Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Catukka Nipāta
X: Asura Vagga

Sutta 95

Chavālāta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[95]

[1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattāro'me bhikkhave puggalā santo saŋvijj'amānā lokasmiɱ.|| ||

Katame cattāro?|| ||

N'evattahitāya paṭipanno no parahitāya.|| ||

Parahitāya paṭipanno no attahitāya.|| ||

Attahitāya paṭipanno no parahitāya.|| ||

Attahitāya ca paṭipanno parahitāya ca.|| ||

Seyyathā pi, bhikkhave, chavālātaɱ ubhato padittaɱ majjhe gūthagataɱ n'eva gāme kaṭṭhatthaɱ pharati na araññe.|| ||

Tath'ūpamāhaɱ bhikkhave imaɱ puggalaɱ vadāmi yvāyaɱ puggalo n'evattahitāya paṭipanno no parahitāya.|| ||

Tatra, bhikkhave, yvāyaɱ puggalo parahitāya paṭipanno no attahitāya,||
ayaɱ imesaɱ dvinnaɱ puggalānaɱ abhikkantaro ca paṇītataro ca.|| ||

Tatra, bhikkhave, yvāyaɱ puggalo attahitāya paṭipanno no parahitāya,||
ayaɱ imesaɱ tiṇṇaɱ puggalānaɱ abhikkantataro ca paṇītataro ca.|| ||

Tatra, bhikkhave, yvāyaɱ puggalo attahitāya ca paṭipanno parahitāya ca,||
ayaɱ imesaɱ catunnaɱ puggalānaɱ aggo ca seṭṭho ca pāmokkho ca uttamo ca pavaro ca.|| ||

Seyyathā pi, bhikkhave, gavā khīraɱ,||
khīramhā dadhi,||
dadhimhā navanītaɱ,||
navanītamhā sappi,||
sappimhā sappi-maṇḍo,||
sappi-maṇḍo tattha aggam akkhāyati,||
evam eva kho, bhikkhave, yvāyaɱ puggalo attahitāya ca paṭipanno parahitāya ca,||
ayaɱ imesaɱ catunnaɱ puggalānaɱ aggo ca seṭṭho ca pāmokkho ca uttamo ca pavaro ca.|| ||

[96] Ime kho bhikkhave cattāro puggalā santo saŋvijj'amānā lokasmin ti.|| ||

 


Copyright Statement