Aṇguttara Nikāya
X. Dasaka-Nipāta
IV. Upāli Vagga
Sutta 31
Upāli Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho āyasmā Upāli yena Bhagavā ten'upasaṇkami.|| ||
Upasaṃkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho āyasmā Upāli Bhagavantaṃ etad avoca:|| ||
2. "Kati nukho bhante attha-vase paṭicca Tathāgatena sāvakānaṃ sikkhāpadaṃ paññattaṃ?|| ||
Pātimokkhaṃ uddiṭṭhan" ti?|| ||
"Dasa kho Upāli attha-vase paṭicca Tathāgatena sāvakānaṃ sikkhāpadaṃ paññattaṃ Pātimokkhaṃ uddiṭṭhaṃ.|| ||
Katame dasa?|| ||
3. Saṇgha-suṭṭhutāya,||
Saṇgha-phāsutāya,||
du-m-maṇkunaṃ puggalānaṃ niggahāya,||
pesalānaṃ bhikkhunaṃ phāsu vihārāya,||
diṭṭha-dhammikānaṃ āsavānaṃ saṃvarāya,||
samparāyikānaṃ āsavānaṃ paṭighātāya,||
appa-sannānaṃ pasādāya,||
pasannānaṃ bhiyyo bhāvāya,||
Sad'Dhammaṭṭhitiyā,||
vinayānuggahāya.|| ||
Ime kho Upāli dasa attha-vase paṭicca Tathāgatena sāvakānaṃ sikkhāpadaṃ paññattaṃ,||
Pātimokkhaṃ uddiṭṭhan" ti.|| ||
§
[bodh] 4. "Kati nu kho bhante Pātimokkha-ṭ-ṭhapanānī" ti?[ed1]|| ||
"Dasa kho Upāli Pātimokkha-ṭ-ṭhapanā.|| ||
Katame dasa?|| ||
5. Pārājiko tassaṃ parisāyaṃ nisinno hoti,||
pārājika-kathā vippakatā hoti,||
anupasampanno tassaṃ parisāyaṃ||
[71] nisinno hoti,||
anupasampanna-kathā vippakatā hoti,||
sikkhaṃ pacca-k-khātako tassaṃ parisāyaṃ nisinno hoti,||
sikkhaṃ pacca-k-khāta-kathā vippakatā hoti,||
paṇḍako tassaṃ parisāyaṃ nisinno hoti,||
paṇḍaka-kathā vippakatā hoti,||
bhikkhunī-dūsako tassaṃ parisāyaṃ nisinno hoti,||
bhikkhunī-dūsaka-kathā vippakathā hoti.|| ||
Ime kho Upāli dasa Pātimokkha-ṭ-ṭhapanā" ti.|| ||
[ed1] BJT Pali and Bhk. Bodhi have this as a separate sutta.
