Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
II. Nidāna Vagga
16. Kassapa Saɱyutta

Sutta 2

An-ottāpi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[195]

[1][pts][bodh][than] Evaɱ me sutaɱ:|| ||

Ekaɱ samayaɱ āyasmā ca Mahā Kassapo āyasmā ca Sāriputto Bārāṇasiyaɱ viharanti Isipatane Migadāye.|| ||

2. Atha kho āyasmā Sāriputto sāyaṇha-samayaɱ paṭisallāṇā vuṭṭhito yen'āyasmā Mahā Kassapo ten'upasaŋkami.|| ||

Upasaŋkamitvā āyasmantā Mahā Kassapena saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

3. Eka-m-antaɱ nisinno kho āyasmā Sāriputto āyasmantaɱ Mahā Kassapaɱ etad avoca:|| ||

4. "Vuccati h'idaɱ āvuso Kassapa,||
'Anātāpī
an-ottāpī||
abhabbo sambodhāya,||
abhabbo nibbānāya,||
abhabbo anuttarassa yoga-k-khemassa adhigamāya.|| ||

Ātāpī ca kho [196]
ottāpī||
bhabbo sambodhāya||
bhabbo nibbānāya||
bhabbo anuttarassa yoga-k-khemassa adhigamāyā' ti.|| ||

5. Kittāvatā nu kho āvuso,||
anātāpī hoti an-ottāpī||
abhabbo sambodhāya||
abhabbo nibbānāya||
abhabbo anuttarassa yoga-k-khemassa adhigamāya?|| ||

Kittāvatā ca pan'āvuso,||
ātāpī hoti ottāpī||
bhabbo sambodhāya,||
bhabbo nibbānāya,||
bhabbo anuttarassa yoga-k-khemassa adhigamāyā" ti?|| ||

"Idh'āvuso, bhikkhu:|| ||

6. 'Anuppannā me pāpakā akusalā dhammā uppajjamānā anatthāya saŋvatteyyunti||
na ātappaɱ karoti.|| ||

Uppannā me pāpakā akusalā dhammā appahīyamānā anatthāya saŋvatteyyunti||
na ātappaɱ karoti.|| ||

Anuppannā me kusalā dhammā nūppajjamānā anatthāya saŋvatteyyunti||
na ātappaɱ karoti.|| ||

Uppannā me kusalā dhammā nirujjhamānā anatthāya saŋvatteyyunti||
na ātappaɱ karoti.'|| ||

Evaɱ kho āvuso, anātāpī hoti.|| ||

7. Kathañ c'āvuso, an-ottāpī hoti?|| ||

Idh'āvuso, bhikkhu:|| ||

'Anuppannā me pāpakā akusalā dhammā uppajjamānā anatthāya saŋvatteyyunti||
na ottapati.|| ||

'Uppannā me pāpakā akusalā dhammā appahīyamānā anatthāya saŋvatteyyunti||
na ottapati.|| ||

'Anuppannā me kusalā dhammā nūppajjamānā anatthāya saŋvetteyyunti||
na ottapati.|| ||

'Uppannā me kusalā dhammā nirujjhamānā anatthāya saŋvatteyyunti||
na ottapati.'|| ||

[197] Evaɱ kho āvuso an-ottāpī hoti.|| ||

8. Evaɱ kho āvuso,
anātāpī
an-ottāpī||
abhabbo sambodhāya,||
abhabbo nibbānāya,||
abhabbo anuttarassa yoga-k-khemassa adhigamāya.|| ||

9. Katañ c'āvuso, ātāpī hoti?|| ||

Idh'āvuso, bhikkhu:|| ||

'Anuppannā me pāpakā akusalā dhammā uppajjamānā anatthāya saŋvatteyyunti,||
ātappaɱ karoti.|| ||

Uppannā me pāpakā akusalā dhammā appahīyamānā anatthāya saŋvatteyyunti,||
ātappaɱ karoti.|| ||

Anuppannā me kusalā dhammā nūppajjamānā anatthāya saŋvatteyyunti,||
ātappaɱ karoti.|| ||

Uppannā me kusalā dhammā nirujjhamānā anatthāya saŋvatteyyunti,||
ātappaɱ karoti'.|| ||

Evaɱ kho āvuso, ātāpī hoti.|| ||

Kathañ c'āvuso, ottāpī hoti?|| ||

Idh'āvuso, bhikkhu:|| ||

'Anuppannā me pāpakā akusalā dhammā uppajjamānā anatthāya saŋvatteyyunti,||
ottapati.|| ||

Uppannā me pāpakā akusalā dhammā appahīyamānā anatthāya saŋvatteyyunti,||
ottapati.|| ||

Anuppannā me kusalā dhammā nūppajjamānā anatthāya saŋvetteyyunti,||
ottapati.|| ||

Uppannā me kusalā dhammā nirujjhamānā anatthāya saŋvatteyyunti,||
ottapati.|| ||

Evaɱ kho āvuso ottāpī hoti.|| ||

Evaɱ kho āvuso,
ātāpī
ottāpī,||
bhabbo sambodhāya,||
bhabbo nibbānāya,||
bhabbo anuttarassa yoga-k-khemassa adhigamayā" ti.|| ||


Contact:
E-mail
Copyright Statement