Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāto
III. Puggala Vagga

Sutta 27

Jigucchitabba Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[126]

[1][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati,||
Jetavane Anāthapiṇḍikassa ārāme.|| ||

Tayo'me bhikkhave puggalā santo saŋvijj'amānā lokasmiɱ.|| ||

Katame tayo?|| ||

Atthi bhikkhave puggalo jigucchitabbo,||
na sevitabbo,||
na bhajitabbo,||
na payirupāsitabbo.|| ||

Atthi bhikkhave puggalo ajjh'upekkhitabbo,||
na sevitabbo,||
na bhajitabbo,||
na payirupāsitabbo.|| ||

Atthi bhikkhave puggalo sevitabbo,||
bhajitabbo,||
payirupāsitabbo.|| ||

Katamo ca bhikkhave puggalo jigucchitabbo,||
na sevitabbo,||
na bhajitabbo,||
na payirupāsitabbo?|| ||

Idha bhikkhave ekacco puggalo dussīlo hoti pāpa-dhammo asuci saɱkassarasamā-cāro paṭichannakammanto assamaṇo samaṇa-paṭiñño abrahma-cārī brahma-cārīpaṭiñño antopūti avassuto kasambu-jāto.|| ||

Eva-rūpo bhikkhave puggalo jigucchitabbo, na sevitabbo,||
na bhajitabbo,||
na payirupāsitabbo.|| ||

Taɱ kissa hetu?|| ||

Kiñ cāpi bhikkhave eva-rūpassa puggalassa na diṭṭh'ānugatiɱ āpajjati,||
atha kho naɱ pāpako kitti-saddo abbhu-g-gacchati pāpa-mitto purisa-puggalo pāpa-sahāyo pāpa-sampavaŋko ti.|| ||

Seyyathā pi, bhikkhave, ahi guthagato,||
kiñ cāpi na daɱsati,||
atha kho naɱ makkheti.|| ||

Evam eva kho bhikkhave kiñ cāpi eva-rūpassa puggalassa na diṭṭh'ānugatiɱ āpajjati,||
atha kho naɱ pāpako kitti-saddo abbhu-g-gacchati pāpa-mitto purisa-puggalo pāpa-sahāyo pāpa-sampavaŋko ti.|| ||

Tasmā eva-rūpo puggalo jigucchitabbo,||
na sevitabbo,||
na bhajitabbo,||
na payirupāsitabbo.|| ||

Katamo ca bhikkhave puggalo ajjh'upekkhitabbo,||
na sevitabbo,||
na bhajitabbo,||
na payirupāsitabbo?|| ||

Idha bhikkhave ekacco puggalo kodhano hoti||
upāyāsa- [127] bahulo,||
appam pi vutto samāno abhisajjati,||
kuppati,||
vyāpajjati,||
patitthīyati,||
kopañ ca dosañ ca appaccayañ ca pātu-karoti.|| ||

Seyyathā pi bhikkhave duṭṭhāruko kaṭṭhena vā kaṭhalena vā kaṭhalāya vā ghaṭṭito bhīyosomattāya āsavaɱ deti.|| ||

Evam eva kho bhikkhave idh'ekacco puggalo kodhano hoti,||
upāyāsabahulo,||
appam pi vutto samāno abhisajjati,||
kuppati,||
vyāpajjati,||
patitthīyati,||
kopañ ca dosañ ca appaccayañ ca pātu-karoti.|| ||

Seyyathā pi bhikkhave tindukālātaɱ kaṭṭhena vā kaṭhalāya vā ghaṭṭitaɱ bhīyosomattāya cicciṭāyati, ciṭiciṭāyati.|| ||

Evam eva kho bhikkhave idh'ekacco puggalo kodhano hoti,||
upāyāsabahulo,||
appam pi vutto samāno abhisajjati,||
kuppati,||
vyāpajjati,||
patitthīyati,||
kopañ ca dosañ ca appaccayañ ca pātu-karoti.|| ||

Seyyathā pi bhikkhave gūtha-kūpo kaṭṭhena vā kaṭhalāya vā ghaṭṭito bhīyosomattāya duggandho hoti.|| ||

Evam eva kho bhikkhave idh'ekacco puggalo kodhano hoti,||
upāyāsabahulo,||
appam pi vutto samāno abhisajjati,||
kuppati,||
vyāpajjati,||
patitthiyati,||
kopañ ca dosañ ca apaccayañ ca pātu-karoti.|| ||

Eva-rūpo bhikkhave puggalo ajjh'upekkhitabbo,||
na sevitabebā,||
na bhajitabbo,||
na payirupāsitabbo.|| ||

Taɱ kissa hetu?|| ||

Akkoseyyā pi maɱ,||
paribhāseyyā pi maɱ,||
anattham pi maɱ kareyyā ti.|| ||

Tasmā eva-rūpo puggalo ajjh'upekkhitabbo,||
na sevitabbo,||
na bhajitabbo,||
na payirupāsitabbo.|| ||

Katamo ca bhikkhave puggalo sevitabbo,||
bhajitabbo,||
payirupāsitabbo?|| ||

Idha bhikkhave ekacco puggalo sīlavā hoti kalyāṇa-dhammo.|| ||

Eva-rūpo bhikkhave puggalo sevitabbo,||
bhajitabbo,||
payirupāsitabbo.|| ||

Taɱ kissa hetu?|| ||

Kiñcā pi bhikkhave eva-rūpassa puggalassa na diṭṭh'ānugatiɱ āpajjati.|| ||

Atha kho naɱ kalyāṇo kitti-saddo abbhu-g-gacchati:|| ||

"Kalyāṇa-mitto purisa-puggalo,||
kalyāṇa-sahāyo,||
kalyāṇa-sampavaŋko" ti.|| ||

Tasmā eva-rūpo puggalo sevitabbo,||
bhajitabbo,||
payirupāsitabbo.|| ||

Ime kho bhikkhave tayo puggalā santo saŋvijj'amānā lokasmin ti.|| ||

 


Copyright Statement