Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
IV. Deva-Dūta Vagga

Sutta 40

Ādhipateyya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[147]

[1][pts][than][bodh] Evaɱ me sutaɱ.|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Tīṇ'imāni bhikkhave ādhipateyyāni.|| ||

Katamāni tīṇi?|| ||

Att'ādhipateyyaɱ,||
lok'ādhipateyyaɱ,||
dhamm'ādhipateyyaɱ.|| ||

 

§

 

Katamaɱ ca bhikkhave attādhipateyyaɱ?|| ||

Idha bhikkhave bhikkhu araññagato vā rukkha-mūla-gato vā suññā-gāra-gato vā iti paṭisañcikkhati:|| ||

'Na kho pan'āhaɱ cīvara-hetu agārasmā anagāriyaɱ pabba-jito,||
na piṇḍa-pāta-hetu agārasmā anagāriyaɱ pabba-jito,||
na sen'āsana-hetu agārasmā anagāriyaɱ pabba-jito,||
na iti-bhavā-bhava-hetu agārasmā anagāriyaɱ pabba-jito.|| ||

"Api ca kho'mhi otiṇṇo jātiyā jarāya maraṇena sokehi paridevehi dukkhehi domanassehi upāyāsehi,||
dukkh'otiṇṇo dukkha-pareto,||
app'eva nāma imassa kevalassa dukkha-k-khandhassa antakiriyā paññāyethā" ti.|| ||

Ahañ c'eva kho pana [148] yādisake vā kāme ohāya agārasmā anagāriyaɱ pabba-jito,||
tādisake vā kāme pariyeseyyaɱ,||
tato vā pāpiṭṭhatare,||
na me taɱ assa paṭirūpan' ti.|| ||

So iti paṭisañcikkhati:|| ||

'Āraddhaɱ kho pana me viriyaɱ bhavissati asallīnaɱ,||
upaṭṭhitā sati asammuṭṭhā,||
passaddho kāyo asāraddho,||
samāhitaɱ cittaɱ ek'aggan' ti.|| ||

So attānaɱ yeva adhipateyyaɱ karitvā akusalaɱ pajahati,||
kusalaɱ bhāveti,||
sāvajjaɱ pajahati,||
anavajjaɱ bhāveti,||
suddhaɱ attānaɱ pariharati.|| ||

Idaɱ vuccati bhikkhave 'attādhipateyyaɱ'.|| ||

 

§

 

2. Katamañ ca bhikkhave lokādhipateyyaɱ?|| ||

Idha bhikkhave bhikakhu araññagato vā rukkha-mūla-gato vā suññā-gāra-gato vā iti paṭisañcikkhati:|| ||

'Na kho pan'āhaɱ cīvara-hetu agārasmā anagāriyaɱ pabba-jito,||
na piṇḍa-pāta-hetu agārasmā anagāriyaɱ pabba-jito,||
na sen'āsana-hetu agārasmā anagāriyaɱ pabba-jito,||
na iti-bhavā-bhava-hetu agārasmā anagāriyaɱ pabba-jito.|| ||

"Api ca kho'mhi otiṇṇo jātiyā jarāya maraṇena sokehi paridevehi dukkhehi domanassehi upāyāsehi,||
dukkh'otiṇṇo dukkha-pareto,||
app'eva nāma imassa kevalassa dukkha-k-khandhassa antakiriyā paññāyethā" ti.|| ||

Ahañ c'eva kho pana evaɱ pabba-jito||
samāno kāma-vitakkaɱ vā vitakkeyyaɱ,||
vyāpāda-vitakkaɱ vā vitakkeyyaɱ,||
vihiɱsā-vitakkaɱ vā vitakkeyyaɱ —||
mahā kho panāyaɱ loka-sannivāso —||
mahantasmiɱ kho pana loka-sannivāse santi samaṇa-brāhmaṇā iddhi-manto||
dibba-cakkhukā para-citta-viduno.|| ||

Te dūrato pi passanti,||
āsannā pi na disasanti,||
cetasā pi cittaɱ pajānanti.|| ||

Te pi maɱ evaɱ jāneyyuɱ:|| ||

"Passatha bho imaɱ kula-puttaɱ,||
saddhā agārasmā anagāriyaɱ pabba-jito samāno vokiṇṇo viharati pāpakehi akusalehi dhammehī" ti.|| ||

Devatā pi kho santi iddhi-mantiniyo dubba-cakkhukā para-citta-viduniyo.|| ||

Tā dūrato pi passanti,||
āsannā pi na dissanti,||
cetasā pi cittaɱ pajānanti.|| ||

Tā pi maɱ evaɱ jāneyyuɱ:|| ||

"Passatha bho imaɱ kula-puttaɱ,||
saddhā agārasmā anagāriyaɱ pabba-jito samāno vokiṇṇo viharati pāpakehi akusalehi dhammehī" ti.|| ||

So iti paṭisañcikkhati:|| ||

'Āraddhaɱ kho pana me viriyaɱ [149] bhavissati asallīnaɱ,||
upaṭṭhitā sati asammuṭṭhā,||
passaddho kāyo asāraddho,||
samāhitaɱ cittaɱ ek'aggan' ti.|| ||

So lokaɱ yeva adhipatiɱ karitvā akusalaɱ pajahati,||
kusalaɱ bhāveti,||
sāvajjaɱ pajahati,||
anavajjaɱ bhāveti,||
suddhaɱ attānaɱ pariharati.|| ||

Idaɱ vuccati bhikkhave 'lok'ādhipateyyaɱ'.

 

§

 

Katamañ ca bhikkhave dhammādhipateyyaɱ?|| ||

Idha bhikkhave bhikakhu araññagato vā rukkha-mūla-gato vā suññā-gāra-gato vā iti paṭisañcikkhati:|| ||

'Na kho pan'āhaɱ cīvara-hetu agārasmā anagāriyaɱ pabba-jito,||
na piṇḍa-pāta-hetu agārasmā anagāriyaɱ pabba-jito,||
na sen'āsana-hetu agārasmā anagāriyaɱ pabba-jito,||
na iti-bhavā-bhava-hetu agārasmā anagāriyaɱ pabba-jito.|| ||

"Api ca kho'mhi otiṇṇo jātiyā jarāya maraṇena sokehi paridevehi dukkhehi domanassehi upāyāsehi,||
dukkh'otiṇṇo dukkha-pareto,||
app'eva nāma imassa kevalassa dukkha-k-khandhassa antakiriyā paññāyethā" ti.|| ||

Svākkhāto Bhagavatā dhammo sandiṭṭhiko akāliko ehi passiko opanayiko paccattaɱ veditabbo viññūhī' ti.|| ||

Santi kho pana me sabrahma-cārī jānaɱ passaɱ viharanti.|| ||

Ahañ c'eva kho pana evaɱ svākkhāte Dhamma-Vinaye pabba-jito samāno kusito vihareyyaɱ pamatto,||
na me taɱ assa paṭirūpan' ti.|| ||

So iti paṭisañcikkhati:|| ||

'Āraddhaɱ kho pana me viriyaɱ bhavissati asallīnaɱ,||
upaṭṭhitā sati asammuṭṭhā,||
passaddho kāyo asāraddho,||
samāhitaɱ cittaɱ ek'aggan' ti.|| ||

So dhammaɱ yeva adhipatiɱ karitvā akusalaɱ pajahati,||
kusalaɱ bhāveti,||
sāvajjaɱ pajahati,||
anavajjaɱ bhāveti,||
suddhaɱ attānaɱ pariharati.|| ||

Idaɱ vuccati bhikkhave 'dhamm'ādhipateyyaɱ'.|| ||

Imāni kho bhikkhave tīṇi ādhipateyyānī" ti.|| ||

 


 

N'atthi loke raho nāma pāpa-kammaɱ pakubbato.||
Attā te purisa jānāti saccaɱ vā yadi vā musā.||
Kalyāṇaɱ vata bho sakkhi attānaɱ atimaññasi.||
Yo santaɱ attani pāpaɱ attānaɱ parigūhasi.||
[150] Passanti devā ca Tathāgatā ca lokasmiɱ bālaɱ visamaɱ carantaɱ.||
Tasmā hi attā-dhipako sato care lokā-dhipo ca nipako ca jhāyī.||
Dhammā-dhipo ca anuDhamma-cārī na hīyati saccaparakkamo muni.||
Pasayha Māraɱ Abhibhuyya antakaɱ yo ca phūsī jātikhayaɱ padhānavā,||
Sa tādiso loka-vidū sumedho sabbesu dhammesu atammayo munī ti.|| ||

Devadūta Vaggo Catuttho.|| ||

 


Contact:
E-mail
Copyright Statement