Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
4. Catukka Nipāta
III. Uruvelā Vagga

Sutta 21

Paṭhama Uruvela Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[20]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvaṭṭhiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

2. Ekam idāhaɱ bhikkhave samayaɱ Uruvelāyaɱ viharāmi najjā Nerañjarāya tīre Ajapāla-nigrodhe paṭhamābhisambuddho.|| ||

Tassa mayhaɱ bhikkhave raho-gatassa patisallīnassa evaɱ cetaso parivitakko udapādi:|| ||

Dukkhaɱ kho agāravo viharati appatisso.|| ||

Kin nu kho ahaɱ samaṇaɱ vā brāhmaṇaɱ vā sakkatvā garukatvā upanissāya vihareyyan ti?|| ||

Tassa mayhaɱ bhikkhave etad ahosi:|| ||

Aparipūrassa kho ahaɱ sīla-k-khandhassa pāripūriyā aññaɱ samaṇaɱ vā brāhmaṇaɱ vā sakkatvā garukatvā upanissāya vihareyyaɱ,||
na kho pan'āhaɱ passāmi sa-devake loke sa-mārake sa-brahmake sa-s-samaṇa-brāhmaṇiyā pajāya sadeva-manussāya aññaɱ samaṇaɱ vā brāhmaṇaɱ vā attanā sīla-sampannataraɱ yam ahaɱ sakkatvā garukatvā upanissāya vihareyyaɱ.|| ||

Aparipūrassa kho ahaɱ samādhi-k-khandhassa pāripūriyā aññaɱ samaṇaɱ vā brāhmaṇaɱ vā sakkatvā garukatvā upanissāya vihareyyaɱ,||
na kho pan'āhaɱ passāmi sa-devake loke sa-mārake sa-brahmake sa-s-samaṇa-brāhmaṇiyā pajāya sadeva-manussāya aññaɱ samaṇaɱ vā brāhmaṇaɱ vā attanā samādhi sampannataraɱ yam ahaɱ sakkatvā garukatvā upanissāya vihareyyaɱ.|| ||

Aparipūrassa kho ahaɱ paññā-k-khandhassa pāripūriyā aññaɱ samaṇaɱ vā brāhmaṇaɱ vā sakkatvā garukatvā upanissāya vihareyyaɱ,||
na kho pan'āhaɱ passāmi sa-devake loke sa-mārake sa-brahmake sa-s-samaṇa-brāhmaṇiyā pajāya sadeva-manussāya aññaɱ samaṇaɱ vā brāhmaṇaɱ vā attanā paññā-sampannataraɱ yam ahaɱ sakkatvā garukatvā upanissāya vihareyyaɱ.|| ||

Aparipūrassa kho ahaɱ vimutti-k-khandhassa pāripūriyā aññaɱ samaṇaɱ vā brāhmaṇaɱ vā sakkatvā garukatvā upanissāya vihareyyaɱ,||
na kho pan'āhaɱ passāmi sa-devake loke sa-mārake sa-brahmake sa-s-samaṇa-brāhmaṇiyā pajāya sadeva-manussāya aññaɱ samaṇaɱ vā brāhmaṇaɱ vā attanā vimutti-sampannataraɱ yam ahaɱ sakkatvā garukatvā upanissāya vihareyyan ti.|| ||

Tassa mayhaɱ bhikkhave etad ahosi:|| ||

Yan nūnāhaɱ yo pāyaɱ dhammo mayā abhisambuddho tam eva dhammaɱ sakkatvā garukatvā upanissāya vihareyyan ti?|| ||

3. Atha kho bhikkhave Brahmā Sahampati mama cetasā [21] ceto-parivitakkaɱ ñāya,||
seyyathā pi nāma balavā puriso samamiñjitaɱ vā bāhaɱ pasāreyya,||
pasāritaɱ vā bāhaɱ sammiñjeyya,||
evam evaɱ Brahmaloke antara-hito mama purato pātu-r-ahosi.|| ||

Atha kho bhikkhave Brahmā Sahampati ekaɱsaɱ uttarā-saŋgaɱ karitvā dakkhiṇaɱ jāṇumaṇḍalaɱ puthuviyaɱ nihanatvā yen'āhaɱ ten'añjaliɱ panāmetvā maɱ etad avova:|| ||

"Evam etaɱ Bhagavā||
evam etaɱ Sugata,||
ye pi te bhante ahesuɱ atītam addhānaɱ arahanto Sammā-Sambuddhā||
te pi bhavanto dhammaɱ yeva sakkatvā garukatvā upanissāya vihariɱsu.|| ||

Ye pi te bhante bhavisasanti anāgatam addhānaɱ arahanto Sammā-Sambuddhā,||
te pi bhavanto dhammaɱ yeva sakkatvā garukatvā upanissāya viharanti.|| ||

Bhagavā pi bhante etarahi arahaɱ Sammā-SamBuddho dhammaɱ yeva sakkatvā garukatvā upanissāya viharatūti.|| ||

Idam avoca Brahmā Sahampati.|| ||

Idaɱ vatvā athāparaɱ etad avoca:|| ||

 

Ye c'abbhatītā sambuddhā ye ca buddhā anāgatā,||
Yo c'etarahi sambuddho bahunnaɱ sokanāsano.|| ||

Sabbe Sad'Dhamma-garuno vihaɱsu viharanti ca,||
Atho pi vihari-s-santi esā Buddhāna dhammatā.|| ||

Tasmā hi attha-kāmena mahantam abhikaŋkhatā,||
Sad'Dhammo garukātabbo saraɱ Buddhāna sāsanan ti.|| ||

 

Idam avoca bhikkhave Brahmā Sahampati.|| ||

Idaɱ vatvā maɱ abhivādetvā padakkhiṇaɱ katvā tatth'eva antara-dhāyī.|| ||

Atha khvāhaɱ bhikkhave Brahɱuno ca ajjhesanaɱ viditvā attano ca paṭirūpaɱ,||
yo pāyaɱ dhammo mayā abhisambuddho tam eva dhammaɱ sakkatvā garukatvā upanissāya vihāsiɱ.|| ||

Yato ca kho bhikkhave saŋgho pi mahattena samannāgato atha me saŋghe pi tibba gāravo ti.|| ||

 


Contact:
E-mail
Copyright Statement