko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

'Khīṇā jāti,||
vusitaɱ Brahma-cariyaɱ,||
kataɱ karaṇīyaɱ.||
Nāparaɱ itthattāyā' ti abbhaññāsi.|| ||

Aññataro ca pan'āyasmā Bhāradvājo arahataɱ ahosī ti.|| ||

 

§

 

Sutta 7

Suddhika Suttaɱ

[7.1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ-|| ||

2. Atha kho SuddhikaBhāradvājo brāhmaṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

[166] 3. Eka-m-antaɱ nisinno kho SuddhikaBhāradvājo brāhmaṇo Bhagavato santike imaɱ gāthaɱ abhāsi:|| ||

"Na brāhmaṇo sujjhati koci loke||
sīlavā pi tapo karaɱ,||
vijjā-caraṇa-sampanno so sujjhati||
na aññā itarā pajā" ti.|| ||

4. [Bhagavā:]|| ||

"Bahum pi palapaɱ jappaɱ na jaccā hoti brāhmaṇo,||
Anto kasambu-saɱkiliṭṭho kuhanaɱ upanissito.||
Khattiyo brāhmaṇo vesso suddo caṇḍāla-pukkuso,||
Āraddha-viriyo pahit'atto niccaɱ daḷha-parakkamo,||
Pappoti paramaɱ suddhiɱ evaɱ jānāhi brāhmaṇā" ti.|| ||

5. Evaɱ vutte SuddhikaBhāradvājo brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rupāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyyāhaɱ bhoto Gotamassa santike pabbajjaɱ,||
labheyyaɱ upasampadan" ti.|| ||

Alattha kho SuddhikaBhāradvājo brāhmaṇo Bhagavato santike pabbajjaɱ,||
alattha upasampadaɱ.|| ||

Acir'ūpasampanno kho pan'āyasmā SuddhikaBhāradvājo vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

"Khīṇā jāti,||
vusitaɱ Brahma-cariyaɱ,||
kataɱ karaṇīyaɱ.||
Nāparaɱ itthattāyā" ti abbhaññāsi.|| ||

Aññataro ca pan'āyasmā Bhāradvājo arahataɱ ahosī ti.|| ||

 

§

 

Sutta 8

Aggika Suttaɱ

[8.1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane kalandaka nivāpe.|| ||

2. Tena kho pana samayena AggikaBhāradvājassa brāhmaṇassa sappinā pāyāso sannihito hoti:

"Aggiɱ juhissāmi aggihuttaɱ paricarissāmī" ti.|| ||

3. Atha kho Bhagavā pubbaṇha-samayaɱ nivāsetvā patta-cīvaram ādāya Rājagahaɱ piṇḍāya pāvisi.|| ||

Rāgahe sapadānaɱ piṇḍāya cara-māno yena AggikaBhāradvājassa brāhmaṇassa nivesanaɱ ten'upasankami.|| ||

Upasaŋkamitvā eka-m-antaɱ aṭṭhāsi.|| ||

4. Addasā kho AggikaBhāradvājo brāhmaṇo Bhagavantaɱ piṇḍāya carantaɱ.|| ||

Disvāna Bhagavantaɱ gāthāya ajjhabhāsi:

"Tīhi vijjāhi sampanno jātimā Sutavā bahu,||
vijjā-caraṇa-sampanno so'maɱ bhuñjeyya pāyasan" ti.|| ||

5. [Bhagavā:]|| ||

"Bahum pi palapaɱ jappaɱ na jaccā hoti brāhmaṇo,||
Anto kasambusaɱkiliṭṭho kuhanā parivārito.||
[167] pubbe-nivāsaɱ yo vedī saggāpāyañ ca passati,||
Atho jātikkhayaɱ patto abhiññā vosito muni.||
Etāhi tīhi vijjāhi tevijjo hoti brāhmaṇo,||
vijjā-caraṇa-sampanno so maɱ bhuñjeyya pāyasan" ti.|| ||

6. [Brāhmaṇo:]|| ||

"Bhuñjatu bhavaɱ bho Gotamo||
Brāhmaṇo bhavan" ti.|| ||

7. [Bhagavā:]|| ||

"Gāthābhigītaɱ me abhojaneyyaɱ||
sampassataɱ brāhmaṇa n'esa dhammo,||
Gāthābhigītaɱ panudanti buddhā||
dhamme sati brāhmaṇa vutti-r-esā.||
Aññena ce kevalinaɱ mahesiɱ||
khīṇ'āsavaɱ kukkuccavūpasantaɱ,||
Annena pānena upaṭṭhahassu||
khettaɱ hi taɱ puññapekkhassa hotī" ti.|| ||

8. Evaɱ vutte AggikaBhāradvājo brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rupāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyyāhaɱ bhoto Gotamassa santike pabbajjaɱ,||
labheyyaɱ upasampadan" ti.|| ||

Alattha kho AggikaBhāradvājo brāhmaṇo Bhagavato santike pabbajjaɱ,||
alattha upasampadaɱ.|| ||

Acir'ūpasampanno kho pan'āyasmā AggikaBhāradvājo vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

"Khīṇā jāti,||
vusitaɱ Brahma-cariyaɱ,||
kataɱ karaṇīyaɱ.||
Nāparaɱ itthattāyā" ti abbhaññāsi.|| ||

Aññataro ca pan'āyasmā Bhāradvājo arahataɱ ahosī ti.|| ||

 

§

 

Sutta 9

Sundarika Suttaɱ

[9.1][pts] Evaɱ me sutaɱ:|| ||

Ekaɱ samayaɱ Bhagavā Kosalesu viharati Sundarikāya nadiyā tīre.|| ||

2. Tena kho pana samayena Sundarika Bhāradvājo brāhmaṇo Sundarikāya nadiyā tīre aggiɱ juhati aggihuttaɱ paricarati.|| ||

3. Atha kho Sundarika Bhāradvājo brāhmaṇo aggiɱ juhitvā aggihuttaɱ paricaritvā uṭṭhāy'āsanā samantā catu-d-disā anuvilokesi:|| ||

"Ko nu kho imaɱ havyasesaɱ bhuñjeyyāsī" ti?|| ||

4. Addasā kho Sundarika Bhāradvājo brāhmaṇo Bhagavantaɱ aññatarasmiɱ rukkha-mūle sasīsaɱ pārutaɱ nisinnaɱ.|| ||

Disvāna vāmena hatthena havyasesaɱ gahetvā dakkhiṇa hatthena kamaṇḍaluɱ gahetvā yena Bhagavā ten'upasankami.|| ||

5. Atha kho Bhagavā Sundarika Bhāradvājassa brāhmaṇassa padasaddena sīsaɱ vivari.|| ||

6. Atha kho Sundarika Bhāradvājo brāhmaṇo muṇḍo [168] "Ayaɱ bhavaɱ muṇḍako ayaɱ bhavan" ti tato ca puna nivattitukāmo ahosi.|| ||

7. Atha kho Sundarika Bhāradvājassa brāhmaṇassa etad ahosi:|| ||

"Muṇḍā pi hi idh'ekacce brāhmaṇā bhavanti.|| ||

Yam nūnāhaɱ upasankamitvā jātiɱ puccheyyan" ti.|| ||

8. Atha kho Sundarika Bhāradvājo brāhmaṇo yena Bhagavā ten'upasŋakami.|| ||

Upasaŋkamitvā Bhagavantaɱ etad avoca:|| ||

"Kiɱ jacco bhavan" ti.|| ||

9. [Bhagavā:]|| ||

"Mā jātiɱ puccha caraṇañ ca puccha||
kaṭṭhā have jāyati jātavedo,||
Nīcā kulīno pi munī dhitīmā||
ājāniyo hoti hirīnisedho.|| ||

Saccena danto damasā upeto||
vedantagū vusitabrahma-cariyo,||
Yaññūpanīto tam upavhayetha||
kālena so juhati dakkhiṇeyyo" ti.|| ||

10. [Brāhmaṇo:]|| ||

"Addhā suyiṭṭhaɱ suhutaɱ mama-y-idaɱ||
yaɱ tādisaɱ vedagum addasāmi,||
Tumhādisānaɱ hi adassanena||
añño jano bhuñjati havyasesan" ti.|| ||

Bhuñjatu bhavaɱ Gotamo.|| ||

Brāhmaṇo bhavan" ti.|| ||

11. [Bhagavā:)|| ||

"Gāthābhigītaɱ me abhojaneyyaɱ||
sampassataɱ brāhmaṇa n'esadhammo,||
Gāthābhigītaɱ panudanti Buddhā||
Dhamme sati brāhmaṇa vutti-r-esā.|| ||

Aññena ca kevalinaɱ mahesiɱ||
khīṇ'āsavaɱ kukkuccavūpasantaɱ,||
Annena pānena upaṭṭhahassu||
khettaɱ hi taɱ puññapekkhassa hotī" ti.|| ||

[Brāhmaṇo:]|| ||

12. "Atha kassa c'āhaɱ bho Gotama imaɱ havyasesaɱ dammī" ti.|| ||

13. [Bhagavā:]|| ||

"Na khvāhaɱ brāhmaṇa passāmi sa-devake loke sa-mārake sa-brahmake sa-s-samaṇa-brāhmaṇiyā pajāya sadeva-manussāya yass'eso havyaseso bhutto sammā pariṇāmaɱ [169] gaccheyya aññatra brāhmaṇa Tathāgatassa vā Tathāgata-sāvakassa vā.|| ||

Tena hi tvaɱ brāhmaṇa taɱ havyasesaɱ appaharite vā chaḍḍehi appāṇake vā udeka opilāpehī" ti.|| ||

14. Atha kho Sundarika Bhāradvājo brāhamaṇo taɱ havyasesaɱ1 appāṇake udake opilāpesi.|| ||

15. Atha kho so havyaseso udake pakkhitto cicciṭāyati,||
ciṭiciṭāyati,||
sandhūpāyati,||
sampadhūpāyati.|| ||

Seyyathā pi nāma phālo divasa1santatto udake pakkhitto cicciṭāyati,||
ciṭiciṭāyati,||
sandhūpāyati,||
sampadhūpāyati,||
evam eva so havyaseso udake pakkhitto cicciṭāyati,||
ciṭiciṭāyati,||
sandhūpāyati,||
sampadhūpāyati.|| ||

16. Atha kho Sundarika Bhāradvājo brāhmaṇo saɱviggo loma-haṭṭha-jāto yena Bhagavā ten'upasankami.|| ||

Upasaŋkamitvā eka-m-antaɱ aṭṭhāsi.|| ||

17. Eka-m-antaɱ ṭhitaɱ kho Sundarika Bhāradvājaɱ brāhmaṇaɱ Bhagavā gāthāhi ajjhabhāsi:|| ||

"Mā brāhmaṇa dāru samādahāno||
suddhiɱ amaññi bahiddhā hi etaɱ,||
Na hi tena suddhiɱ kusalā vadanti||
yo bāhirena parisuddhim icche.|| ||

Hitvā ahaɱ brāhmaṇa dārudāhaɱ||
ajjhattam eva jalayāmi jotiɱ,||
Niccaggini niccasamāhitatto||
arahaɱ ahaɱ Brahma-cariyaɱ carāmi.|| ||

Māno hi te brāhmaṇa khāribhāro||
kodho dhūmo bhasmani mosavajjaɱ,||
jivhā sujā hadayaɱ jotiṭṭhānaɱ||
attā sudanto purisassa joti.|| ||

Dhammo rahado brāhmaṇa sīlatittho||
anāvilo sabbhi sataɱ pasattho,||
Yattha have vedaguno sinātā||
anallīnagattā va taranti pāraɱ.|| ||

Saccaɱ dhammo saɱyamo Brahma-cariyaɱ||
majjhesitā brāhmaṇa brahmapatti,||
[170] satujju-bhūtesu namo karohi||
tam ahaɱ naraɱ dhammasārīti brūmī" ti.|| ||

18. Evaɱ vutte Sundarika Bhāradvājo brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rupāni dakkhintī.|| ||

Evam evaɱ bhotā Gotamena aneka-pariyāyena dhammo pakāsito.|| ||

"Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyyāhaɱ bhoto Gotamassa santike pabbajjaɱ,||
labheyyaɱ upasampadan" ti.|| ||

Alattha kho Sundarika Bhāradvājo brāhmaṇo Bhagavato santike pabbajjaɱ,||
alattha upasampadaɱ.|| ||

Acir'ūpasampanno kho pan'āyasmā Sundarika Bhāradvājo vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

"Khīṇā jāti,||
vusitaɱ Brahma-cariyaɱ,||
kataɱ karaṇīyaɱ.||
Nāparaɱ itthattāyā" ti abbhaññāsi.|| ||

Aññataro ca pan'āyasmā Bhāradvājo arahataɱ ahosī.|| ||

 

§

 

Sutta 10

Bahudhītu Suttaɱ

[10.1][pts] Evaɱ me sutaɱ:|| ||

Ekaɱ samayaɱ Bhagavā Kosalesu viharati aññatarasmiɱ vana-saṇḍe.|| ||

3. Tena kho pana samayena aññatarassa Bhāradvājagottassa brāhmaṇassa catuddasa balivaddā naṭṭhā honti.|| ||

3. Atha kho Bhāradvājagottā brāhmaṇo te balivadde gavesanto yena so vana-saṇḍo ten'upasankami.|| ||

Upasaŋkamitvā addasa Bhagavantaɱ tasmiɱ vana-saṇḍe nisinnaɱ pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭha-petvā.|| ||

4. Disvāna yena Bhagavā ten'upasankami.|| ||

Upasaŋkamitvā Bhagavato santike imā gāthāyo abhāsi:|| ||

"Na hi nūn'imassa samaṇassa balivaddā catuddasa,||
Ajja saṭṭhiɱ na dissanti ten'āyaɱ samaṇo sukhī.|| ||

Na hi nūn'imassa samaṇassa tilā khettasmiɱ pāpakā,||
Ekapaṇṇā dvipaṇṇā ca ten'āyaɱ samaṇo sukhī.|| ||

Na hi nūn'imassa samaṇassa tucachakoṭṭhasmiɱ mūsikā,||
Ussoḷhikāya naccanti ten'āyaɱ samaṇo sukhī.|| ||

Na hi nūn'imassa samaṇassa santhāro sattamāsiko,||
Uppāṭakehi saɱchanno ten'āyaɱ samaṇo sukhī.|| ||

Na hi nūn'imassa samaṇassa vidhavā satta dhitaro,||
Ekaputtā dviputtā ca ten'āyaɱ samaṇo sukhī.|| ||

Na hi nūn'imassa samaṇassa piŋgalā tilakā hatā,||
Sottaɱ pādena bodheti ten'āyaɱ samaṇo sukhī.|| ||

Na hi nūn'imassa samaṇassa paccūsamhi iṇāyikā,||
Detha dethā ti codenti ten'āyaɱ samaṇo sukhī" ti.|| ||

[171] 5. [Bhagavā:]|| ||

"Na hi mayhaɱ brāhmaṇa balivaddā catuddasa,||
Ajja saṭṭhi na dissanti ten'āhaɱ brāhmaṇā sukhī.|| ||

Na hi mayhaɱ brāhmaṇa tilā khettasmim pāpakā||
Ekapaṇṇā dvipaṇṇā ca ten'āhaɱ brāhmaṇā sukhī.|| ||

Na hi mayhaɱ brāhmaṇa tucchakoṭṭhasmiɱ mūsikā,||
Ussoḷahikāya naccanti ten'āhaɱ brāhmaṇā sukhī.|| ||

Na hi mayhaɱ brāhmaṇa santhāro sattamāsiko,||
Uppāṭakehi saɱchanno ten'āhaɱ brāhmaṇā sukhī.|| ||

Na hi mayhaɱ brāhmaṇa vidhavā sattadhītaro,||
Ekaputtā dviputtā ca ten'āhaɱ brāhmaṇā sukhī.|| ||

Na hi mayhaɱ brāhmaṇa piŋgalā tilakā hatā,||
Sottaɱ pādena bodheti ten'āhaɱ brāhmaṇā sukhī.|| ||

Na hi mayhaɱ brāhmaṇa paccūsamhi iṇāyikā,||
Detha dethā ti codenti ten'āhaɱ brāhmaṇā sukhī" ti.|| ||

Evaɱ vutte Bhāradvājagotto brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rupāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyyāhaɱ bhoto Gotamassa santike pabbajjaɱ,||
labheyyaɱ upasampadan" ti.|| ||

Alattha kho Bhāradvājagotto brāhmaṇo Bhagavato santike pabbajjaɱ,||
alattha upasampadaɱ.|| ||

Acir'ūpasampanno kho pan'āyasmā Bhāradvājagotto brāhmaṇo vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

"Khīṇā jāti,||
vusitaɱ Brahma-cariyaɱ,||
kataɱ karaṇīyaɱ.||
Nāparaɱ itthattāyā" ti abbhaññāsi.|| ||

Aññataro ca pan'āyasmā Bhāradvājo arahataɱ ahosī.|| ||

 


[172]

Upāsaka Vagga

 


 

Sutta 11

Kasī Suttaɱ

[11.1][pts][than][ati-piya] Evaɱ me sutaɱ:|| ||

Ekaɱ samayaɱ Bhagavā Magadhesu viharati Dakkhiṇāgirismiɱ Ekanālāyaɱ brāhmaṇa-gāme.|| ||

2. Tena kho pana samayena Kasī Bhāradvājassa brāhmaṇassa pañca-mattāni nangalasatāni payuttāni honti vappakāle.|| ||

3. Atha kho Bhagavā pubnhasamayaɱ nivāsetvā patta-cīvaram ādāya yena Kasī Bhāradvājassa brāhmaṇassa kammanto ten'upasankami.|| ||

4. Tena kho pana samayena Kasī Bhāradvājassa brāhmaṇassa parivesanā vattati.|| ||

5. Atha kho Bhagavā yena parivesanā ten'upasankami.|| ||

Upasaŋkamitvā eka-m-antaɱ aṭṭhāsi.|| ||

6. Addasā kho Kasī Bhāradvājo brāhmaṇo Bhagavantaɱ piṇḍāya ṭhitaɱ.|| ||

Disvāna Bhagavantaɱ etad avoca:|| ||

"Ahaɱ kho samaṇa kasāmi ca vapāmi ca.|| ||

Kasitvā ca vapitvā ca bhuñjāmi.|| ||

Tvam pi samaṇa kasassu ca vapassu ca.|| ||

Kasitvā ca vapitvā ca bhuñjassū" ti.|| ||

7. [Bhagavā:]

"Aham pi kho brāhmaṇa kasāmi ca vapāmi ca.

Kasitvā ca vapitvā ca bhūñjāmī" ti.|| ||

8. [Brāhmaṇo:]

"Na kho mayaɱ passāma bhoto Gotamassa yugaɱ vā nangalaɱ vā phālaɱ vā pācanaɱ vā balivadde vā.|| ||

Atha ca pana bhavaɱ Gotamo evam āha:

Aham pi kho brāhmaṇa kasāmi ca vapāmi ca kasitvā ca vapitvā ca bhuñjāmī" ti.|| ||

9. Atha kho Kasī Bhāradvājo brāhmaṇo Bhagavantaɱ gāthāya ajjhabhāsi:|| ||

"Kassako paṭijānāsi na ca passāmi te kasiɱ,||
Kassako pucchito brūhi kathaɱ jānemu taɱ kasin" ti?|| ||

10. [Bhagavā:]|| ||

"Saddhā bījaɱ tapo vuṭṭhī paññā me yuganangalaɱ,||
Hiri īsā mano yottaɱ sati me phālapācanaɱ.||
Kāyagutto vacīgutto āhāre udare yato,||
Saccaɱ karomi niddānaɱ soraccaɱ me pamocanaɱ.||
[173] Viriyaɱ me dhuradhorayhaɱ yogakkhemādhivāhanaɱ,||
Gacchati anivattantaɱ yattha gantvā na socati,||
Evam esā kasī kaṭṭhā sā hoti amatapphalā,||
Etaɱ kasiɱ kasitvāna sabba-dukkhā pamuccatī" ti.|| ||

11. [Brāhmaṇo:]

"Bhuñjatu bhavaɱ Gotamo.|| ||

Kassako bhavaɱ Gotamo, yañ hi Gotamo amataphalaɱ pi kasiɱ kasatī" ti.|| ||

[Bhagavā:]

"Gāthābhigītam me abhojaneyyaɱ||
sampassataɱ brāhmaṇa n'esa dhammo,||
Gāthābhigītaɱ panudanti buddhā||
dhamme sati brāhmaṇa vutti-r-esā.||
Aññena ce kevalinaɱ mahesiɱ||
khīṇ'āsavaɱ kukkuccavūpasantaɱ,||
Annena pānena upaṭṭhahassu||
khettañ hi taɱ puññapekkhassa hotī" ti.|| ||

Evaɱ vutte Kasī Bhāradvājo brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rūpāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

 

Sutta 12

Udaya Suttaɱ

[12.1][pts][olen] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ -|| ||

2. Atha kho Bhagavā pubbaṇha-samayaɱ nivāsetvā patta-cīvaram ādāya yena Udayassa brāhmaṇassa nivesanaɱ ten'upasankami.|| ||

3. Atha kho Udayo brāhmaṇo Bhagavato pattaɱ odanena pūresi.|| ||

4. Dutiyam pi kho Bhagavā pubbaṇha-samayaɱ nivāsetvā patta-cīvaram ādāya yena Udayassa brāhmaṇassa nivesanaɱ ten'upasankami.|| ||

Dutiyam pi kho Udayo brāhmaṇo Bhagavato pattaɱ odanena pūresi.|| ||

5. Tatiyami pi kho Bhagavā pubnhasamayaɱ nivāsetvā patta-cīvaram ādāya yena Udayassa brāhmaṇassa nivesanaɱ ten'upasankami.|| ||

Tatiyam pi kho Udayo brāhmaṇo Bhagavato pattaɱ [174] odanena pūretvā Bhagavantaɱ etad avoca:|| ||

"Pakaṭṭhako'yaɱ samaṇo Gotamo puna-p-punaɱ āga-c-chatī" ti.|| ||

[Bhagavā:]|| ||

"Puna-p-punaɱ c'eva vapanti bījaɱ||
puna-p-punaɱ vassati devarājā,||
Puna-p-punaɱ khettaɱ kasanti kassakā||
puna-p-punaɱ dhaññamupeti raṭṭhaɱ||
Puna-p-punaɱ yā cakā yā cayanti||
puna-p-punaɱ dānapatī dadanti,||
Puna-p-punaɱ dānapatī daditvā||
puna-p-punaɱ saggamupenti ṭhānaɱ.||
Puna-p-punaɱ khīranikā duhanti||
puna-p-punaɱ vaccho upeti mātaraɱ,||
Puna-p-punaɱ kilamati phandati ca||
puna-p-punaɱ gabbhamupeti mando.||
Puna-p-punaɱ jāyati mīyati ca||
puna-p-punaɱ sīvathikaɱ haranti,||
Maggañ ca laddhā apuna-b-bhavāya||
na puna-p-punaɱ jāyati bhūripañño" ti.|| ||

Evaɱ vutte Udayo brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rūpāni dakkhintī.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

 

Sutta 13

Devahita Suttaɱ

[13.1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ-|| ||

2. Tena kho pana samayena Bhagavā vātehi ābādhiko hoti.|| ||

Āyasmā ca Upavāno Bhagavato upaṭṭhāko hoti.|| ||

3. Atha kho Bhagavā āyasmantaɱ Upavānaɱ āmantesi:|| ||

"Iŋgha me tvaɱ Upavāna uṇhodakaɱ jānāhī" ti.|| ||

4. "Evaɱ bhante" ti kho āyasmā Upavāno Bhagavato paṭissutvā nivāsetvā patta-cīvaram ādāya yena Devahitassa brāhmaṇassa nivesanaɱ ten'upasankami.|| ||

Upasaŋkamitvā tuṇhī-bhūto eka-m-antaɱ aṭṭhāsi.|| ||

5. Addasā kho Devahito brāhmaṇo āyasmantaɱ Upavānaɱ tuṇhī-bhūtaɱ eka-m-antaɱ ṭhitaɱ.|| ||

Disvāna āyasmantaɱ Upavānaɱ gāthāya ajjhabhāsi:|| ||

[175] "Tuṇhībhuto bhavaɱ tiṭṭhaɱ muṇḍo sanghāṭipāruto,||
Kiɱ patthayāno kiɱ esaɱ kiɱ nu yācitum āgato" ti?.|| ||

6. [Upavāno:]|| ||

"Arahaɱ Sugato loke vāteh'ābādhiko muni,||
Sace uṇhodakaɱ atthi munino dehi brāhmaṇa.||
Pūjito pūjaneyyānaɱ sakkareyyāna sakkato,||
Apacito apaceyyānaɱ tassa icchāmi hātave" ti.|| ||

7. Atha kho Devahito brāhmaṇo uṇhodakassa kājaɱ purisena gāhāpetvā phāṇitassa ca puṭaɱ āyasmato Upavānassa pādāsi.|| ||

8. Atha kho āyasmā Upavāno yena Bhagavā ten'upasankami.|| ||

Upasaŋkamitvā Bhagavantaɱ uṇhodakena nahāpetvā uṇhodakena phāṇitaɱ āloḷetvā Bhagavato pādāsi.|| ||

9. Atha kho Bhagavato so ābādho paṭippassambhi.|| ||

10. Atha kho Devahito brāhmaṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

11. Eka-m-antaɱ nisinno kho Devahito brāhmaṇo Bhagavantaɱ gāthāya ajjhabhāsi.|| ||

"Kattha dajjā deyya-dhammaɱ kattha dinnaɱ maha-p-phalaɱ,||
Kathaɱ hi yajamānassa katthaɱ ijjhati dakkhiṇā" ti?|| ||

12. [Bhagavā:]|| ||

"Pubbe-nivāsaɱ yo vedī saggāpāyañ ca passati,||
Atho jātikkhayaɱ patto abhiññāvosito muni.||
Ettha dajjā deyya-dhammaɱ ettha dinnaɱ maha-p-phalaɱ,||
Evaɱ hi yajamānassa evaɱ ijjhati dakkhiṇā" ti.|| ||

13. Evaɱ vutte Devahito brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rūpāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

 

Sutta 14

Mahāsāḷa Suttaɱ

[14.1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ -|| ||

2. Atha kho aññataro brāhmaṇa-mahāsāḷo lūkho lūkhapā- [176] puraṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

3. Eka-m-antaɱ nisinnaɱ kho taɱ brāhmaṇa-mahāsāḷaɱ Bhagavā etad avoca.|| ||

"Kin nu tvaɱ brāhmaṇa lūkho lūkhapāpuraṇo" ti?|| ||

4. [Brāhmaṇo:]|| ||

"Idha me bho Gotama cattāro puttā.|| ||

Te maɱ dārehi sampuccha gharā nikkhāmentī" ti.|| ||

5. [Bhagavā:]|| ||

"Tena hi tvaɱ brāhmaṇa imā gāthāyo pariyāpuṇitvā sabhāyaɱ mahā-jana-kāye sanni-patite puttesu ca sanni-sinnesu bhāsassu:

'Ye hi jātehi nandissaɱ yesañ ca bhavam icchisaɱ,||
Te maɱ dārehi sampuccha sā va vārenti sūkaraɱ.||
Asantā kira maɱ jammā tāta tātā ti bhāsare,||
Rakkhasā puttarūpena te jahanti vayogataɱ.
Asso va jiṇṇo nibbhogo khādanā apanīyati,||
Bālakānaɱ pitā thero parāgāresu bhikkhati.||
Daṇḍo va kira me seyyo yañ ce puttā anassavā||
Caṇḍam pi goṇaɱ vāreti atho caṇḍam pi kukkuraɱ.||
Andhakāre pure hoti gambhīre gādhaɱ edhati,||
Daṇḍassa anubhāvena khalitvā paṭitiṭṭhatī' ti.|| ||

6. Atha kho so brāhmaṇa mahāsāḷo Bhagavato santike imā gāthāyo pariyāpuṇitvā sabhāyaɱ mahā-jana-kāye sanni-patite puttesu ca sanni-sinnesu abhāsi.|| ||

"Ye hi jātehi nandissaɱ yesañ ca bhavam icchisaɱ,||
Te maɱ dārehi sampuccha sā va vārenti sūkaraɱ.||
Asantā kira maɱ jammā tāta tātā ti bhāsare,||
Rakkhasā puttarūpena TE jahanti vayogataɱ.||
Asso va jiṇṇo nibbhogo khādanā apanīyati, Bālakānaɱ pitā thero parāgāresu bhikkhati.||
Daṇḍova kira me seyyo yañ ce puttā anassavā,||
Caṇḍam pi goṇaɱ vāreti atho caṇḍam pi kukkuraɱ.||
Andhakāre pure hoti gambhīre gādhaɱ edhati,||
Daṇḍassa anubhāvena khalitvā paṭitiṭṭhatī" ti.|| ||

[177] 7. Atha kho naɱ brāhmaṇa-mahāsāḷaɱ puttā gharaɱ netvā nāhāpetvā paccekaɱ dussayugena acchādesuɱ.|| ||

8. Atha kho so brāhmaṇa-mahāsāḷo ekaɱ dussayugaɱ ādāya yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

9. Eka-m-antaɱ nisinanno kho so brāhmaṇa-mahāsāḷo Bhagavantaɱ etad avoca:|| ||

"Mayaɱ bho Gotama brāhmaṇā nāma ācariyassa ācariyadhanaɱ pariyesāma.|| ||

Paṭigaṇhātu me bhavaɱ Gotamo ācariyadhanan" ti.|| ||

10. Paṭiggahesi Bhagavā anukampaɱ upādāya.|| ||

11. Atha kho brāhmaṇa-mahāsāḷo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rūpāni dakkhintī" ti.|| ||

Evam evaɱ bhotā Gotamena aneka-pariyāyena Dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

 

Sutta 15

Mānatthaddha Suttaɱ

[15.1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ-|| ||

2. Tena kho pana samayena Mānatthaddho nāma brāhmaṇo Sāvatthiyaɱ paṭivasati.|| ||

So n'eva mātaraɱ abhivādeti||
na pitaraɱ abhivādeti,||
na ācariyaɱ abhivādeti,||
na jeṭṭhabhātaraɱ abhivādeti.|| ||

3. Tena kho pana samayena Bhagavā mahatiyā parisāya parivuto dhammaɱ desesi.|| ||

4. Atha kho Mānatthaddhassa brāhmaṇassa etad ahosi:|| ||

"Ayaɱ kho Samaṇo Gotamo mahatiyā parisāya parivuto dhammaɱ deseti.|| ||

Yaɱ nūnāhaɱ yena Samaṇo Gotamo ten'upasankameyyaɱ.|| ||

Sace maɱ Samaṇo Gotamo ālapissati,||
aham pi taɱ ālapissāmi.|| ||

No ce maɱ Samaṇo Gotamo ālapissati||
aham pi taɱ n'ālapissasāmī" ti.|| ||

5. Atha kho Mānatthaddho brāhmaṇo yena Bhagavā ten'upasankami.|| ||

Upasaŋkamitvā tuṇhī-bhūto eka-m-antaɱ aṭṭhāsi.|| ||

6. Atha kho Bhagavā taɱ n'ālapi.|| ||

7. Atha kho Mānatthaddho brāhmaṇo "nāyaɱ Samaṇo Gotamo kiñci jānātī" ti tato puna nivattitukāmo ahosi.|| ||

[178] 8. Atha kho Bhagavā Mānatthaddhassa brāhmaṇassa cetasā ceto-parivitakkam aññāya Mānatthaddhaɱ brāhmaṇaɱ gāthāya ajjhabhāsi:|| ||

"Na mānaɱ brūhmaṇā sādhu atthi kassīdha brāhmaṇā,||
Yena atthena āgacchi tam evam anubrūhaye" ti.|| ||

9. Atha kho Mānatthaddho brāhmaṇo "cittaɱ me Samaṇo Gotamo jānātī" ti tatth'eva Bhagavato pādesu sirasā nipatitvā Bhagavato pādāni mukhena paricumbati,||
pāṇīhī ca parisambāhati,||
nāmañ ca sāveti:|| ||

"Mānatthaddhohaɱ bho Gotama||
Mānatthaddhohaɱ bho gotamā" ti.|| ||

10. Atha kho sā parisā abbhutacittajātā ahosi.|| ||

"Acchariyaɱ vata bho||
abbhūtaɱ vata bho.|| ||

Ayaɱ hi Mānatthaddho brāhmaṇo n'eva mātaraɱ abhivādeti||
na pitaraɱ abhivādeti||
na ācariyaɱ abhivādeti||
na jeṭṭhabhātaraɱ abhivādeti.|| ||

Atha ca pana Samaṇe Gotame eva-rūpaɱ paramaɱ nipaccākāraɱ karotī" ti.|| ||

11. Atha kho Bhagavā Mānatthaddhaɱ brāhmaṇaɱ etad avoca:|| ||

"Alaɱ brāhmaṇa.|| ||

Uṭṭhehi sake āsane nisīda,||
yato te mayi cittaɱ pasannan" ti.|| ||

12. Atha kho Mānatthaddhaɱ brāhmaṇo sake āsane nisīditvā Bhagavantaɱ gāthāya ajjhabhāsi:|| ||

"Kesu na mānaɱ kayirātha kesu assa sagāravo,||
Ky assa apacitā assu ky assa sādhu supūjitā" ti.|| ||

[Bhagavā:]|| ||

"Mātari pitari vā pi atho jeṭṭhamhi bhātari,||
Ācariye catutthaɱhi tesu na mānaɱ kayirātha.||
Tesu assa sagāravo ty assu apacitā assu||
ty assu sādhu supūjitā.||
Arahante sītibhūte katakicce anāsave,||
Nihacca mānaɱ atthaddho te namassa anuttare" ti.|| ||

14. Evaɱ vutte Mānatthaddho brāhamaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto 'rūpāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

[179]

Sutta 16

Paccanīka Suttaɱ

[16.1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tena kho pana samayena Paccanīkasāto nāma brāhmaṇo Sāvatthiyaɱ paṭivasati.|| ||

3. Atha kho Paccanīkasātassa brāhmaṇassa etad ahosi.|| ||

"Yaɱ nūnāhaɱ yena Samaṇo Gotamo ten'upasankameyyaɱ,||
yaɱ yad eva Samaṇo Gotamo bhāsissati,||
taɱ tad ev'assāhaɱ paccanīkāssan" ti.|| ||

4. Tena kho pana samayana Bhagavā ajjhokāse caŋkamati.|| ||

5. Atha kho Paccanīkasāto brāhmaṇo yena Bhagavā ten'upasankami.|| ||

Upasaŋkamitvā Bhagavantaɱ caŋkamantaɱ anucaŋkama-māno Bhagavantaɱ etad avoca:|| ||

"Bhaṇa samaṇa dhamman" ti.|| ||

6. [Bhagavā:]|| ||

"Na Paccanīkasātena suvijānaɱ su-bhāsitaɱ,||
Upakkiliṭṭhacittena sārambhabahulena ca||
Yo ca vineyya sārambhaɱ a-p-pasādañ ca cetaso,||
Āghātaɱ paṭinissajja sa ve jaññā su-bhāsitan" ti.|| ||

7. Evaɱ vutte Paccanīkasāto brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto 'rūpāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

 

Sutta 17

Nava-Kammika Suttaɱ

[17.1][pts][than] Evaɱ me sutaɱ:|| ||

Ekaɱ samayaɱ Bhagavā Kosalesu viharati aññatarasmiɱ vana-saṇḍe.|| ||

2. Tena kho pana samayena Navakammika Bhāradvājo brāhmaṇo tasmiɱ vana-saṇḍe kammantaɱ kārāpeti.|| ||

3. Addasā kho Navakammika Bhāradvājo brāhmaṇo Bhagavantaɱ aññatarasmiɱ sālarukkha-mūle nisinnaɱ pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭha-petvā.|| ||

4. Disvān'assa etad ahosi:

"Ahaɱ kho pana imasmiɱ vana-saṇḍe kammantaɱ kārāpento ramāmi.|| ||

Ayaɱ Samaṇo Gotamo kiɱ kārāpento ramatī" ti?|| ||

5. Atha kho Navakammika Bhāradvājo brāhmaṇo yena [180] Bhagavā ten'upasankami.|| ||

Upasaŋkamitvā Bhagavantaɱ gāthāya ajjhabhāsi.|| ||

"Ke nu kammantā kayiranti bhikkhu sālavane tava,||
Yad ekako araññasmiɱ ratiɱ vindati Gotamā" ti?|| ||

6. [Bhagavā:]|| ||

"Na me vanasmiɱ karaṇīyam atthi ucchinna-mūlaɱ me vanaɱ visūkaɱ,||
So'haɱ vane nibbanatho visallo||
eko rame aratiɱ vippahāyā" ti.|| ||

7. Evaɱ vutte Navakammika Bhāradvājo brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto 'rūpāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

 

Sutta 18

Kaṭṭhahāra Suttaɱ

[18.1][pts][than] Evaɱ me sutaɱ:|| ||

Ekaɱ samayaɱ Bhagavā Kosalesu viharati aññatarasmiɱ vana-saṇḍe.|| ||

2. Tena kho pana samayena aññatarasmiɱ Bhāradvājagottassa brāhmaṇassa sambahulā antevāsikā kaṭṭhahārakā māṇavakā yena so vana-saṇḍo ten'upasankamiɱsu.|| ||

3. Upasaŋkamitvā addasaɱsu Bhagavantaɱ tasmiɱ vana-saṇḍe nisinnaɱ pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭha-petvā.|| ||

Disvāna yena Bhāradvājagotto brāhmaṇo ten'upasankamiɱsu.|| ||

4. Upasaŋkamitvā Bhāradvājagottaɱ brāhmaṇaɱ etad avocuɱ:|| ||

"Yagghe bhavaɱ jāneyya asukasmiɱ vana-saṇḍe samaṇo nisinno pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭha-petvā" ti.|| ||

5. Atha kho Bhāradvājagotto brāhmaṇo tehi māṇavakehi saddhiɱ yena so vana-saṇḍo ten'upasankami.|| ||

Upasaŋkamitvā addasā kho Bhagavantaɱ tasmiɱ vana-saṇḍe nisinnaɱ pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭha-petvā.|| ||

Disvāna yena Bhagavā ten'upasankami.|| ||

Upasaŋkamitvā Bhagavantaɱ gāthāhi ajjhabhāsi:|| ||

"Gamhīrarūpe bahubherave vane||
suññaɱ araññaɱ vijanaɱ vigāhiya,||
[181] aniñjamānena ṭhitena vaggunā||
sucārurūpaɱ vata bhikkhu jhāyasi.|| ||

Na yattha gītā na pi yattha vāditaɱ||
eko araññe vanamassito muni,||
accherarūpaɱ paṭibhāti maɱ idaɱ||
yad ekako pītimano vane vase.|| ||

Maññā mahaɱ lokādhipatī saha-vyataɱ||
ākaŋkha-māno tidivaɱ anuttaraɱ,||
kasmā bhavaɱ vijanam araññam assito||
tapo idha kubbasi brahmapattiyā" ti.|| ||

6. [Bhagavā:]|| ||

"Yā kāci kaŋkhā abhinandanā vā||
aneka-dhātusu puthū sadā sitā,||
aññāṇamūlappabhavā pajappitā||
sabbā mayā byantikatā samūlikā.|| ||

So'haɱ akaŋkho apiho anūpayo||
sabbesu dhammesu visuddhadassano,||
Pappuyya sambodhim anuttaraɱ sivaɱ||
jhāyām'ahaɱ brāhmaṇa raho vīsārado" ti.|| ||

Evaɱ vutte Bhāradvājagotto brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto 'rūpāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

 

Sutta 19

Mātu-Posaka Suttaɱ

[19.1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ -|| ||

2. Atha kho Mātu-posako brāhmaṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodinīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

3. Eka-m-antaɱ nisinno kho Mātu-posako brāhmaṇo Bhagavantaɱ etad avoca:|| ||

"Ahaɱ hi bho Gotama dhammena bhikkhaɱ pariyesāmi.|| ||

Dhammena bhikkhaɱ pariyesitvā mātā-pitaro posemi.|| ||

Kacc'āhaɱ bho Gotama evaɱ-kārī kicca-kārī homī" ti?|| ||

4. "Taggha tvaɱ brāhmaṇa evaɱ-kārī kicca-kārī hosi.|| ||

Yo kho brāhmaṇa dhammena bhikkhaɱ pariyesati||
dhammena [182] bhikkhaɱ pariyesitvā mātā-pitaro poseti||
bahuɱ so puññaɱ pasavatī" ti.|| ||

[Bhagavā:]|| ||

"Yo mātaraɱ vā pitaraɱ vā macco dhammena posati,||
Tāya naɱ pāricariyāya mātā-pitusu paṇḍitā,||
Idh'eva naɱ pasaɱ-santi pecca sagge pamodatī" ti.|| ||

Evaɱ vutte Mātu-posako brāhmaṇo Bhagavantaɱ etad avoca:

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto 'rūpāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

 

Sutta 20

Bhikkhaka Suttaɱ

[20.1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ-|| ||

2. Atha kho Bhikkhako brāhmaṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

3. Eka-m-antaɱ nisinno kho Bhikkhako brāhmaṇo Bhagavantaɱ etad avoca:|| ||

"Aham pi kho bho Gotama bhikkhako bhavam pi bhikkhako.|| ||

Idha no kiɱ nānā-karaṇan" ti?|| ||

[Bhagavā:]|| ||

"Na tena bhikkhako hoti yāvatā bhikkhavo pare,||
Vissaɱ dhammaɱ samādāya bhikkhu hoti na tāvatā.||
Yo'dha puññañ ca pāpañ ca bāhitvā Brahma-cariyaɱ,||
Saŋkhāya loke carati sa ve bhikkhū" ti vuccati.|| ||

Evaɱ vutte bhikkhako brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto 'rūpāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

 

Sutta 21

Saŋgārava Suttaɱ

[21.1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ-|| ||

2. Tena kho pana samayena Saŋgāravo nāma brāhmaṇo Sāvatthiyaɱ paṭivasati.|| ||

Udakasuddhiko udakena suddhiɱ pacceti.|| ||

Sāyapātaɱ udakorohaṇānuyogam anuyutto viharati.|| ||

3. Atha ko āyasmā Ānando pubbaṇha-samayaɱ nivāsetvā patta-cīvaram ādāya Sāvatthiɱ piṇḍāya pāvisi.|| ||

Sāvatthiyaɱ piṇḍāya caritvā pacchā-bhattaɱ piṇḍa-pāta-paṭikkanto yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

[183] 4. Eka-m-antaɱ nisinno kho āyasmā Ānando Bhagavantaɱ etad avoca:|| ||

"Idha bhante Saŋgāravo nāma brāhmaṇo Sāvatthiyaɱ paṭivasati,||
udakasuddhiko udakena suddhiɱ pacceti.|| ||

Sāyapātaɱ udakorohaṇānuyogam anuyutto viharati.|| ||

Sādhu bhante Bhagavā yena Saŋgāravassa brāhmaṇassa nivesanaɱ ten'upasankamatu anukampaɱ upādāyā" ti.|| ||

5. Adhivāsesi Bhagavā tuṇhī-bhāvena.|| ||

6. Atha kho Bhagavā pubbaṇha-samayaɱ nivāsetvā patta-cīvaram ādāya yena Saŋgāravassa brāhmaṇassa nivesanaɱ ten'upasankami.|| ||

Upasaŋkamitvā paññatte āsane nisīdi.|| ||

7. Atha kho Saŋgāravo brāhmaṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ vīti-sāretvā eka-m-antaɱ nisīdi.|| ||

8. Eka-m-antaɱ nisnaɱ kho Saŋgāravaɱ brāhmaṇaɱ Bhagavā etad avoca:|| ||

"Saccaɱ kira tvaɱ brāhmaṇa udakasuddhiko udakena suddhiɱ paccesi?|| ||

Sāyapātaɱ udakorohaṇānuyogam anuyutto viharasī" ti?|| ||

9. "Evaɱ bho Gotamā" ti.|| ||

10. "Kam pana tvaɱ brāhmaṇa attha-vasaɱ sampassamāno udakasuddhiko udakasuddhiɱ paccesi.|| ||

Sāyapātaɱ udakorohaṇānuyogam anuyutto viharasī" ti?|| ||

11. "Idha me bho Gotama ahaɱ yaɱ divā pāpa-kammaɱ kataɱ hoti,||
taɱ sāya nahānena pavāhemi.|| ||

Yaɱ rattiɱ pāpa-kammaɱ kataɱ hoti,||
taɱ pātaɱ nahānena pavāhemi.|| ||

Imaɱ khvāhaɱ bho Gotama attha-vasaɱ sampassamāno udakasuddhiko udakena suddhiɱ paccemi.|| ||

Sāyapātaɱ udakorohaṇānuyogam anuyutto viharāmī" ti.|| ||

12. [Bhagavā:]|| ||

"Dhammo rahado brāhmaṇa sīlatittho||
Anāvilo sabbhi sataɱ pasattho,||
Yattha have vedaguno sinātā||
Anallagattā'va taranti pāran" ti.|| ||

13. Evaɱ vutte saŋgāravo brāhmaṇo Bhagavantaɱ etad avoca:

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto 'rūpāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 

§

[184]

Sutta 22

Khomadussa Suttaɱ

[22.1][pts] Evaɱ me sutaɱ:|| ||

Ekaɱ samayaɱ Bhagavā Sakkesu viharati Khomadussaɱ nāma Sakkānaɱ nigamo.|| ||

2. Atha kho Bhagavā pubbaṇha-samayaɱ nivāsetvā patta-cīvaram ādāya Khomadussaɱ nigamaɱ piṇḍāya pāvisi.|| ||

3. Tena kho pana samayena Khomadussakā brāhmaṇa-gahapatikā sabhāyaɱ santipatitā honti kenaci-d-eva karaṇīyena.|| ||

Devo ca ekam ekaɱ phusāyati.|| ||

4. Atha kho Bhagavā yena sā sabhā ten'upasankami.|| ||

5. Addasaɱsu kho Khomadussakā brāhmaṇa-gahapatikā Bhagavantaɱ dūrato va āga-c-chantaɱ.|| ||

6. Disvā etad avocuɱ:|| ||

"Ke ca muṇḍakā samaṇakā ke ca sabhādhammaɱ jānissantī" ti?|| ||

7. Atha kho Bhagavā Khomadussake brāhmaṇa-gahapatike gāthāya ajjhabhāsi|| ||

"N'esā sabhā yattha na santi santo||
santo na te ye na vadanti dhammaɱ,||
Rāgañ ca dosañ ca pahāya mohaɱ||
dhammaɱ vadantā va bhavanti santo" ti.|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya paṭi-c-channaɱ vā vivareyya mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rūpāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 


Contact:
E-mail
Copyright Statement