Dīgha Nikāya


[Home]  [Sutta Indexes]  [Glossology]  [Site Sub-Sections]


 

Dīgha Nikāya

Sutta 33

Saŋgīti Suttantaɱ

Adapted from the digital version of the Sri Lanka Buddha Jayanti Tripitaka Series

 


 

Atthi kho āvuso tena Bhagavatā jānatā passatā arahatā Sammā-Sam-Buddhena aṭṭhadhammā sammad-akkhātā. Tattha sabbeh'eva saŋgāyitabbaɱ na vivaditabbaɱ, yatha-yidaɱ Brahma-cariyaɱ addhaniyaɱ assa cira-ṭṭhitikaɱ, tad assa bahu-jana-hitāya bahu-jana-sukhāya lokānukampāya atthāya hitāya sukhāya deva-manussānaɱ.

Katame aṭṭha?

[8.01][pts][bodh][olds] Aṭṭha micchattā:
Micchā-diṭṭhi, micchā-saɱkappo, miccā-vācā, micchā-kammanto, micchā-ājīvo, micchā-vāyāmo, micchā-sati, micchā-samādhi.

[255][8.02][pts][bodh][olds] Aṭṭha sammattā:
Sammā-diṭṭhi, sammā-saɱkappo, sammā-vācā, sammā-kammanto, sammā-ājīvo, sammā-vāyāmo, sammā-sati, sammā-samādhi.

[8.03][pts][bodh][olds] Aṭṭha puggalā dakkhiṇeyyā:
Sot'āpanno, sot'āpatti-phala-sacchi-kiriyāya paṭi-panno, sakad-āgāmī, Sakad-āgāmi-phala-sacchi-kiriyāya paṭi-panno, Anāgāmī, Anāgāmi-phala-sacchi-kiriyāya paṭi-panno, arahā, Arahatta-phala-sacchi-kiriyāya paṭi-panno.

[8.04][pts][bodh][olds] Aṭṭha kusīta-vatthūni:
Idh'āvuso bhikkhunā kammaɱ kātabbaɱ hoti. Tassa evaɱ hoti: 'Kammaɱ kho me kātabbaɱ bhavissati, kammaɱ kho pana me karontassa kāyo kilamissati, handāhaɱ nipajjāmī' ti. So nipajjati, na viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ paṭhamaɱ kusīta-vatthu.
Puna ca paraɱ āvuso bhikkhunā kammaɱ kataɱ hoti. Tassa evaɱ hoti: 'Ahaɱ kho kammaɱ akāsiɱ, kammaɱ kho pana me karontassa kāyo kilanto, hadāhaɱ nipajjāmī' ti. So nipajjati, na viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ dutiyaɱ kusīta-vatthu.
Puna ca paraɱ āvuso bhikkhunā Maggo gantabbo hoti. Tassa evaɱ hoti: 'Maggo kho me gantabbo bhavissati, Maggaɱ kho pana me gacchantassa kāyo kilamissati, handāhaɱ nipajjāmī' ti. So nipajjati, na viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ tatiyaɱ kusita-vatthu.
Puna ca paraɱ āvuso bhikkhunā Maggo gato hoti. Tassa evaɱ hoti: 'Ahaɱ kho Maggaɱ agamāsiɱ, Maggaɱ kho pana me gacchantassa kāyo kilanto, handāhaɱ nipajjāmī' ti. So nipajjati, na viriyaɱ ārabhati appattassa pattiyā anadhi-gatassa adhigamāya asacchitakassa sacchi-kiriyāya. Idaɱ catutthaɱ kusīta-vatthu.
Puna ca paraɱ āvuso bhikkhu gāmaɱ vā nigamaɱ vā piṇḍāya caranto na labhati lūkhassa vā paṇītassa vā bhojanassa yāva-datthaɱ pāripūriɱ. Tassa evaɱ hoti: 'Ahaɱ kho gāmaɱ vā nigamaɱ vā [256] piṇḍāya caranto nālatthaɱ lūkhassa vā paṇītassa vā bhojanassa yāva-datthaɱ pāripūriɱ, tassa me kāyo kilanto akammañño, handāhaɱ nipajjāmī' ti. So nipajjati, na viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ pañcamaɱ kusīta-vatthu.
Puna ca paraɱ āvuso bhikkhu gāmaɱ vā nigamaɱ vā piṇḍāya caranto na labhati lūkhassa vā paṇītassa vā bhojanassa yāva-datthaɱ pāripūriɱ. Tassa evaɱ hoti: 'Ahaɱ kho gāmaɱ vā nigamaɱ vā piṇḍāya caranto alatthaɱ lūkhassa vā paṇītassa vā bhojanassa yāva-datthaɱ pāripūriɱ, tassa me kāyo garuko akammañño, māsācitaɱ maññe, handāhaɱ nipajjāmī' ti. So nipajjati, na viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ chaṭṭhaɱ kusīta-vatthu.
Puna ca paraɱ āvuso bhikkhuno uppanno hoti appamattako ābādho. Tassa evaɱ hoti: 'Uppanno kho me appamattako ābādho, atthi kappo nipajjituɱ, handāhaɱ nipajjāmī' ti. So nipajjati, na viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ sattamaɱ kusīta-vatthu.
Puna ca paraɱ, āvuso bhikkhu gilānā vuṭṭhito1 hoti, acira-vuṭṭhito gelaññā. Tassa evaɱ hoti: 'Ahaɱ kho gilānā vuṭṭhito acira-vuṭṭhito gelaññā, tassa me kāyo dubbalo akammañño, handāhaɱ nipajjāmī' ti. So nipajjati, na viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ aṭṭhamaɱ kusīta-vatthu.

[8.05][pts][bodh][olds] Aṭṭha ārambha-vatthūni:
Idh'āvuso bhikkhunā kammaɱ kātabbaɱ hoti. Tassa evaɱ hotī; 'Kammaɱ kho me kātabbaɱ bhavissati, kammaɱ kho pana me karontena na sukaraɱ Buddhānaɱ sāsanaɱ mana-sikātuɱ. Handāhaɱ viriyaɱ ārabhāmi appattassa pattiyā anadhi-gatassa adhigamāya asacchi-katassa sacchi-kiriyāyā' ti. So viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ paṭhamaɱ ārambha-vatthu.
Puna ca paraɱ āvuso, bhikkhunā [257] kammaɱ kataɱ hoti. Tassa evaɱ hoti: 'Ahaɱ kho kammaɱ akāsiɱ, kammaɱ kho pan'āhaɱ karonto nāsakkhiɱ Buddhānaɱ sāsanaɱ mana-sikātuɱ. Handāhaɱ virayaɱ ārabhāmi appattassa pattiyā anadhi-gatassa adhigamāya asacchi-katassa sacchi-kiriyāyā' ti. So viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ dutiyaɱ ārambha-vatthu.
Puna ca paraɱ āvuso bhikkhunā Maggo gantabbo hoti. Tassa evaɱ hoti: 'Maggo kho me gantabbo bhavissati. Maggaɱ kho pana me gacchantena na sukaraɱ Buddhānaɱ sāsanaɱ mana-sikātuɱ. Handāhaɱ viriyaɱ ārabhāmi appattassa pattiyā anadhi-gatassa adhigamāya asacchi-katassa sacchi-kiriyāyā' ti. So viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ tatiyaɱ ārambha-vatthu.
Puna ca paraɱ āvuso bhikkhunā Maggo gato hoti. Tassa evaɱ hoti: 'Ahaɱ kho Maggaɱ agamāsiɱ. Maggaɱ kho pan'āhaɱ gacchanto nāsakkhiɱ Buddhānaɱ sāsanaɱ mana-sikātuɱ. Handāhaɱ viriyaɱ ārabhāmi appattassa pattiyā anadhi-gatassa adhigamāya asacchi-katassa sacchi-kiriyāyā' ti. So viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya, idaɱ catutthaɱ ārambha-vatthu.
Puna ca paraɱ āvuso bhikkhu gāmaɱ vā nigamaɱ vā piṇḍāya caranto na labhati lūkhassa vā paṇītassa vā bhojanassa yāva-datthaɱ pāripūriɱ. Tassa evaɱ hoti: 'Ahaɱ kho gāmaɱ vā nigamaɱ piṇḍāya caranto nālanthaɱ lūkhassa vā paṇītassa vā bhojanassa yāva-datthaɱ pāripūriɱ. Tassa me kāyo lahuko kammañño. Hadāhaɱ viriyaɱ ārabhāmi appattassa pattiyā anadhi-gatassa adhigamāya asacchi-katassa sacchi-kiriyāyā' ti. So viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ pañcamaɱ ārambha-vatthu.
Puna ca paraɱ āvuso bhikkhu gāmaɱ vā nigamaɱ vā piṇḍāya caranto labhati lūkhassa vā paṇītassa vā bhojanassa yāva-datthaɱ pāripūriɱ. Tassa evaɱ hoti: 'Ahaɱ kho gāmaɱ vā nigamaɱ vā piṇḍāya caranto alatthaɱ lūkhassa vā paṇītassa vā bhojanassa yāva-datthaɱ pāripūriɱ. Tassa me kāyo balavā kammañño. Handāhaɱ viriyaɱ ārabhāmi, appattassa pattiyā anadhi-gatassa adhigamāya asacchi-katassa sacchi-kiriyāyā' ti. So viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ chaṭṭhaɱ ārambha-vatthu.
Puna ca paraɱ āvuso bhikkhuno uppanno hoti appamattako ābādho tassa evaɱ hoti: 'Uppanno kho me ayaɱ appamattako. Ābādho ṭhānaɱ kho pan'etaɱ vijjati yaɱ me ābādho pavaḍḍheyya, handāhaɱ viriyaɱ ārabhāmi appattassa pattiyā anadhi-gatassa adhigamāya asacchi-katassa sacchi-kiriyāyā' ti. So viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. [258] Idaɱ sattamaɱ ārambha-vatthu.
Puna ca paraɱ āvuso bhikkhu gilānā vuṭṭhito hoti acira-vuṭṭhito gelaññā. Tassa evaɱ hoti: 'Ahaɱ kho gilānā vuṭṭhito1 acira-vuṭṭhito gelaññā. Ṭhānaɱ kho pan'etaɱ vijjati yaɱ me ābādho paccudāvatteyya, handāhaɱ viriyaɱ ārabhāmi appattassa pattiyā anadhi-gatassa adhigamāya asacchi-katassa sacchi-kiriyāyā' ti. So viriyaɱ ārabhati appattassa pattiyā anadhi-gatassa adhigamāya asacchi-katassa sacchi-kiriyāya. Idaɱ aṭṭhamaɱ ārambha-vatthu.

[8.06][pts][bodh][olds] Aṭṭha dāna-vatthūni:
Āsajja dānaɱ deti.
Bhayā dānaɱ deti.
'Adāsi me' ti dānaɱ deti.
'Dassati me' ti dānaɱ deti.
'Sāhu dānan' ti dānaɱ deti.
'Ahaɱ pacāmi, ime na pacanti, nārahāmi pacanto apacantānaɱ na dātu'n' ti dānaɱ deti.
'Imaɱ me dānaɱ dadato kalyāṇo kitti-saddo abbhuggacchatī' ti dānaɱ deti.
Cittālaŋkāra-cittaparikkhāratthaɱ dānaɱ deti.

[8.07][pts][bodh][olds] Aṭṭha dān'ūpapattiyo:
Idh'āvuso ekacco dānaɱ deti, Samaṇassa vā Brāhmaṇassa vā annaɱ pānaɱ vatthaɱ yānaɱ mālā-gadha-vilepanaɱ seyyāvasatha-padīpeyyaɱ. So yaɱ deti taɱ paccāsiɱsati. So passati khattiya-mahāsālaɱ vā brāhmaṇa-mahāsālaɱ vā gahapati-mahāsālaɱ vā pañcahi kāma-guṇehi samappitaɱ samaŋgībhūtaɱ paricāraya-mānaɱ. Tassa evaɱ hoti 'Aho vatāhaɱ kāyassa bhedā param maraṇā khattiya-mahā-sālānaɱ vā brāhmaṇa-mahā-sālānaɱ vā gahapati-mahā-sālānaɱ vā saha-vyataɱ upapa-j-jeyyan' ti. So taɱ cittaɱ dahati, taɱ cittaɱ adhiṭṭhāti, taɱ cittaɱ bhāveti. Tassa taɱ cittaɱ hīne vimuttaɱ uttariɱ abhāvitaɱ tatr'upapattiyā saɱ- [259] vattati. Tañ ca kho sīla-vato vadāmi no du-s-sīlassa. Ijjhat'āvuso sīla-vato ceto-paṇidhi suddhattā.
Puna ca paraɱ āvuso idh'ekacco dānaɱ deti Samaṇassa vā Brāhmaṇassa vā annaɱ pānaɱ vatthaɱ yānaɱ mālā-gadha-vilepanaɱ seyyāvasatha-padīpeyyaɱ. So yaɱ deti taɱ paccāsiɱsati. Tassa sutaɱ hoti 'Cātu-m-mahā-rājikā devā dīghā-yukā vaṇṇa-vanto sukha-bahulā' ti. Tassa evaɱ hoti 'Aho vatāhaɱ kāyassa bhedā param maranā Cātu-m-mahā-rājikānaɱ devānaɱ sahabyātaɱ upapa-j-jeyyan' ti. So taɱ cittaɱ dahati, taɱ cittaɱ adhiṭṭhāti, taɱ cittaɱ bhāveti. Tassa taɱ cittaɱ hīne vimuttaɱ uttariɱ abhāvitaɱ tatr'upapattiyā saŋvattati. Tañ ca kho sīla-vato vadāmi no du-s-sīlassa. Ijjhat'āvuso sīla-vato ceto-paṇidhi suddhattā.
Puna ca paraɱ āvuso idh'ekacco dānaɱ deti Samaṇassa vā Brāhmaṇassa vā annaɱ pānaɱ vatthaɱ yānaɱ mālā-gadha-vilepanaɱ seyyāvasatha-padīpeyyaɱ. So yaɱ deti taɱ paccāsiɱsati. Tassa sutaɱ hoti 'Tāvatiɱsā devā dīghā-yukā vaṇṇa-vanto sukha-bahulā' ti. Tassa evaɱ hoti 'Aho vatāhaɱ kāyassa bhedā param maranā Tāvatiɱsānaɱ devānaɱ sahabyātaɱ upapa-j-jeyyan' ti. So taɱ cittaɱ dahati, taɱ cittaɱ adhiṭṭhāti, taɱ cittaɱ bhāveti. Tassa taɱ cittaɱ hīne vimuttaɱ uttariɱ abhāvitaɱ tatr'upapattiyā saŋvattati. Tañ ca kho sīla-vato vadāmi no du-s-sīlassa. Ijjhat'āvuso sīla-vato ceto-paṇidhi suddhattā.
Puna ca paraɱ āvuso idh'ekacco dānaɱ deti Samaṇassa vā Brāhmaṇassa vā annaɱ pānaɱ vatthaɱ vānaɱ mālā-gadha-vilepanaɱ seyyāvasatha-padīpeyyaɱ. So yaɱ deti taɱ paccāsiɱsati. Tassa sutaɱ hoti 'Yāmā devā dīghā-yukā vaṇṇa-vanto sukha-bahulā' ti. Tassa evaɱ hoti 'Aho vatāhaɱ kāyassa bhedā param maranā Yāmānaɱ devānaɱ sahabyātaɱ upapa-j-jeyyan' ti. So taɱ cittaɱ dahati, taɱ cittaɱ adhiṭṭhāti, taɱ cittaɱ bhāveti. Tassa taɱ cittaɱ hīne vimuttaɱ uttariɱ abhāvitaɱ tatr'upapattiyā saŋvattati. Tañ ca kho sīla-vato vadāmi no du-s-sīlassa. Ijjhat'āvuso sīla-vato ceto-paṇidhi suddhattā.
Puna ca paraɱ āvuso idh'ekacco dānaɱ deti Samaṇassa vā Brāhmaṇassa vā annaɱ pānaɱ vatthaɱ yānaɱ mālā-gadha-vilepanaɱ seyyāvasatha-padīpeyyaɱ. So yaɱ deti taɱ paccāsiɱsati. Tassa sutaɱ hoti 'Tusitā devā dīghā-yukā vaṇṇa-vanto sukha-bahulā' ti. Tassa evaɱ hoti 'Aho vatāhaɱ kāyassa bhedā param maraṇā Tusitānaɱ devānaɱ sahabyātaɱ upapa-j-jeyyan' ti. So taɱ cittaɱ dahati, taɱ cittaɱ adhiṭṭhāti, taɱ cittaɱ bhāveti. Tassa taɱ cittaɱ hīne vimuttaɱ uttariɱ abhāvitaɱ tatr'upapattiyā saŋvattati. Tañ ca kho sīla-vato vadāmi no du-s-sīlassa. Ijjhat'āvuso sīla-vato ceto-paṇidhi suddhattā.
Puna ca paraɱ āvuso idh'ekacco dānaɱ deti Samaṇassa vā Brāhmaṇassa vā annaɱ pānaɱ vatthaɱ yānaɱ mālā-gadha-vilepanaɱ seyyāvasatha-padīpeyyaɱ. So yaɱ deti taɱ paccāsiɱsati. Tassa sutaɱ hoti 'Nimmāṇaratī devā dīghā-yukā vaṇṇa-vanto sukha-bahulā' ti. Tassa evaɱ hoti 'Aho vatāhaɱ kāyassa bhedā param maraṇā Nimmāṇaratīnaɱ devānaɱ saha-vyataɱ upapa-j-jeyyan' ti. So taɱ cittaɱ dahati, taɱ cittaɱ adhiṭṭhāti, taɱ cittaɱ bhāveti. Tassa taɱ cittaɱ hīne vimuttaɱ uttariɱ abhāvitaɱ tatr'upapattiyā saŋvattati. Tañ ca kho sīla-vato vadāmi no du-s-sīlassa. Ijjhat'āvuso sīla-vato ceto-paṇidhi suddhattā.
Puna ca paraɱ āvuso idh'ekaccodānaɱ deti Samaṇassa vā Brāhmaṇassa vā annaɱ pānaɱ vatthaɱ yānaɱ mālā-gadha-vilepanaɱ seyyāvasatha-padīpeyyaɱ. So yaɱ deti taɱ paccāsiɱsati. Tassa sutaɱ hoti 'Paranimmita-vasavattī devā dīghā-yukā vaṇṇa-vanto sukha-bahulā' ti. Tassa evaɱ hoti 'Aho vatāhaɱ kāyassa bhedā param maraṇā Paranimmita-vasavattīnaɱ devānaɱ saha-vyataɱ upapa-j-jeyyan' ti. So taɱ cittaɱ dahati, taɱ cittaɱ adhiṭṭhāti taɱ cittaɱ bhāveti. Tassa taɱ cittaɱ hīne vimuttaɱ uttariɱ abhāvitaɱ tatr'upapattiyā saŋvattati. Tañ ca kho sīla-vato vadāmi no du-s-sīlassa. Ijjhat'āvuso sīla-vato ceto-paṇidhi suddhattā.
Puna ca paraɱ āvuso idh'ekacco dānaɱ deti Samaṇassa vā Brāhmaṇassa vā annaɱ pānaɱ vatthaɱ yānaɱ mālā-gadha-vilepanaɱ seyyāvasatha-padīpeyyaɱ. So yaɱ deti taɱ paccāsiɱsati. Tassa sutaɱ hoti 'Brahma-kāyikā devā dīghā-yukā vaṇṇa-vanto sukha-bahulā' ti. Tassa evaɱ hoti 'Aho vatāhaɱ kāyassa bhedā param maraṇā brahma-kāyikānaɱ devānaɱ saha-vyataɱ upapa-j-jeyyan' ti. So taɱ cittaɱ dahati, taɱ cittaɱ adhiṭṭhāti, taɱ cittaɱ bhāveti. Tassa taɱ cittaɱ hīne vimuttaɱ uttariɱ abhāvitaɱ tatr'upapattiyā saŋvattati. Tañ ca kho [260] sīla-vato vadāmi no du-s-sīlassa. Vīta-rāgassa no sarāgassa. Ijjhat'āvuso sīla-vato ceto-paṇidhi suddhattā.

[8.08][pts][bodh][olds] Aṭṭha parisā:
Khattiya-parisā, Brāhmaṇa-parisā, gahapati-parisā, Samaṇa-parisā, Cātummahārājika-parisā, Tāvatiɱsa-parisā, Māra-parisā, Brahma-parisā.

[8.09][pts][bodh][olds] Aṭṭha loka-dhammā:
Lābho ca, alābho ca, yaso ca, ayaso ca, nindā ca, pasaɱsā ca, sukhañ ca, dukkhañ ca.

[8.10][pts][bodh][olds] Aṭṭha abhibh'āyatanāni:
Ajjhattaɱ rūpa-saññi eko bahiddhā rūpāni passati parittāni suvaṇṇa-dubbaṇṇāni, tāni Abhibhuyya 'Jānāmi passāmī' ti evaɱ-saññī hoti. Idaɱ paṭhamaɱ abhibh'āyatanaɱ.
Ajjhattaɱ rūpa-saññi eko bahiddhā rupāni passati appamāṇāni suvaṇṇa-dubbaṇṇāni, tāni Abhibhuyya 'Jānāmi passāmī' ti evaɱ saññī hoti. Idaɱ dutiyaɱ abhibh'āyatanaɱ.
Ajjhattaɱ arūpa-saññī eko bahiddhā rūpāni passati parittāni suvaṇṇa-dubbaṇṇāni, tāni abibhuyya 'Jānāmi passāmī' ti evaɱ saññi hoti. Idaɱ tatiyaɱ abhibh'āyatanaɱ.
Ajjhattaɱ arūpa-saññi eko bahiddhā rūpāni passati appamāṇāni suvaṇṇa-dubbanṇāni, tāni Abhibhuyya 'Jānāmi passāmī' ti evaɱ saññī hoti. Idaɱ catutthaɱ abhibh'āyatanaɱ.
Ajjhattaɱ arūpa-saññī eko bahiddhā rūpāni passati nīlāni nīla-vaṇṇāni nīla-nidassanāni nīla-nibhāsāni - seyyathā pi nāma ummā-pupphaɱ nīlaɱ nīla-vaṇṇaɱ nīla-nidassanaɱ nīla-nibhāsaɱ - seyyathā vā pana taɱ vatthaɱ Bārāṇaseyyakaɱ ubhato bhāga-vimaṭṭhaɱ nīlaɱ nīla-vaṇṇaɱ nīla-nidassanaɱ nila-nibhāsaɱ - evam eva ajjhattaɱ arūpa-saññī eko bahiddhā rūpāni passati [261] nīlāni nīla-vaṇṇāni nīla-nidassanāni nīla-nibhāsāni, tāni Abhibhuyya 'Jānāmi passāmī' ti evaɱ-saññī hoti. Idaɱ pañcamaɱ abhibh'āyatanaɱ.
Ajjhattaɱ arūpa-saññī eko bahiddhā rūpāni passati pītāni pīta-vaṇṇāni pīta-nidassanāni pīta-nibhāsāni - seyyathā pi nāma kaṇikārapupphaɱ pītaɱ pīta-vaṇṇaɱ pīta-nidassanaɱ pīta-nibhāsaɱ - seyyathā vā pana taɱ vatthaɱ Bārāṇaseyyakaɱ ubhato-bhāga-vimaṭṭhaɱ pītaɱ pīta-vaṇṇaɱ pīta-nidassanaɱ pīta-nibhāsaɱ - evam eva ajjhattaɱ arūpa-saññī eko bahiddhā rūpāni passati pītāni pīta-vaṇṇāni pīta-nidassanāni pīta-nibhāsāni, tāni Abhibhuyya 'Jānāmi passāmī' ti evaɱ-saññī hoti. Idaɱ chaṭṭhaɱ abhibh'āyatanaɱ.
Ajjhattaɱ arūpa-saññī eko bahiddhā rūpāni passati lohita-kāni lohitaka-vaṇṇāni lohitaka-nidassanāni lohitaka-nibhāsāni - seyyathā pi nāma bandhujīvakapupphaɱ lohitakaɱ lohitaka-vaṇṇaɱ lohitaka-nidassanaɱ lohitaka-nibhāsaɱ - seyyathā vā pana taɱ vatthaɱ Bārāṇaseyyakaɱ ubhato-bhāga-vimaṭṭhaɱ lohitakaɱ lohitaka-vanṇaɱ lohitaka-nidassanaɱ lohitaka-nibhāsaɱ - evam eva ajjhattaɱ arūpa-saññī eko bahiddhā rūpāni passati lohita-kāni lohitaka-vaṇṇāni lohitaka-nidassanāni lohitaka-nibhāsāni, tāni Abhibhuyya 'Jānāmi passāmī' ti evaɱ saññī hotī. Idaɱ sattamaɱ abhihāyatanaɱ.
Ajjhattaɱ arūpa-saññī eko bahiddhā rūpāni passatī odātāni odāta-vaṇṇāni odāta-nidassanāni odāta-nibhāsāni - seyyathā pi nāma osadhī-tārakā odātā odāta-vaṇṇā odāta-nidassanā odāta-nibhāsā - seyyathā vā pana taɱ vatthaɱ Bārāṇayeyyakaɱ ubhato-bhāga-vimaṭṭhaɱ odātaɱ odāta-vaṇṇaɱ odāta-nidassanaɱ odāta-nibhāsaɱ - evam eva ajjhattaɱ arūpa-saññī eko bahiddhā rūpāni passati odātāni odāta-vaṇṇāni odāta-nidassanāni odāta-nibhāsāni, tāni Abhibhuyya 'Jānāmi passāmī' ti evaɱ saññī hoti. Idaɱ aṭṭhamaɱ abhibh'āyatanaɱ.

[8.11][pts][bodh][olds] Aṭṭha vimokkhā:
Rūpī rūpāni passati. Ayaɱ paṭhamo vimokkho. Ajjhattaɱ arūpa-saññī eko [262] bahiddhā rūpāni passati. Ayaɱ dutiyo vimokkho.
'Subhan' t'eva adhimutto hoti. Ayaɱ tatiyo vimokkho.
Sabbaso rūpa-saññānaɱ samati-k-kamā paṭigha-saññānaɱ attha-gamā nānatta-saññānaɱ amanasi-kārā 'Ananto ākāso' ti Ākāsanañ-c'āyatanaɱ upasampajja viharati. Ayaɱ catuttho vimokkho.
Sabbaso ākāsānāñcāyatanaɱ samati-k-kamma 'Anantaɱ viññāṇan' ti Viññāṇañ-c'āyatanaɱ upasampajja viharati. Ayaɱ pañcamo vimokkho.
Sabbaso Viññāṇañ-c'āyatanaɱ samati-k-kamma 'N'atthi kiñcī' ti Ākiñcaññ'āyatanaɱ upasampajja viharati. Ayaɱ chaṭṭho vimokkho.
Sabbaso Ākiñcaññ'āyatanaɱ samati-k-kamma n'evasaññā-nāsaññāyatanaɱ upasampajja viharati. Ayaɱ sattamo vimokkho.
Sabbaso n'evasaññā-nāsaññāyatanaɱ samati-k-kamma saññā-vedayita-nirodhaɱ upasampajja viharati. Ayaɱ aṭṭhamo vimokkho.

Ime kho āvuso tena Bhagavatā jānatā passatā arahatā Sammā-Sam-Buddhena atthā dhammā sammad-akkhātā. Tattha sabbeh'eva saŋgāyitabbaɱ na vivaditabbaɱ, yatha-yidaɱ Brahma-cariyaɱ addhaniyaɱ assa cira-ṭṭhitikaɱ, tad assa bahu-jana-hitāya bahu-jana-sukhāya lokānukampāya atthāya hitāya sukhāya deva-manussānaɱ.


 [Ones and Twos]  [Threes]  [Fours]  [Fives]  [Sixes]  [Sevens]  [Eights]  [Nines]  [Tens]


Contact:
E-mail
Copyright Statement