Dīgha Nikāya


[Home]  [Sutta Indexes]  [Glossology]  [Site Sub-Sections]


 

Dīgha Nikāya

Sutta 33

Saŋgīti Suttantaɱ

Adapted from the digital version of the Sri Lanka Buddha Jayanti Tripitaka Series

 


[233]

Atthi kho āvuso tena Bhagavatā jānatā passatā arahatā Sammā-Sam-Buddhena pañcadhammā sammad-akkhāto. Tattha sabbeh'eva saŋgāyitabbaɱ na vivaditabbaɱ, yatha-yidaɱ Brahma-cariyaɱ addhaniyaɱ assa cira-ṭṭhitikaɱ, tad assa bahu-jana-hitāya bahu-jana-sukhāya lokānukampāya atthāya hitāya sukhāya deva-manussānaɱ.

[5.01][pts][bodh][olds] Pañca-k-khandhā:
Rūpa-k-khandho, vedanā-k-khandho, saññā-k-khandho, sankhāra-k-khandho, viññāṇa-k-khandho.

[5.02][pts][bodh][olds] Pañcupādāna-k-khandhā:
Rūp'ūpādāna-k-khandho, [234] vedan'ūpādāna-k-khandho, saññ'ūpādāna-k-khandho, sankhār'ūpādāna-k-khandho, viññāṇ'ūpādāna-k-khandho.

[5.03][pts][bodh][olds] Pañca kāma-guṇā:
Cakkhu-viññeyyā rūpā iṭṭhā kantā manāpā piya-rūpā kām'ūpasaɱ-hitā rajanīyā.
Sota-viññeyyā saddā iṭṭhā kantā manāpā piya-rūpā kām'ūpasaɱ-hitā rajanīyā.
Ghāṇa-viññeyyā gandhā iṭṭhā kantā manāpā piya-rūpā kām'ūpasaɱ-hitā rajanīyā.
Jivhā-viññeyyā rasā iṭṭhā kantā manāpā piya-rūpā kām'ūpasaɱ-hitā rajanīyā.
Kāya-viññeyyā phoṭṭhabbā iṭṭhā kantā manāpā piya-rūpā kām'ūpasaɱ-hitā rajanīyā.

[5.04][pts][bodh][olds] Pañca gatiyo:
Nirayo, tiracchāna-yoni, petti-visayo, manussā, devā.

[5.05][pts][bodh][olds] Pañca macchariyāni:
āvāsa-macchariyaɱ, kula-macchariyaɱ, lābha-macchariyaɱ, vaṇṇa-macchariyaɱ, dhamma-macchariyaɱ.

[5.06][pts][bodh][olds] Pañca nīvaraṇāni:
Kāma-c-chanda-nīvaraṇaɱ, vyāpāda-nīvaranaɱ, thīna-middha-nīvaraṇaɱ, uddhacca-kukkucca-nīvaraṇaɱ, vicikicchā-nīvaraṇaɱ.

[5.07][pts][bodh][olds] Pañc'ora-m-bhāgiyāni saŋyojanānā:
Sakkāya-diṭṭhi, vicikicchā, sīla-b-bata-parāmāso, kāma-c-chando, vyāpādo.

[5.08][pts][bodh][olds] Pañcuddham-bhāgiyāni saŋyojanāni:
rūpa-rāgo, arūpa-rāgo, māno, uddhaccaɱ, avijjā.

[235][5.09][pts][bodh][olds] pañca sikkhā-padāni:
pāṇātipātā veramaṇī, adinn'ādānā veramaṇī, kāmesu micchācārā veramaṇī, musā-vādā veramaṇī, surā-meraya-majja-pamādaṭṭhanā veramaṇī.

[5.10][pts][bodh][olds] Pañca abhabba-ṭ-ṭhānāni:
Abhabbo āvuso khīṇ'āsavo bhikkhu sañcicca pāṇaɱ jīvitā voropetuɱ.
Abhabbo khīṇ'āsavo bhikkhu adinnaɱ theyya-saŋkhātaɱ ādātuɱ.
Abhabbo khīṇ'āsavo bhikkhu methunaɱ dhammaɱ paṭisevituɱ.
Abhabbo khīṇ'āsavo bhikkhu sampajāna-musā bhāsituɱ.
Abhabbo khīṇ'āsavo bhikkhu sannidhi-kārakaɱ kāme paribhuñjituɱ seyyathā pi pubbe agāriya-bhūto.

[5.11][pts][bodh][olds] Pañca vyasanāni:
Ñāti-vyasanaɱ, bhoga-vyasanaɱ, roga-vyasanaɱ, sīla-vyasanaɱ, diṭṭhi-vyasanaɱ.
N'āvuso sattā ñāti-vyasana-hetu vā bhoga-vyasana-hetu vā roga-vyasana-hetu vā kāyassa bhedā param-maraṇā apāyaɱ duggatiɱ vinipātaɱ Nirayaɱ upapajjanti.
Sīla-vyasana-hetu vā āvuso sattā diṭṭhi-vyasana-hetu vā kāyassa bhedā param-maraṇā apāyaɱ duggatiɱ vinīpātaɱ Nirayaɱ upapajjanti.

[5.12][pts][bodh][olds] Pañca sampadā:
Ñāti-sampadā, bhoga-sampadā, ārogya-sampadā, sīla-sampadā, diṭṭhi-sampadā.
N'āvuso sattā ñāti-sampadā-hetu vā bhoga-sampadā-hetu vā ārogya-sampadā-hetu vā kāyassa bhedā param maraṇā sugatiɱ saggaɱ lokaɱ upapajjanti.
Sīla-sampadā-hetu vā āvuso sattā diṭṭhi-sampadā-hetu vā kāyassa bhedā param maraṇā sugatiɱ saggaɱ lokaɱ upapajjanti.

[5.13][pts][bodh][olds] Pañca ādīnāvā du-s-sīlassa sīla-vipattiyā:
Idh' [236] āvuso du-s-sīlo sīla-vipanno pamādādhikaraṇaɱ mahatiɱ bhoga-jāniɱ nigacchati. Ayaɱ paṭhamo ādīnavo du-s-sīlassa sīla-vipattiyā.
Puna ca paraɱ āvuso du-s-sīlassa sīla-vipannassa pāpako kitti-saddo abbhu-g-gacchati. Ayaɱ dutiyo ādīnāvo du-s-sīlassa sīla-vipattiyā.
Puna ca paraɱ āvuso du-s-sīlo sīla-vipanno yaɱ yad eva parisaɱ upasankamati yadi khattiya-parisaɱ yadi brāmhaṇa-parisaɱ yadi gahapati-parisaɱ yadi samaṇa-parisaɱ avisārado upasankamati maŋku-bhūto. Ayaɱ tatiyo ādīnavo du-s-sīlassa sīla-vipattiyā.
Puna ca paraɱ āvuso du-s-sīlo sīla-vipanno sammūḷho kālaɱ karoti. Ayaɱ catuttho ādīnavo du-s-sīlassa sīla-vipattiyā.
Puna ca paraɱ āvuso du-s-sīlo sila-vipanno kāyassa bhedā param maraṇā apāyaɱ duggatiɱ vinipātaɱ Nirayaɱ uppajjati. Ayaɱ pañcamo ādīnavo du-s-sīlassa sīla-vipattiyā.

[5.14][pts][bodh][olds] Pañca ānisaɱsā sīla-vato sīla-sampadāya:
Idh'āvuso sīlavā sīla-sampanno appamādādhikaraṇaɱ mahantaɱ bhoga-k-khandhaɱ adhigacchati. Ayaɱ paṭhamo ānisaɱso sīla-vato sīla-sampadāya.
Puna ca paraɱ āvuso sīla-vato sīla-sampannassa kaḷyāṇo kitti-saddo ababhuggacchati. Ayaɱ dutiyo ānisaɱso sīla-vato sīla-sampadāya.
Puna ca paraɱ āvuso sīlavā sīla-sampanno yaɱ yad eva parisaɱ upasankamati yadi khattiya-parisaɱ yadi brāhmaṇa-parīsaɱ yadi gahapati-parisaɱ yadi samaṇa-parisaɱ visārado upasankamati amaŋku-bhūto. Ayaɱ tatiyo ānisaɱso sīla-vato sīla-sampadāya.
Puna ca paraɱ āvuso sīlavā sīla-sampanno asa-m-mūḷho kālaɱ karoti. Ayaɱ catuttho ānisaɱso sīla-vato sīla-sampadāya.
Puna ca paraɱ āvuso sīlavā sīla-sampanno kāyassa bhedā param maraṇā sugatiɱ saggaɱ lokaɱ uppajjati. Ayaɱ pañcamo ānisaɱso sīla-vato sīla-sampadāya.

[5.15][pts][bodh][olds] Codakena āvuso bhikkhunā paraɱ codetu-kāmena pañca dhamme ajjhattaɱ upaṭṭhepetvā paro codetabbo:
'Kālena vakkhāmi no akālena, bhūtena vakkhāmi no abhūtena,
saṇhena vakkhāmi no pharusena,
attha-saɱhitena [237] vakkhāmi no anattha-saɱhitena,
metta-cittena vakkhāmi no dos'antarenā' ti.
Codakena āvuso bhikkhunā paraɱ codetu-kāmena ime pañca dhamme ajjhattaɱ upaṭṭha-petvā paro codetabbo.

[5.16][pts][bodh][olds] Pañca padhāniyaŋgāni:
Idh'āvuso bhikkhu saddho hoti, sadda-hati Tathāgatassa bodhiɱ: 'Iti pi so Bhagavā arahaɱ Sammā-SamBuddho vijjā-caraṇa-sampanno Sugato loka-vidū anuttaro purisa-damma-sārathī Satthā deva-manussānaɱ Buddho Bhagavā' ti.
Appābādho hoti appātaŋko sama-vepākiniyā gahaṇiyā samannāgato nāti-sītāya nāccuṇhāya majjhimāya padhāna-kkhamāya.
Asaṭho hoti amāyāvī yathā-bhūtaɱ attānaɱ āvikattā Satthari vā viññūsu vā sabrahma-cārīsu.
Āraddha-viriyo viharati akusalānaɱ dhammānaɱ pahānāya kusalānaɱ dhammānaɱ upasampadāya thāmavā daḷha-parakkamo anikkhitta-dhuro kusalesu dhammesu.
Paññavā hoti uday'attha-gāminiyā paññāya samannāgato ariyāya nibbedhi-kāya sammā-dukkha-kkhaya-gāminiyā.

[5.17][pts][bodh][olds] Pañca Suddhāvāsā:
Avihā, atappā, sudassā, sudassī, akaniṭṭhā.

[5.18][pts][bodh][olds] Pañca Anāgāmino:
Antarā-parinibbāyī, upahacca-parinibbāyī, asankhāra-parinibbāyī, sa-sankhāra-paribbāyī, uddhaɱ-soto Akaniṭṭha-gāmī.

[5.19][pts][bodh][olds] Pañca ceto-khīlā:
Idh'āvuso bhikkhu Satthari [238] kankhati vici-kicchati nādhi-muccati na sampasīdati. Yo so āvuso bhikkhu Satthari kankhati vici-kicchati nādhi-muccati na sampasīdati, tassa cittaɱ na namati ātappāya anuyogāya sāta-c-cāya padhānāya. Yassa cittaɱ na namati ātappāya anuyogāya sātaccayā padhānāya ayaɱ paṭhamo ceto-khīlo.
Puna ca paraɱ āvuso bhikkhu Dhamme kaŋkhāti vici-kicchati, nādhi-muccati na sampasīdati. Yo so āvuso bhikkhu Dhamme kankhati vici-kicchati nādhi-muccati na sampasīdati tassa cittaɱ na namati ātappāya anuyogāya sāta-c-cāya padhānāya. Yassa cittaɱ na namati ātappāya sāta-c-cāya padhānāya. Ayaɱ dutiyo ceto-khīlo.
Puna ca paraɱ āvuso bhikkhu Saŋghe kankhati vici-kicchati nādhi-muccati na sampasīdati. Yo so āvuso bhikkhu Saŋghe kankhati vici-kicchati nādhi-muccati na sampasīdati tassa cittaɱ na namati ātappāya anuyogāya sāta-c-cāya padhānāya. Yassa cittaɱ na namati ātappāya sāta-c-cāya padhānāya. Ayaɱ tatiyo ceto-khīlo.
Puna ca paraɱ āvuso bhikkhu sikkhāya kankhati vici-kicchati nādhi-muccati na sampasīdati. Yo so āvuso bhikkhu sikkhāya kankhati vici-kicchati nādhi-muccati na sampasīdati tassa cittaɱ na namati ātappāya anuyogāya sāta-c-cāya padhānāya. Yassa cittaɱ na namati ātappāya anuyogāya sāta-c-cāya padhānāya. Ayaɱ catuttho cotokhīlo.
Puna ca paraɱ āvuso bhikkhu sabrahma-cārīsu kupito hoti anatta-mano āhata-citto khīla-jāto. Yo so āvuso bhikkhu sabrahma-cārīsu kupito hoti anatta-mano āhata-citto khīla-jāto, tassa cittaɱ na namati ātappāya anuyogāya sāta-c-cāya padhānāya. Yassa cittaɱ na namati ātappāya anuyogāya sāta-c-cāya padhānāya. Ayaɱ pañcamo ceto-khīlo.

[5.20][pts][bodh][olds] Pañca cetaso vinibandhā:
Idh'āvuso bhikkhu kāme avigata-rāgo hoti avigata-chando avigata-pemo avigata-pipāso avigata-pariḷāho avigata-taṇho. Yo so āvuso bhikkhu kāme avigata-rāgo hoti avigata-chando avigata-pemo avigata-pipāso avigata-pariḷāho avigata-taṇho, tassa cittaɱ na namati ātappāya anuyogāya sāta-c-cāya padhānāya. Yassa cittaɱ na namati ātappāya anuyogāya sāta-c-cāya padhānāya, ayaɱ paṭhamo cetaso vinibavdho.
Puna ca para āvuso bhikkhu kāye avigata-rāgo hoti avigata-chando avigata-pemo avigata-pipāso avigata-pariḷāho avigata-taṇho. Yo so āvuso bhikkhu kāye avigata-rāgo hoti avigata-chando avigata-pemo avigata-pipāso avigata-pariḷāho avigata-taṇho, tassa cittaɱ na namati ātappāya anuyogāya sāta-c-cāya padhānāya. Yassa cittaɱ na namati ātappāya anuyogāya sāta-c-cāya padhānāya, ayaɱ dutiyo cetaso vinibandho.
Puna ca paraɱ āvuso bhikkhu rūpe avigata-rāgo hoti avigata-chando avigata-pemo avigata-pipāso avigata-pariḷāho avigata-taṇho. Yo so āvuso bhikkhu rūpe avigata-rāgo hoti avigata-chando avigata-pemo avigata-pipāso avigata-pariḷāho avigata-taṇho, tassa cittaɱ na namati ātappāya anuyogāya sāta-c-cāya padhānāya. Yassa cittaɱ na namati ātappāya anuyogāya sāta-c-cāya padhānāya, ayaɱ tatiyo cetaso vinibandho.
Puna ca paraɱ āvuso bhikkhu yāva-datthaɱ udarāvahehakaɱ bhuñjitvā seyya-sukhaɱ phassa-sukhaɱ middha-sukhaɱ anuyutto viharati. Yo so āvuso bhikkhu yāva-datthaɱ udarāvahedakaɱ bhuñjitvā seyya-sukhaɱ phassa-sukhaɱ middha-sukhaɱ anuyutto viharati, tassa cittaɱ na namati ātappāya anuyogāya sāta-c-cāya padhānāya. Yassa cittaɱ na namati ātappāya anuyogāya sāta-c-cāya padhānāya, ayaɱ catuttho cetaso vinibandho.
Puna ca paraɱ āvuso [239] bhikkhu aññataraɱ deva-nikāyaɱ paṇidhāya Brahma-cariyaɱ carati: 'Iminā'haɱ vatena vā sīlena vā tapena vā brahma-cariyena vā devo vā bhavissāmī deva-ñ-ñataro vā'ti. Yo so āvuso bhikkhu aññataraɱ deva-nikāyaɱ paṇidhāya Brahma-cariyaɱ carati: 'Iminā'haɱ vatena vā sīlena vā tapena vā brahma-cariyena vā devo vā bhavissāmi deva-ñ-ñataro vā'ti, tassa cittaɱ na namati ātappāya anuyogāya sāta-c-cāya padhānāya. Yassa cittaɱ na namati ātappāya anuyogāya sāta-c-cāya padhānāya, ayaɱ pañcamo cetaso vinibandho.

[5.21][pts][bodh][olds] Pañc'indriyāni:
Cakkhundriyaɱ, sot'indriyaɱ, ghān'indriyaɱ, jivah'indriyaɱ, kāy'indriyaɱ.

[5.22][pts][bodh][olds] Aparāni'pi pañc'indriyāni:
Sukhindriyaɱ, dukkhindriyaɱ, somanassindriyaɱ, demanassindriyaɱ, upekkhindriyaɱ.

[5.23][pts][bodh][olds] Aparāni'pi pañc'indriyāni:
Saddh'indriyaɱ, viriy'indriyaɱ, sat'indriyaɱ, samādh'indriyaɱ, paññindiyaɱ.

[5.24][pts][bodh][olds] Pañca nissaraṇiyā dhātuyo:
Idh'āvuso bhikkhuno kāme mana-sikaroto kāmesu cittaɱ na pakkhandati na-p-pasīdati na santiṭṭhati na vimuccati nekkhammaɱ kho pan'assa mana-sikaroto nekkhamme cittaɱ pakkhandati pasīdati santiṭṭhati vimuccati, tassa taɱ cittaɱ Sugataɱ [240] subhāvitaɱ suvuṭṭhitaɱ su-vimuttaɱ visaɱyuttaɱ kāmehi, ye ca kāma-paccayā uppajjanti āsavā vighātā pariḷāhā, mutto so tehi, na so taɱ vedanaɱ vedeti, idam akkhātaɱ kāmānaɱ nissaraṇaɱ.
Puna ca paraɱ āvuso bhikkhuno vyāpadaɱ mana-sikaroto vyāpāde cittaɱ na pakkhandati na-p-pasīdati na santiṭṭhati na vimuccati, avyāpādaɱ kho pan'assa mana-sikaroto avyāpade cittaɱ pakkhandati pasīdati santiṭṭhati vimuccati, tassa taɱ cittaɱ Sugataɱ subhāvitaɱ suvuṭṭhitaɱ su-vimuttaɱ visaɱyuttaɱ vyāpādena, ye ca vyāpāda-paccayā uppajjanti āsavā vighātā pariḷāhā mutto so tehi, na so taɱ vedanaɱ vedeti, idam akkhātaɱ vyāpādassa nissaraṇaɱ.
Puna ca paraɱ āvuso bhikkhuno vihesaɱ mana-sikaroto vihesāya cittaɱ na pakkhandati na-p-pasīdati na santiṭṭhati na vimuccati, avihesaɱ kho pan'assa mana-sikaroto avihesāya cittaɱ pakkhandati pasīdati santiṭṭhati vimuccati, tassa taɱ cittaɱ Sugataɱ subhāvitaɱ suvuṭṭhitaɱ su-vimuttaɱ visaɱyuttaɱ vihesāya, ye ca vibhesa-paccayā uppajjanti āsavā vighātā pariḷāhā mutto so tehi, na so taɱ vedanaɱ vedeti, idam akkhātaɱ vihesāya nissaraṇaɱ.
Puna ca paraɱ āvuso bhikkhuno rūpaɱ mana-sikaroto rūpesu cittaɱ na pakkhandati na-p-pasīdati na santiṭṭhati na vimuccati, arūpaɱ kho pan'assa mana-sikaroto arūpesu cittaɱ pakkhandati pasīdati santiṭṭhati vimuccati, tassa taɱ cittaɱ Sugataɱ subhāvitaɱ suvuṭṭhitaɱ su-vimuttaɱ visaɱyuttaɱ rūpehi, ye ca rūpa-paccayā uppajjanti āsavā vighātā pariḷāhā mutto so tehi, na so taɱ vedanaɱ vedeti, idam akkhātaɱ rūpānaɱ nissaraṇaɱ.
Puna ca paraɱ āvuso bhikkhuno sakkāyaɱ mana-sikaroto sakkāye cittaɱ na pakkhandati na-p-pasīdati na santiṭṭhati na vimuccati, sakkāya-nirodhaɱ kho pan'assa mana-sikaroto sakkāya-nirodho cittaɱ pakkhandati pasīdati santiṭṭhati vimuccati, tassa taɱ cittaɱ Sugataɱ subhāvitaɱ suvuṭṭhitaɱ su-vimuttaɱ visaɱyuttaɱ sakkāyena, ye ca sakkāya-paccayā uppajjanti āsavā vighātā pariḷāhā mutto [241] so tehi, na so taɱ vedanaɱ vedeti, idam akkhātaɱ sakkāya-nissaraṇaɱ.

[5.25][pts][bodh][olds] Pañca vimuttāyatanāni:
Idh'āvuso bhikkhuno Satthā dhammaɱ deseti aññataro vā garu-ṭ-ṭhāniko sabrahma-cārī. Yathā yathā āvuso bhikkhuno Satthā dhammaɱ deseti aññataro vā garu-ṭ-ṭhāniko sabrahma-cārī, tathā tathā so tasmiɱ dhamme attha-paṭisaŋvedī ca hoti dhamma-paṭisaŋvedī ca. Tassa attha-ppaṭisaŋvedino dhamma-paṭisaŋvedino pāmujjaɱ jāyati, pamuditassa pīti jāyati, pīti-manassa kāyo passambhati, passaddha-kāyo sukhaɱ vedeti, sukhino cittaɱ samādhiyati. Idaɱ paṭhamaɱ vimuttāyatanaɱ.
Puna ca paraɱ āvuso bhikkhuno na h'eva kho Satthā dhammaɱ deseti aññataro vā garu-ṭ-ṭhāniko sabrahma-cārī, api ca kho yathā-sutaɱ yathā-pariyattaɱ dhammaɱ vitthārena paresaɱ deseti. Yathā yathā āvuso bhikkhu yathā-sutaɱ yathā-pariyattaɱ dhammaɱ vitthārena paresaɱ deseti, tathā tathā so tasmiɱ dhamme attha-paṭisaŋvedī ca hoti dhamma-paṭisaŋvedī ca. Tassa attha-paṭisaŋvedino dhamma-paṭisaŋvedino pāmujjaɱ jāyati, pamuditassa pīti jāyati, pīti-manassa kāyo passambhati, passaddha-kāyo sukhaɱ vedeti, sukhino cittaɱ samādhiyati. Idaɱ dutiyaɱ vimuttāyatanaɱ
Puna ca paraɱ āvuso bhikkhuno na h'eva kho Satthā dhammaɱ deseti aññataro vā garu-ṭ-ṭhāniko sabrahma-cārī, nā pi yathā-sutaɱ yathā-pariyattaɱ dhammaɱ vitthārena paresaɱ deseti, api ca kho yathā-sutaɱ yathā-pariyattaɱ dhammaɱ vitthārena sajjhāyaɱ karoti. Yathā yath'vuso bhikkhu yathā-sutaɱ yathā-pariyattaɱ dhammaɱ vitthārena sajjhāyaɱ karoti, tatā tathā so tasmiɱ dhamme attha-paṭisaŋvedī ca hoti dhamma-paṭisaŋvedī ca. Tassa attha-paṭisaŋvedino dhamma-paṭisaŋvedino pāmujjaɱ jāyati, pamuditassa pīti jāyati, pīti-manassa kāyo passambhati, [242] passaddha-kāyo sukhaɱ vedeti, sukhino cittaɱ samādhiyati. Idaɱ tatiyaɱ vimuttāyatanaɱ.
Puna ca paraɱ āvuso bhikkhuno na h'eva kho Satthā dhammaɱ deseti aññataro vā garu-ṭ-ṭhāniko sabrahma-cārī, nā pi yathā-sutaɱ yathā-pariyattaɱ dhammaɱ vitthārena paresaɱ deseti, nā pi yathā-sutaɱ yathā-pariyattaɱ dhammaɱ vitthārena sajjhāyaɱ karoti, api ca kho yathā-sutaɱ yathā-pariyattaɱ cetasā anuvitakketi anuvicāreti manasā'nupekkhati. Yathā yath'vuso bhikkhu yathā-sutaɱ yathā-pariyattaɱ dhammaɱ cetasā anuvitakketi anuvicāreti manasā'nupekkhati, tathā tathā so tasmiɱ dhamme attha-paṭisaŋvedī ca hoti dhamma-paṭisaŋvedī ca. Tassa attha-paṭisaŋvedino dhamma-paṭisaŋvedino pāmujjaɱ jāyati, pamuditassa pīti jāyati pīti-manassa kāyo passambhati, passaddha-kāyo sukhaɱ vedeti, sukhino cittaɱ samādhiyati. Idaɱ catutthaɱ vimuttāyatanaɱ.
Puna ca paraɱ āvuso bhikkhuno na h'eva kho Satthā dhammaɱ deseti aññataro vā garu-ṭ-ṭhāniko sabrahma-cārī, nā pi yathā-sutaɱ yathā-pariyattaɱ dhammaɱ vitthārena paresaɱ deseti, nā pi yathā-sutaɱ yathā-pariyattaɱ dhammaɱ vitthārena sajjhāyaɱ karoti, nā pi yathā-sutaɱ yathā-pariyattaɱ dhammaɱ cetasā anuvitakketi anuvicāreti manasā'nupekkhati, api ca kho assa aññataraɱ samādhi-nimittaɱ suggahitaɱ hoti sumana-sikataɱ, sūpadhāritaɱ suppaṭi-viddhaɱ paññāya. Yathā yathā āvuso bhikkhuno aññataraɱ samādhi-nimittaɱ suggahitaɱ hoti sumana-sikataɱ sūpadhāritaɱ suppaṭi-viddhaɱ paññāya, tathā tathā so tasmiɱ dhamme attha-paṭisaŋvedī ca hoti dhamma-paṭisaŋvedī ca. Tassa attha-paṭisaŋvedino dhamma-paṭisaŋvedino pāmujjaɱ jāyati, pamuditassa pīti jāyati, pīti-manassa kāyo passambhati, passaddha-kāyo sukhaɱ [243] vedeti, sukhino cittaɱ samādhiyati. Idaɱ pañcamaɱ vimuttāyatanaɱ.

[5.26][pts][bodh][olds] Pañca vimutati-paripācaniyā saññā:
Anicca-saññā, anicce dukkha-saññā, dukkhe anatta-saññā, pahāna-saññā, virāga-saññā.

Ime kho āvuso tena Bhagavatā jānatā passatā arahatā Sammā-Sam-Buddhena pañca dhammā sammad-akkhāto. Tattha sabbeh'eva saŋgāyitabbaɱ na vivaditabbaɱ, yatha-yidaɱ Brahma-cariyaɱ addhaniyaɱ assa cira-ṭṭhitikaɱ, tad assa bahu-jana-hitāya bahu-jana-sukhāya lokānukampāya atthāya hitāya sukhāya deva-manussānaɱ.


 [Ones and Twos]  [Threes]  [Fours]  [Fives]  [Sixes]  [Sevens]  [Eights]  [Nines]  [Tens]


Contact:
E-mail
Copyright Statement